ۇستا-باسپاق تسەحىنداعى №9 تەرميالىق پەشتىڭ وتقا ءتوزىمدى كىرپىشپەن قالانعان قابىرعاسىن بۇزۋ كەزىندە, ىستەمەي تۇرعان نىساننىڭ توبەسى قۇلاپ, سول جەردە جۇمىس ىستەپ جۇرگەن بەس ادامدى باسىپ قالعان. باقىتسىز وقيعانىڭ سالدارىنان سول جەردە ءتورت جۇمىسشى كوز جۇمىپ, بىرەۋى اۋرۋحاناعا جەتكىزىلدى. دارىگەرلەر بەرگەن سوڭعى اقپاراتقا قاراعاندا, جۇمىسشىنىڭ دەنساۋلىق جاعدايى تۇزەلىپ كەلە جاتقانعا ۇقسايدى.
اپاتتى وقيعا تۋرالى اقپارات جاريا بولىسىمەن, وقيعا ورنىنا قاراعاندى وبلىسىنىڭ اكىمى جەڭىس قاسىمبەك, توتەنشە جاعداي دەپارتامەنتى جانە ونەركاسىپتىك قاۋىپسىزدىك مەكەمەلەرىنىڭ باسشىلارى جەدەل تۇردە جەتتى. قۇرامىندا 27 قىزمەتكەر مەن جەتى بىرلىك تەحنيكاسى بار تجد قۇتقارۋشى توبى جانە «سەرىكتەس ءورت ءسوندىرۋشى» جشس-ءنىڭ ون قىزمەتكەرى ۇيىندىلەردى ارشىپ, جۇمىسقا قىزۋ كىرىسىپ كەتتى.
ەڭبەك كودەكسىنىڭ تالاپتارىنا سايكەس, ەڭبەك جونىندەگى ۋاكىلەتتى ورگاننىڭ وكىمىمەن كوميسسيا قۇرىلىپ, قازىرگى ۋاقىتتا جازاتايىم وقيعانىڭ سەبەپ-سالدارىن انىقتاۋ ماقساتىندا ارنايى تەكسەرۋ جۇرگىزىلىپ جاتىر.
توتەنشە وقيعادان حاباردار بولعان پرەزيدەنت قاسىم-جومارت توقاەۆ قازا بولعان جۇمىسشىلاردىڭ جاقىندارى مەن تۋىستارىنا كوڭىل ايتۋ جەدەلحاتىن جولدادى.
«ارسەلورميتتال تەمىرتاۋ» اكتسيونەرلىك قوعامىنىڭ تسەحىندا بولعان اپات سالدارىنان قازاعا ۇشىراعان جۇمىسشىلاردىڭ وتباسىلارى مەن تۋعان-تۋىستارىنىڭ قايعىسىنا ورتاقتاسىپ كوڭىل ايتامىن. زارداپ شەككەن ازاماتتاردىڭ تەزىرەك ساۋىعىپ كەتۋىن تىلەيمىن. ۇكىمەتكە جانە قاراعاندى وبلىسىنىڭ اكىمىنە قايعىلى وقيعانىڭ سەبەپتەرى مەن ءمان-جايىن انىقتاۋ ءۇشىن شۇعىل شارالار قابىلداۋدى جانە قازا تاپقاندار مەن زارداپ شەككەندەردىڭ وتباسىلارىنا كومەك كورسەتۋدى تاپسىردىم», دەپ جازىلعان مەملەكەت باسشىسىنىڭ جەدەلحاتىندا.
قاراعاندى وبلىسىنىڭ بۇرىنعى اكىمى, پارلامەنت ءماجىلىسىنىڭ توراعاسى ەرلان قوشانوۆ تا جازاتايىم وقيعا تۋرالى پىكىر ءبىلدىرىپ, ونى «وتە اۋىر سىناق» دەپ اتادى. سونداي-اق ول جاعدايدىڭ «پرەزيدەنتتىڭ باقىلاۋىندا» ەكەنىن دە ءمالىم ەتتى.
