جاس تۇلەكتەر ومىردە ءوز ورنىن تاۋىپ, بيىك اسۋلاردى باعىندىرۋدا ماماندىقتى تۋرا تاڭداۋى اسا ماڭىزدى.
وسى ورايدا, قازاق ۇلتتىق قىزدار پەداگوگيكالىق ۋنيۆەرسيتەتىندەگى بارلىق دەرلىك ماماندىقتاردىڭ قالىپتاسىپ, دامۋ كەزەڭدەرىن ۇلاعاتتى تۇلعالار قىزمەت جاساعان پاراساتتىڭ جادىگەرى, ۇستازداردىڭ دانالىعى مەن جاستاردىڭ جالىندى ىستەرىن, ءبىلىم مەن عىلىمعا دەگەن ىزدەنىسى مەن قۇشتارلىعىن بويىنا سىڭىرگەن, تاۋسىلماس ءبىلىم ورداسى دەپ تاني الامىز. قاسيەتتى قاراشاڭىراق تاريحىنىڭ ءاربىر كىرپىشى ونىڭ بەلگىلى عالىمدارى, پروفەسسور-وقىتۋشىلار قۇرامى, ءتىپتى ستۋدەنت جاستارىنىڭ شىعارماشىلىق تالماس كۇش-قايراتى مەن كۇندەلىكتى ەڭبەگىنىڭ ارقاسىندا قالانعان دەسەك, ارتىق ايتپاعان بولارمىز.
قازاقستاننىڭ بولاشاعى ءۇشىن ۇلاعاتتى ۇستازداردىڭ اتقاراتىن ەڭبەگى ۇلان-عايىر. ولاي بولسا, «ۇلاعاتتى ۇستاز» دەگەنىمىز كىم؟ ارينە, ول – اقىل-پاراساتى تولىسقان, ۇلگى-ونەگەسى ورنىققان, ءتالىم-تاربيەسى زور, ءوزىنىڭ قىزمەتتىك سالاسىندا ايانباي تەرىن توككەن, بولاشاق ۇرپاعىنا مول مۇرا قالدىرعان تۇلعا. سونداي ۇلاعات ۇكىلەگەن مەكەننىڭ بىرەگەيى, 60 جىلدىق تاريحى بار «مۋزىكالىق ءبىلىم» ماماندىعىنا جاس تۇلەكتەردى ات باسىن بۇرعاندارىن قالايمىز. ۇرپاقتار ساباقتاستىعى نەگىزىندە دامىپ كەلە جاتقان بۇل ماماندىقتىڭ ۇلگى-ونەگە تۇتاتىن ۇلى تۇلعالاردىڭ, سونىمەن قاتار شىعارماشىلىقتىڭ شىڭىندا وزىندىك ورنى بار ونەرپازداردىڭ – وسى ماماندىق تۇلەكتەرىنىڭ ومىرلىك ۇستانىمدارى وعان دالەل بولماق.
«مۋزىكالىق ءبىلىم» ماماندىعىنىڭ ۋنيۆەرسيتەت قابىرعاسىندا قالىپتاسىپ, دامۋىنا بىردەن ءبىر سەبەپكەر كومپوزيتور باقىتجان بايقاداموۆ بولاتىن. سونىمەن قاتار ماماندىقتىڭ باستاۋىندا جۇرگەن, ەسىمدەرى ەلگە تانىمال عالىمدار مەن كومپوزيتورلار
ءو.بايدىلداەۆ, تەن چۋ, ك.وشلاكوۆ جانە تاعى دا باسقالار مۋزىكالىق كوركەم شىعارمالارىمەن بەلگىلى بولسا, عالىم-مۋزىكانتتار م.بالتاباەۆ, ر.جاردەماليەۆا, ق.مەڭداياقوۆا, ش.قۇلمانوۆا, ت.قوڭىراتبايدىڭ ىرگەلى ىزدەنىستەرى, مۋزىكانى وقىتۋدىڭ تەورياسى مەن ادىستەمەسىنىڭ عىلىمي تۇرعىدان نەگىزدەلگەن تۇجىرىمدامالارى, مۋزىكا تاريحىنىڭ كەزەڭدەرىنە باعىتتالعان زەرتتەۋلەرى رەسپۋبليكا كولەمىندە كەڭىنەن قولدانىلۋدا.
قازاقستانداعى مۋزىكالىق ءبىلىم بەرۋ ماسەلەلەرىن زەرتتەيتىن ەڭ العاشقى عىلىمي مەكتەپ (80-ءشى جىلدارى) ءبىزدىڭ قازاق قىزدار پەداگوگيكالىق ينستيتۋتىنىڭ نەگىزىندە پەداگوگيكا عىلىمدارىنىڭ دوكتورى, حالىقارالىق عىلىم اكادەمياسىنىڭ اكادەميگى, پروفەسسور ريتتا دجەرديماليەۆانىڭ باستاۋىمەن قالىپتاسقان. بىرنەشە عىلىم كانديداتتارىن دايارلاعان, تۇلعالى عالىم, پروفەسسور ريتتا رامازانقىزىنىڭ اينالاسىنا شوعىرلانعان, رەسپۋبليكامىزدىڭ تۇكپىر-تۇكپىرىنەن كەلگەن زەرتتەۋشىلەر قاۋىمداستىعىنىڭ ىرگەلى ىزدەنىستەرى, ادىستەمەلىك جۇمىستارى عىلىمي تالداۋدىڭ تەرەڭدىگىمەن, پروبلەمالىق كوزقاراسىمەن, جاڭالىعىمەن جانە قورىتىندىلارىنىڭ سالماقتىلىعىمەن ەرەكشەلەنەدى.
