كوكپار باسەكەسىنە 6 كوماندا قاتىستى. بۇل جولعى دوداعا وڭىردەگى ات سپورتى جاقسى دامىعان ماي, اقتوعاي اۋداندارى مەن ەكىباستۇز قالاسىنان بولەك, اققۋلى اۋدانى مەن اقسۋ قالاسى دا سپورتشىلارىن ۇكىلەپ قوسقان ەكەن.
– ماقساتىمىز – وڭىردەگى ۇلتتىق ويىنداردىڭ دامۋىنا ۇلەس قوسۋ. ايماقتا ات سپورتىنا قىزىعاتىن جاستار كوپ. ولاردى ىنتالاندىرۋ ءۇشىن وسىنداي جارىستار وتكىزگەن دۇرىس دەپ ويلايمىن. سول سەبەپتى وسىمەن ەكىنشى جىل قاتارىنان كوكپار باسەكەسىن ۇيىمداستىردىق, – دەيدى پاۆلودار قالالىق «اقمەشىت» مەشىتىنىڭ باس يمامى ابىلقايىر قىلىشەۆ.
تاقىمدى جىگىتتەردىڭ دوداسى تارتىستى ءوتتى. بۇعان دەيىنگى جارىستارداعى نەگىزگى باسەكە ماي, اقتوعاي جانە ەكىباستۇز كوكپارشىلارىنىڭ اراسىندا وتەتىن. بۇل جولى اققۋلىلىق جانە اقسۋلىق سپورتشىلاردىڭ دا تاجىريبەلى قارسىلاستارعا توتەپ بەرەر قارقىنعا يە ەكەنىن بايقادىق.
جارىس قورىتىندىسى بويىنشا ءبىرىنشى ورىندى ماي اۋدانىنىڭ كوكپارشىلارى يەلەندى. ولار فينالدا اقسۋلىق كوكپارشىلاردان ايلاسىن اسىردى. ءۇشىنشى ورىن ەكىباستۇزدىقتارعا بۇيىردى. ولار اققۋلى اۋدانىنىڭ سپورتشىلارىن قاپىدا قالدىردى.
دودا بارىسىندا ەرەكشە كوزگە تۇسكەن اقتوعايلىق سەرىكبولسىن قازىكەن, ماي اۋدانىنىڭ وكىلى اسپانديار قايروللا سىندى جىگىتتەر كوپشىلىكتىڭ قوشەمەتىنە يە بولدى.
پاۆلودار
