بۇعان دەيىن دە وبلىس ورتالىعىنداعى شەشىمىن تاپپاي كەلگەن وتكىر تاقىرىپ قالا ماڭىنداعى ەلدى مەكەندەرگە قاتىستى ەدى. شىنىمەن, تالدىقورعاننىڭ ىرگەسىندەگى ساياجايلاردا پروبلەما شاش-ەتەكتەن. سونىڭ ىشىندە اۋىز سۋ, گاز, ەلەكتر جەلىسى, جول ينفراقۇرىلىمدارىنىڭ بولماۋى, مەكتەپ پەن دارىگەرلىك امبۋلاتوريا جەتىسپەۋشىلىگى تۇرعىنداردى ءجيى مازالايدى. جالپى, ساياجايلاردى قويىپ, قالانىڭ وزىندە سۋمەن جابدىقتاۋ جۇيەسىنىڭ 62 پايىزى, كارىز جۇيەلەرىنىڭ 64 پايىزىنىڭ توزىعى جەتكەن. مەملەكەت بۇل ماسەلەمەن اينالىسۋدا. مىسالى, بىلتىر قالاعا قارايتىن «3-بولىمشە» اتالاتىن ايماقتا اۋىز سۋمەن قامتۋ جۇيەسى سالىنسا, بيىل «ۇلان» اسكەري قالاشىعىنا, ەركىن اۋىلدارىنا اۋىز سۋ تارتۋ جۇمىستارىنىڭ قۇرىلىسى باستالماق. ساياجاي اۋماقتارىن گازداندىرۋ جايى دا سىن كوتەرمەيدى. قازىر قالانىڭ وزىندە 30 مىڭداي ابونەنت قانا كوگىلدىر وتىن جەلىسىنە قوسىلعان. ەندى كوتتەدج قالاشىعىن, باسقا دا بىرنەشە ەلدى مەكەن مەن ساياجاي ماسسيۆتەرىن گازداندىرۋ ءىسى كۇن تارتىبىندە تۇر.
كۇن ءتارتىبى دەمەكشى, قالا ماڭىنداعى 20 مىڭ ادام تۇرىپ جاتقان 12 ساياجايدى ينفراقۇرىلىممەن قامتىپ, اباتتاندىرۋ جۇمىستارىن جالعاستىرۋ كەزەك كۇتتىرمەيدى. قازىر «كليۋچي», «المالى», «قاراتال» ساياجاي بىرلەستىكتەرىنە ۇزىندىعى 29,7 شاقىرىم بولاتىن اۋىز سۋ جۇيەسى تارتىلعان. ال ء«ۇيتاس» ساياجايىنىڭ 4,4 شاقىرىم جولى جوندەلىپ, «شايقورعان», «اگروپرومىشلەننيك», «مەرەكەلىك» ساياجايلارىنىڭ 39 كوشەسىنە قيىرشىقتاس توسەلدى. ء«ۇيتاس» پەن «قىزىل تاس» بىرلەستىگىنىڭ نەگىزگى كوشەلەرى جارىقتاندىرىلدى. بيىل «اششىبۇلاق» ساياجايىنا اۋىز سۋ جۇيەسىن تارتۋعا 206,4 ملن تەڭگە قارجى ءبولىندى. ەندى «قىزىل تاسقا» سۋ قۇبىرىن جۇرگىزۋ باستاماسى قاراستىرىلىپ جاتىر.
سوعان قاراماستان تۇرعىندار وبلىس اكىمدىگىنە ساياجايلارعا قاتىستى كوپتەگەن ساۋال قويىپ وتىر. ماسەلەن, ۇيتاستىقتار ەلەكتر جارىعىن تارتۋ, جول جوندەۋ, مەكتەپ سالۋ قاجەتتىگىنە, سۋارمالى سۋدىڭ جەتىسپەۋشىلىگىنە, ورناتىلعان كامەرالاردىڭ جۇمىس ىستەمەيتىنىنە شاعىمدانسا, پريگورودنىي اۋىلىنىڭ تۇرعىندارى 2020 جىلى تارتىلعان گاز قۇبىرى ءالى كۇنگە ىسكە قوسىلماعانىن, اۋىلعا جۇرەتىن №16 اۆتوبۋستىڭ قاتىناۋ جيىلىگىن ۇلعايتۋ جانە ۇلكەن اۆتوبۋس شىعارۋ كەرەگىن ايتادى. «قىزىلتاس», «مەرەكەلىك» ساياجايلارىنىڭ ازاماتتارى دا وسى مازمۇنداعى ماسەلەلەردى ءجيى كوتەرەدى. دەمەك جەتىسۋ وبلىسىنىڭ اكىمى بولىپ جاڭادان تاعايىندالعان بەيبىت يساباەۆ مىرزانىڭ الداعى جۇمىسىنا سىن بولاتىن ماسەلە جەتكىلىكتى.
