«جىل باسىنان بەرى مەملەكەتتىك بيۋدجەتتىڭ شىعىستارى 98,5%-كە, رەسپۋبليكالىق بيۋدجەتتىڭ شىعىستارى – 99,1%-كە, جەرگىلىكتى بيۋدجەتتەردىڭ شىعىستارى 98,3%-كە اتقارىلدى. رەسپۋبليكالىق بيۋدجەت بويىنشا 6,9 ترلن تەڭگە سوماسىنا شىعىستار جۇرگىزىلدى. سونىمەن بىرگە بيۋدجەتتىڭ 65 ملرد تەڭگەسى اتقارىلماعان, ونىڭ ىشىندە 7 ملرد تەڭگە – ۇنەمدەلگەن, 58 ملرد تەڭگە يگەرىلمەي قالعان», دەدى قارجى ءمينيسترى ۇكىمەتتىڭ بۇگىنگى وتىرىسىندا.
يگەرىلمەۋدىڭ اناعۇرلىم ءىرى سومالارى توتەنشە جاعدايلار, ىشكى ىستەر, دەنساۋلىق ساقتاۋ, ەكولوگيا, گەولوگيا جانە تابيعي رەسۋرستار مينيسترلىكتەرىندە بايقالدى. يگەرىلمەۋدىڭ نەگىزگى سەبەپتەرى: كونكۋرستىق راسىمدەر مەن شارتتار جاساسۋ راسىمدەرىنىڭ ۇزاق جۇرگىزىلۋى, ورىندالعان جۇمىستار اكتىلەرىن, شوت-فاكتۋرالاردى ۋاقتىلى ۇسىنباۋ, تولەۋگە بەرىلەتىن شوتتاردىڭ كەش ۇسىنىلۋى.
جەرگىلىكتى بيۋدجەتتەردىڭ شىعىستارى 3,5 ترلن تەڭگەنى قۇرادى. 61 ملرد تەڭگە اتقارىلماي قالعان.
«بيىل وڭىرلەرگە 3,3 ترلن تەڭگە سوماسىندا نىسانالى ترانسفەرتتەر كوزدەلگەن. ولارعا 1 ماۋسىمعا 933 ملرد تەڭگە بولىنگەن. ونىڭ 98,2%-ءى يگەرىلگەن. 17 ملرد تەڭگە اتقارىلماي قالدى, ونىڭ ىشىندە 4 ملرد تەڭگە ۇنەمدەلسە, 13 ملرد تەڭگەسى يگەرىلمەگەن», دەدى ە. جاماۋباەۆ.
ەڭ كوپ يگەرىلمەگەن سوما نۇر-سۇلتان قالاسىندا, ماڭعىستاۋ, الماتى جانە قىزىلوردا وبلىستارىندا بايقالادى. ونىڭ نەگىزگى سەبەپتەرى - تولەمنىڭ نەگىزدىلىگىن راستايتىن قۇجاتتاردىڭ ۇسىنىلماۋى, جوبالىق-سمەتالىق قۇجاتتامانى تۇزەتۋ, ورىندالعان جۇمىس اكتىلەرىن ۋاقتىلى ۇسىنباۋ, كونكۋرستىق راسىمدەردىڭ ۇزاق جۇرگىزىلۋى, تولەۋگە بەرىلەتىن شوتتاردىڭ قازىناشىلىق ورگاندارىنا كەش ۇسىنىلۋى.
ايانا توعانبەك
