كەزدەسۋ بارىسىندا ءاليحان سمايىلوۆ پەن ەقدب پرەزيدەنتى وديل رەنو-باسسو حانىم دەكاربونيزاتسيالاۋ جانە قازاقستان ەكونوميكاسىن ءارتاراپتاندىرۋ, سونداي-اق بانك سەكتورى مەن كولىك-لوگيستيكا سالاسىن دامىتۋ بويىنشا ەكىجاقتى ءوزارا ءىس-قيمىلدىڭ كەڭ اۋقىمدى ماسەلەلەرىن ورتاعا سالدى.
تاراپتار 30 جىلدىڭ ىشىندە قارجى, ينفراقۇرىلىم, شوب, اگروونەركاسىپتىك كەشەن جانە تسيفرلاندىرۋ سياقتى باسىم سالالاردا قۇنى $11 ملرد بولاتىن 300-گە جۋىق جوبا ىسكە اسىرىلعانىن ايتتى.
«ەكونوميكالىق جانە تەحنولوگيالىق ساياسات جونىندەگى ءتيىمدى ۇسىنىمدار مەن قارجى رەسۋرستارىنا قولجەتىمدىلىك تۇرعىسىنان ەقدب-نىڭ قازاقستان ەكونوميكاسىن قولداۋ جونىندەگى تۇراقتى كۇش-جىگەرى ءبىزدىڭ ورنىقتى دامۋىمىزعا سەرپىن بەرىپ كەلەدى. ءوزارا ءتيىمدى ىنتىماقتاستىقتىڭ ءارى قاراي دا جالعاساتىنىنا ۇمىتتەنەمىز», دەدى ءاليحان سمايىلوۆ.
ءوز كەزەگىندە وديل رەنو-باسسو ەقدب اتالعان سەكتورلاردا قازاقستانمەن بىرلەسكەن جوبالاردى ىسكە اسىرۋدا زور الەۋەت بارىن اتاپ ءوتتى.
قازىر بانك دەكاربونيزاتسيالاۋعا, جاسىل تەحنولوگيالار مەن جاڭارتىلاتىن ەنەرگيا كوزدەرىن دامىتۋعا سالىناتىن ينۆەستيتسيالار ۇلەسىن ۇلعايتىپ جاتىر, بولاشاقتا قازاقستان دا بۇعان مۇددەلى بولۋى مۇمكىن.
Glencore كومپانياسىنىڭ باس ديرەكتورى گەري نەيگلمەن كەزدەسۋ اياسىندا قازاقستاندا جاڭا جوبالاردى جۇزەگە اسىرۋ پەرسپەكتيۆالارى تالقىلاندى.
قازاقستان Glencore سياقتى ستراتەگيالىق سەرىكتەستەرمەن ۇزاق مەرزىمدى ىنتىماقتاستىقتى ودان ءارى تەرەڭدەتۋگە دايىن.
«كومپانيا قازاقستاننىڭ تاۋ-كەن ءوندىرۋ سالاسىندا ماڭىزدى ءرول اتقارادى. ءبىز سەرىكتەستىكتى جالعاستىرۋعا جانە ءوزارا ىس–قيمىلدىڭ جاڭا باعىتتارىن دامىتۋعا نيەتتىمىز», دەدى ءاليحان سمايىلوۆ.
Philip Morris International كومپانياسىنىڭ شىعىس ەۋروپا بويىنشا پرەزيدەنتى ماركو ماريوتتيمەن كەزدەسۋ بارىسىندا قر پرەمەر-ءمينيسترى كومپانيانىڭ قازاقستاننىڭ قولايلى ينۆەستيتسيالىق ءيميدجىن نىعايتۋعا ەلەۋلى ۇلەس قوسقانىن اتاپ ءوتتى.
