ماڭىزدى قۇجاتقا كوز جۇگىرتسەك, بۇدان بىلاي مير كوشەسى ولجاباي باتىر كوشەسى بولىپ اتالماق. ال ۋريتسكي كوشەسى گەنەرال سماعۇلوۆ كوشەسىنە, 1-يا يۋجنايا كوشەسى بىرلىك كوشەسىنە, 2-يا يۋجنايا كوشەسى كاۋكەن كەنجەتاەۆ كوشەسىنە, پاركوۆايا كوشەسى مۇقاعالي ماقاتاەۆ كوشەسىنە, دونەتسكايا كوشەسى ماعجان جۇماباەۆ كوشەسىنە, كۋبانسكايا كوشەسى قالمۇقان يساباي كوشەسىنە, سوۆحوزنايا كوشەسى رافيقا نۇرتازينا كوشەسىنە, تاگانروگسكايا كوشەسى قازانعاپ بي كوشەسىنە, انگارسكايا كوشەسى ناعىمبەك نۇرمۇحاممەدوۆ كوشەسىنە, چيتينسكايا كوشەسى امانجول شامكەنوۆ كوشەسىنە, دەكابريستوۆ كوشەسى قامار قاسىموۆ كوشەسىنە, يۋنناتوۆ كوشەسى ديحان ابىلەۆ كوشەسىنە, 1-يا سوۆەتوۆ, 2-يا سوۆەتوۆ كوشەسى گەنەرال باكىروۆ كوشەسىنە, زىريانوۆسكايا كوشەسى قابدىكارىم ىدىرىسوۆ كوشەسىنە, سايانسكايا كوشەسى الما اجىباەۆا كوشەسىنە, لەسنايا كوشەسى اعايىندى دۇيسەمبينوۆتەر كوشەسىنە وزگەرتىلدى.
پاۆلودار قالاسىندا 334 كوشە بار ەكەن. قازىرگى تاڭدا ولاردىڭ 85-ءى (26 پايىزى) قازاقشا, 249-ى (74 پايىز) وزگە تىلدەگى اتاۋلار. بايقاساڭىز, ءالى دە بۇل باعىتتاعى جۇمىستاردىڭ جۇيەلى اتقارىلعانى قاجەت-اق. سوڭعى 5 جىلدىڭ ىشىندە وبلىس ورتالىعىندا 18 كوشەنىڭ اتاۋى وزگەرتىلىپ, يدەولوگيالىق تۇرعىدا ەسكىرگەن كوشەلەر قۇدايبەرگەن سۇراعانوۆ, ءاليحان بوكەيحان ۇلى, ەرمۇحان بەكماحانوۆ, ەدىگە بي, بۇقار جىراۋ, ساعادات نۇرماعامبەتوۆ, مالايسارى باتىر, بايان باتىر, شاكارىم قۇدايبەردى ۇلىنىڭ ەسىمدەرىمەن قايتا اتالسا, قالانىڭ شەت جاعىندا از عانا جەر ۇيلەردەن قامتىلعان كوشەلەرگە بەرىلگەن ءماشھۇر ءجۇسىپ, جۇسىپبەك ايماۋىتوۆ بابالارىمىزدىڭ ەسىمدەرى ورتالىقتاعى باستى كوشەلەرگە وزگەرتىلگەن. وسىلايشا, ەندى دەريباس, لەنين, كۋتۋزوۆ, سۋۆوروۆ, 1 ماي, ديميتروۆ, كارل ماركس, كيروۆ, كورولەنكو, ۆولودارسكي, كرۋپسكايا, چكالوۆ, پاحوموۆ, بەستۋجەۆ كوشەلەرى مۇراعات قۇجاتتارىندا عانا كەزدەسەتىن بولادى.
وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى مەدەت تاۋاسقاننىڭ مالىمەتىنشە, 2021 جىلدىڭ 3 ساۋىرىندە پاۆلودار قالاسىنىڭ 30 كوشەسىن قايتا اتاۋ بويىنشا كوپشىلىك تىڭداۋ وتكىزىلگەن. كوپشىلىك تىڭداۋداعى تالقىلاۋ كەزىندە ۇسىنىلعان 30 كوشەنىڭ 23-ءى جەرگىلىكتى تۇرعىندار تاراپىنان قولداۋ تاپقان.
