وبلىستىق توتەنشە جاعدايلار دەپارتامەنتىنىڭ مالىمەتىنشە, قايعىلى وقيعا وتكەن دەمالىس كۇندەرى قاراعاندى وبلىسىنىڭ وساكاروۆ اۋدانىندا بولعان. وسى اۋدانعا قاراستى ەسىل اۋىلىنان 1 شاقىرىم جەردە جەرگىلىكتى تۇرعىندار ەسىل وزەنىنە باتىپ كەتكەن 2001 جىلعى جىگىتتىڭ دەنەسىن سۋدان الىپ شىققان.
بۇل جەر شومىلۋعا ارنالماعانىن ايتا كەتۋ كەرەك. وسىعان وراي توتەنشە جاعدايلار دەپارتامەنتى شومىلۋ ماۋسىمىندا قايعىلى جاعدايلاردىڭ الدىن الۋ ءۇشىن بىرقاتار اقىل-كەڭەس ۇسىنادى.
«رۇقسات ەتىلگەن جەرلەردە عانا شومىلۋعا بولادى. ۇرلەمەلى قايىقپەن جاعادان الىس ءجۇزىپ كەتپەڭىز, ولاردا اقاۋ بولۋى مۇمكىن, ال بۇل ءتىپتى جاقسى جۇزە بىلەتىندەر ءۇشىن دە وتە قاۋىپتى. ءوتىپ بارا جاتقان كەمەلەرگە قاراي جۇزبەڭىز, جالپى بۋيكادان اسپاعان دۇرىس. داۋىلدى اۋا رايىندا نەمەسە قاتتى جەل سوعىپ تۇرعان جەرلەردە شومىلۋعا بولمايدى», دەپ ەسكەرتەدى قۇتقارۋشىلار.
ايانا توعانبەك