– قالا ماڭىنداعى ساياجايلاردا 6 269 تۇرعىن ءۇي بار. وندا بارلىعى 20 مىڭ ادام تۇرادى. «الماتى», «اششىبۇلاق», «قىزىلتاس», «مەرەكەلىك», ء«ۇيتاس» ساياجاي قوعامدارى بويىنشا جوسپارلاۋ جوبالارى ازىرلەنىپ, بەكىتىلدى. شايقورعان, «سارىارقا» جانە «قاراتال» ساياجايلارىنا ينفراقۇرىلىم تارتۋ بويىنشا شارالار جۇرگىزىلۋدە. ال قالا مەن قالا ماڭىنداعى ەلدى مەكەندەردى گازبەن قامتاماسىز ەتۋ ماسەلەسى دە كەزەڭ-كەزەڭىمەن شەشىمىن تابادى. بۇگىنگى تاڭدا گازعا 28,5 مىڭ ابونەنت قوسىلعان. قالانى گازداندىرۋ جوباسى 4 كەزەڭگە جانە 22 ىسكە قوسۋ كەشەنىنە بولىنگەن. ءبىرىنشى كەزەڭ بويىنشا 5 327 ابونەنت, ەكىنشى كەزەڭ بويىنشا 15 792, ءۇشىنشى كەزەڭ بويىنشا 4 260, ءتورتىنشى كەزەڭ بويىنشا 2 897 ابونەنت كوگىلدىر وتىنعا قوسىلادى. گازعا قوسىلۋ قۇنى 300 مىڭ تەڭگەدەن 920 مىڭ تەڭگە مولشەرىندە, – دەيدى تالدىقورعان قالاسىنىڭ اكىمى اسەت ماساباەۆ.
جالپى, بۇعان دەيىن وبلىستا 215 مىڭنان استام ادامنىڭ ساياجاي بىرلەستىكتەرىندە تۇراتىنى ايتىلعان. ياعني تالدىقورعانداعى جاعداي وسىنشا ادامنىڭ بارىنە ورتاق ماسەلە ەكەنى انىق. ونىڭ ىشىندە ينفراقۇرىلىم ماسەلەسى ءبىرىنشى ورىندا تۇر. ارينە, بۇل جاعدايدى تۇبەگەيلى شەشۋ ءۇشىن الدىمەن ساياجايلارعا ەلدى مەكەن مارتەبەسى بەرىلۋى كەرەك. ال ول ءۇشىن اكىمدىك قالانىڭ باس جوسپارىن قايتا ازىرلەۋگە ءتيىس ەكەن. بۇل ۋاقىت پەن اقشانى جانە ۇكىمەتتىڭ كەلىسىمىن قاجەت ەتەدى. ياعني الداعى كەزەڭدە تالدىقورعان قالاسىنىڭ ماڭىنداعى ساياجايلاردىڭ عانا ەمەس, تۇتاس وبلىس اۋماعىنداعى جاڭعىرتۋدى قاجەت ەتەتىن اۋىلداردىڭ جاعدايىن وڭالتۋ – ءوڭىر تۇرعىندارىنىڭ زامانعا ساي ءومىر ءسۇرۋىن قامتاماسىز ەتۋ عانا ەمەس, تۇتاس ەلىمىزدەگى قوردالانعان الەۋمەتتىك پروبلەمالاردى جويۋدىڭ دا العىشارتى بولماق.
جەتىسۋ وبلىسى