– كوپشىلىك تىڭداۋدا قولداۋ تاپقان 23 كوشە 2021 جىلدىڭ 23 ساۋىرىندە رەسپۋبليكالىق ونوماستيكا كوميسسياسىنىڭ وتىرىسىندا قارالعان بولاتىن. وتىرىستا 17 كوشەنىڭ اتاۋىن وزگەرتۋ بويىنشا شەشىم قابىلداندى. بۇعان دەيىن ەسىمدەرى كوشەلەرگە بەرىلەتىن تۇلعالاردى تۇرعىندارعا ناسيحاتتاۋ جۇمىستارى كەڭ كولەمدە جۇرگىزىلدى (ماقالالار, پوستتار, قىسقا مەتراجدى فيلمدەر, كورمەلەر, بايقاۋلار, دوڭگەلەك ۇستەلدەر, تانىمدىق ساعاتتار, اكتسيالار, ونلاين دارىستەر, تەلەباعدارلامالار, سيۋجەتتەر, سۇحباتتار). بۇل كوشەلەر الداعى ۋاقىتتا وبلىستىق ءماسليحاتتىڭ سەسسياسىندا قارالىپ, وبلىس اكىمدىگى مەن ءماسليحاتتىڭ بىرلەسكەن شەشىمى نەگىزىندە قايتا اتالاتىن بولادى, – دەيدى م.تاۋاسقان.
وكىنىشكە قاراي, رەسپۋبليكالىق ونوماستيكا كوميسسياسى ەرماكوۆ, تەپلوۆ, تسيولكوۆسكي, نابەرەجنايا, مولودەجنايا, روزا ليۋكسەمبۋرگ كوشەلەرىن قايتا اتاۋ تۋرالى ۇسىنىستاردى قابىلداماپتى. ول شارۋا ۋاقىت ەنشىسىندە دەپ سەنەيىك. ايتپاقشى, رەسپۋبليكالىق ونوماستيكا كوميسسياسىندا قولداۋ تاپقان كوشەلەردى تولىقتاي وزگەرتۋ جۇمىستارى 2021 جىلى ۇلتتىق ساناق بويىنشا جاريالانعان موراتوريگە بايلانىستى جىل سوڭىنا دەيىن مۇمكىندىك بولماپتى. قازىرگى ۋاقىتتا اتالعان موراتوري الىنىپ, كوشەلەردى قايتا اتاۋ بويىنشا جۇمىستار ءوز جالعاسىن تابۋدا.
جاعىمدى جاڭالىقتى پاۆلودارلىقتار قۋانا قابىلداعانى راس. الەۋمەتتىك جەلىلەردە «ودان دا ماڭىزدى شارۋالار جەتكىلىكتى» دەپ كەرى تارتقاندار دا بار. قوعام بەلسەندىسى ەركەعالي جانعازى كوشە اتاۋلارىنىڭ قازاقشالانۋى جاڭا قازاقستانعا دەگەن نىق قادام ەكەنىن اتاپ ءوتتى.
– ماعىناسى ءھام قۇندىلىعى جوعالعان كوشە اتاۋلارىن وزگەرتۋ – ۋاقىت تالابى. ولاردىڭ قازاقشالانۋى جاستارعا دەگەن قامقورلىق, باياندى بولاشاققا دەگەن وڭ قادام دەپ ەسەپتەيمىن. ەسكى اتاۋلاردى قازاقشالاندىرۋمەن قاتار وبلىسقا ەڭبەگى سىڭگەن تۇلعالاردىڭ ەسىمىن بەرۋ دە ماڭىزدى. ءالى دە اتاۋى ەسكىرگەن كوشەلەر كوپ. پاندەميا سالدارىنان ءتيىستى جۇمىستار توقتاپ قالىپ, بيىل جالعاسىن تابۋدا. ماڭىزدى ءۇردىس توقتامايدى دەپ سەنەمىن. ەلىم, جەرىم دەگەن رۋحتى ازاماتتار ءاردايىم وسى شارۋانىڭ باسى-قاسىنان تابىلامىز, – دەيدى ە.جانعازى.
جۋىردا «Egemen Qazaqstan» بەتىندە كاۋكەن كەنجەتاەۆ جانە قازانعاپ بي تۋرالى ماقالالار جاريالانعان ەدى. وسىلايشا, ەل گازەتى پاۆلودار قالاسىنداعى جاڭا كوشەلەردى ناسيحاتتاۋعا تيتتەي دە بولسىن ۇلەس قوستى دەپ ايتۋعا نەگىز بار.
پاۆلودار وبلىسى