جالپى, عىلىمي مەكتەپتەر زەرتتەۋ سالاسى رەتىندە ءار ۋاقىتتا باستى فۋنكتسيانى اتقاردى, ياعني باعدارلامالاردى انىقتاۋدا ءبىراۋىزدى بولعان عالىمداردان تۇراتىن ء«بىلىم ەستافەتالارى», عىلىمي كادرلاردى دايارلاۋ, عىلىمي قوعامداستىقتىڭ قىزمەتىنە ىقپال ەتەتىن بولاشاق عالىمداردىڭ ورتالىعى دەپ تانىلادى.
رەسپۋبليكا دەڭگەيىندەگى جالپى ءبىلىم بەرەتىن مەكتەپتەرگە ارنالعان «مۋزىكا» باعدارلامالارى مەن وقۋ-ادىستەمەلىك كەشەندەرىنىڭ ەكى بىردەي اۆتورلارى, پروفەسسور ش.قۇلمانوۆا, م.ورازاليەۆا ءوزىمىزدىڭ كافەدرامىزدىڭ بەلدى مۇشەلەرى ەكەنىن ۇلكەن ماقتانىشپەن ايتا الامىز.
«مۋزىكالىق ءبىلىم» ماماندىعى – سارقىلماس رۋحاني قازىنا. قازاق اندەرى تاريحىنىڭ شىعارماشىلىق مۇرالارىن زەردەلەۋ, ناسيحاتتاۋ, مۋزىكالىق اسپاپتاردى مەڭگەرۋ, ءاندى ناقىشىنا كەلتىرىپ ورىنداۋ – ماماندىقتىڭ باستى ماسەلەلەر قاتارىندا قاراستىرىلادى. مۋزىكالىق تۋىندىلاردىڭ ادام تاربيەسىندەگى ماڭىزى مەن ءمانىن انىق كورسەتۋ, جەكە ادامنىڭ قاسيەتى, ونىڭ جان دۇنيەسىنىڭ تازالىعى, مادەنيەتى, ونەرى, تالعامى, قاجەتتىلىگى, ماقسات-مۇددەسى دەپ تاني الامىز. ولاي بولسا, ءوزىمىزدىڭ ۋنيۆەرسيتەتىمىزدىڭ تۇلەكتەرى, وسى كيەلى مەكەمەدە قىزمەت ەتكەن ءان ونەرىندەگى ۇلگى تۇتارلىق تۇلعالار دا ءبىرشاما, اتاپ ايتقاندا اعايشا (اگيما) يساعۇلوۆا, گالينا قارامولداەۆا, ءمادينا ەراليەۆا جانە جاس انشىلەرىمىز ۇلجان ايناقۇلوۆا, الما امانجولوۆا, دينا حامزينا, تامارا اسار, گۇلنۇر ورازىمبەتوۆا, مارجان اراپباەۆا, گۇلنۇر ومىرباەۆا جانە ت.ب.
قازىردە «مۋزىكالىق ءبىلىم» ماماندىعى حالىقارالىق ىنتىماقتاستىق اياسىندا شەتەلدىك جوعارى وقۋ ورنىمەن, اتاپ ايتقاندا نيدە ومەر حاليسدەمير ۋنيۆەرسيتەتىمەن (تۇركيا) بىرلەسكەن اكادەميالىق ۇتقىرلىق باعدارلاماسىن قۇراستىرىپ, كەلىسىمشارت ورناتتى. اكادەميالىق ۇتقىرلىق نەگىزىندە ستۋدەنت بەلگىلى ءبىر اكادەميالىق كەزەڭگە, ماسەلەن سەمەسترگە نەمەسە وقۋ جىلىنا, سول جوعارى وقۋ ورنىنا وقۋعا اۋىستىرىلىپ, ءبىلىم بەرۋ مەكەمەسىندە باعا جەتپەس تاجىريبە الماسا الادى, كاسىبي ءبىلىم مەن پراكتيكالىق داعدىلارىن مەڭگەرەدى. سايكەسىنشە, ءبىلىم بەرۋدە يننوۆاتسيالىق تەحنولوگيالار, جاڭارتىلعان ءبىلىم بەرۋ باعدارلامالارى نەگىزىندەگى اقپاراتتىق-كوممۋنيكاتيۆتىك تەحنولوگيالار كەڭىنەن قولدانىلۋدا.
ولاي بولسا, «وتكەنگە – سالاۋات, ءبىلىم, مادەنيەت پەن ءداستۇر-مۇرا, بولاشاققا – امانات» دەگەندەي, تاريحى تەرەڭدە جاتقان «مۋزىكالىق ءبىلىم» ماماندىعى كيەلى شاڭىراعىنان, تانىمال, ۇلاعات ۇكىلەگەن ۇستازداردان ءبىلىم-تاربيە العان ءاربىر ستۋدەنت مەملەكەتىمىزدىڭ, ەلىمىزدىڭ ماقتان تۇتار بولاشاعى بولادى دەپ سەندىرە وتىرىپ, جاس تۇلەكتەردى اسىعا كۇتەمىز!
مايرا سۇلتانوۆا,
قازاق ۇلتتىق قىزدار پەداگوگيكالىق ۋنيۆەرسيتەتى
الەۋمەتتىك-گۋمانيتارلىق عىلىمدار جانە ونەر ينستيتۋتى «مۋزىكا» كافەدراسىنىڭ دوتسەنتى
