ەلىمىزدە ءسپيرتتى ىشىمدىكتەردىڭ ساتىلۋ ورىندارى مەن ساتۋ ۋاقىتى شەكتەلەدى

استانا. 23 ءساۋىر. قازاقستاندا ءسپيرتتى ىشىمدىكتەردىڭ ساتىلۋ ورىندارىن جانە ساتۋ ۋاقىتىن شەكتەۋ قاراستىرىلادى. بۇل تۋرالى پارلامەنت ماجىلىسىندە ايتىلعان پرەمەر-ءمينيسترىنىڭ ورىنباسارى-قارجى مينيستر باقىت سۇلتانوۆتىڭ سوزىنە سىلتەمە جاساعان egemen.kz ءتىلشىسى حابارلادى. اڭگىمە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەتيل ءسپيرتى مەن الكوگول ءونىمىنىڭ ءوندىرىلۋىن جانە اينالىمىن مەملەكەتتىك رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا قوزعالدى. وسى ماسەلەگە بايلانىستى بايانداما جاساعان ب.سۇلتانوۆتىڭ ايتۋىنشا, دۇنيەجۇزىلىك دەنساۋلىق ساقتاۋ ۇيىمى جۇرگىزگەن زەرتتەۋلەر ءسپيرتتى ىشىمدىكتەردى تۇتىنۋ جونىندەگى رەيتينگتە قازاقستان 188 ەلدىڭ اراسىندا 34-ورىندا تۇر. ءاربىر قازاقستاندىققا شاققاندا, تۇتىنۋ كورسەتكىشى جىلىنا ورتاشا ەسەپپەن 5,5 ليتر تازا ەتيل ءسپيرتى نەمەسە 11 ليتر اراقتان كەلەدى. وسىلايشا قازاقستان ورتالىق ازيا وڭىرىندە ەڭ كوپ ىشەتىن ەل رەتىندە ايگىلەنىپ وتىر. ءتىپتى, ەلباسىنىڭ ءوزى  ارنايى تاپسىرما دا بەرگەنى ءمالىم. وسىعان وراي كۇشتى الكوگول ونىمدەرىن ساتۋ  مەيرامحانالار, ءدامحانالار مەن بارلاردى قوسپاعاندا, جۇمىس جانە دەمالىس كۇندەرىنە بولىنبەستەن كەشكى ساعات 21-دەن باستاپ, كەلەسى كۇنگى 12-گە دەيىن ساتۋعا تىيىم سالىناتىن بولىپ شەشىلدى. نەگىزىنەن مۇنداي شەكتەۋ 30 گرادۋستان جوعارى سپيرتتىك ىشىمدىكتەرگە قاتىستى. ال كۇشتىلىگى تومەن الكوگول ونىمدەرىنە بۇرىنعىشا تۇنگى 23-تەن تاڭعى 8-گە دەيىن تىيىم سالىنا بەرەدى. ۆيتسە-پرەمەر سونداي-اق بازارلاردا, كوتەرمە ساۋدا ورىندارىندا, دۇڭگىرشەكتەردە جانە بەلگىلەنبەگەن ورىنداردا الكوگول ونىمدەرىن ساتۋعا رۇقسات ەتىلمەگەندىگىن دە قاپەرگە سالا كەتتى. بۇدان باسقا, دەنساۋلىق ساقتاۋ, ءبىلىم بەرۋ, بالالار مەكەمەلەرى, دەنە شىنىقتىرۋ-ساۋىقتىرۋ جانە سپورت عيماراتتارىندا الكوگول ونىمدەرىن ساتۋعا تىيىم سالىنعان. اسىرەسە, جانارماي قۇيۋ بەكەتتەرىندە سپريتتىك ىشىمدىكتەر ساتۋعا رۇقسات ەتىلمەيدى. بيزنەس سۋبەكتىلەرىن كونترافاكتىلىك جانە زاڭسىز الكوگول ونىمدەرىن ساتىپ الۋدان ساقتاندىرۋ ماقساتىندا ەسەپتىك-باقىلاۋ تاڭبالارىنىڭ  دۇرىستىعىن انىقتايتىن قۇرالداردى ەنگىزۋ زاڭدىق قۇجاتتا كورىنىس تاپقان. اسقار تۇراپباي ۇلى. دەرەككوز: egemen.kz. فوتو: www.inform.kz.