بۇدان بولەك ءوڭىر باسشىسى جەڭىس قاسىمبەك تە قازا تاپقان جۇمىسشىلاردىڭ وتباسى مەن تۋعان-تۋىستارىنا كوڭىل ايتىپ, قارا جامىلعان شاڭىراقتارعا قاجەت بولعان كومەكتىڭ ءبارى جاسالاتىنىن جانە اپاتقا كىنالى ادامداردىڭ جاۋاپقا مىندەتتى تۇردە تارتىلاتىنىن ءمالىم ەتتى.
قازا بولعان ءتورت جۇمىسشىنىڭ ەكەۋى وزبەكستاننان كەلىپ, ازاماتتىق العان قانداستار ەكەن. بۇل تۋرالى دۇنيەجۇزىلىك قازاقتار قاۋىمداستىعى قاراعاندى وبلىستىق فيليالىنىڭ باسشىسى مەرۋەش باشاي حابارلادى. «ەكى ازاماتتىڭ دا اتا-اناسى وزبەكستاندا تۇرادى. ولاردىڭ قازاقستانعا كەلىپ-قايتۋىنا وزبەكستان ەلشىلىگى دە بارىنشا كومەك كورسەتىپ جاتىر», دەپ حابارلادى م.باشاي.
بۇدان بولەك, اپاتتى وقيعا ءمالىم بولعاننان كەيىن, «ارسەلورميتتال تەمىرتاۋ» كومپانياسىنىڭ قاڭىلتىر قاقتاۋ تسەحىندا ون جىلدان استام ۋاقىت جۇمىس ىستەگەن ەركەبۇلان سابيتوۆ ەسىمدى ازامات ءوزىنىڭ فەيسبۋك پاراقشاسىندا اشۋ-ىزاعا تولى جازبا قالدىردى. وندا ول الپاۋىت كاسىپورىندا جىلدان-جىلعا كىسى ولىمىمەن اياقتالاتىن اپاتتاردىڭ جيىلەپ كەتكەنىن ايتا كەلىپ, بىلاي دەپ جازادى: «قازىرگى تاڭدا بارلىق تەحنولوگيا ەسكىرگەن, ادام كۇشىنىڭ ارقاسىندا عانا تۇر. زاۋىتقا ادام المايدى, كادر تاپشى. ديپلومىڭ بولا تۇرا جۇمىسقا تۇرۋ – قيامەت-قايىم. بارلىق عيماراتتاردىڭ, قۇبىرلار مەن جابدىقتاردىڭ ابدەن توزىعى جەتكەن. باسشىلار قاراجات قۇيۋعا ق ۇلىقسىز. اقشا سالعاننىڭ وزىندە, ونى وندىرىسكە جاۋاپتى باسشىلار تالان-تاراج قىلادى. ءبىر سوزبەن ايتقاندا, باسشىلاردىڭ ءبارى «شاباداننىڭ» ۇستىندە وتىر. بۇل جاعدايعا تىكەلەي وسى باسشىلار كىنالى. سەبەبى جەمقورلىق جايلاعان, ازىن-اۋلاق بولىنگەن قاراجات دىتتەگەن جەرىنە جەتپەيدى...».
الپاۋىت كاسىپورىن ءۇشىن ادام ءومىرىنىڭ سونشالىقتى ارزانداپ كەتكەنى الاڭداتادى. بۇل جايىندا بۇعان دەيىن دە تالاي ايتىلعان, بىراق بۇدان ءتيىستى قورىتىندى شىعار ەمەس. تەگى «ارسەلورميتتال تەمىرتاۋ» كومپانياسىنداعى ەڭبەك قاۋىپسىزدىگىنىڭ ماسەلەسىن مايشاممەن قاراپ, تاعدىرشەشتى قاتاڭ شەشىمدەر قابىلدامايىنشا ادام ولىمىمەن اياقتالاتىن وقيعالاردىڭ لەگى تاۋسىلمايتىن ءتارىزدى.
قاراعاندى وبلىسى
