جەرگىلىكتى تۇرعىن اقشا تابۋ جولىندا ەكى ازاماتقا وقۋعا بارماي جوعارعى وقۋ ورنىنىڭ وقۋىن وقىعانى تۋرالى ديپلوم قۇجاتىن الىپ بەرۋگە جانە وقۋ كەزەڭىندە بولاتىن ەمتيحانداردى تاپسىرماي وتۋىنە كومەكتەسە الاتىنىن ايتىپ, سەنىمدەرىنە كىرگەن. وسىلايشا جاستاردان 100 مىڭ تەڭگە جانە 70 مىڭ تەڭگە قولما-قول العان.
كەيىننەن وقۋ جىلدارى ارالىعىندا ەمتيحانداردان ءوتۋ ءۇشىن جابىرلەنۋشىلەردەن ءبولىپ-ءبولىپ, ارقايسىسىنان 800 مىڭ تەڭگەدەن الىپ, باس پايداسىنا جاراتقان.
بىلىكتى مامانداردان قۇرىلعان ءتارتىپ ساقشىلارى شۇعىل-ىزدەستىرۋ جۇمىستارىن جۇرگىزىپ, كۋاگەرلەردەن جاۋاپ الىپ, اقشا اۋدارىمدارى تەكسەرىلدى. ناتيجەسىندە, جەدەل ۋاكىلدەر وقۋ ورنىنىڭ بۇرىنعى قىزمەتكەرى بولعان كۇدىكتىنى انىقتاپ, ۇستادى. ول ءوز ءىسىن تولىعىمەن مويىندادى.
قىلمىستىق ءىس دالەلدەنىپ, قر قك-ءنىڭ 190-بابى 3-بولىگىنىڭ 3-تارماعىندا (ەكى نەمەسە ودان دا كوپ ادامعا قاتىستى جاسالعان الاياقتىق) كورسەتىلگەن قىلمىستىق قۇقىق بۇزۋشىلىقتى جاساعانى ءۇشىن كىنالى دەپ تانىلىپ, سوت ۇكىمىمەن ءۇش جىل مەرزىمگە باس بوستاندىعىن شەكتەۋ جازاسى تاعايىندالدى.
