سقو قارجى باسقارماسىنىڭ مالىمەتىنشە, بىلتىر ءبىلىم بەرۋ ساپاسىن ارتتىرۋ ماقساتىندا 3,6 ملرد تەڭگە مەكتەپ-كوللەدجدەردى كۇردەلى جوندەۋگە جۇمسالدى. ال ماتەريالدىق-تەحنيكالىق بازاسىن نىعايتۋعا 3,7 ملرد تەڭگە ءبولىندى. ناتيجەسىندە مەكتەپ وقۋشىلارىن تاسۋ ءۇشىن 16 كولىك ساتىپ الىنعان. ءبىلىم بەرۋ نىساندارىنىڭ قازاندىقتارى جوندەلىپ, جيھاز بەن سپورتقا قاجەت قۇرال-جابدىقتار جانە كىتاپتار الىندى.
ء«بىلىم بەرۋ سالاسىنداعى اۋقىمدى جوبالاردىڭ ءبىرى – م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ جاڭا عىلىمي-زەرتحانالىق كەشەنى. ونىڭ قۇرىلىسى بيىل تامىز ايىندا اياقتالادى دەپ جوسپارلاپ وتىرمىز. 18 700 شارشى مەتردى الىپ جاتقان نىساندا 73 زاماناۋي زەرتحانا جۇمىس ىستەمەك. بۇل جەردە ينجينەريا جانە تسيفرلىق تەحنولوگيالار, كولىك جانە ماشينا جاساۋ, ەنەرگەتيكا جانە راديوتەحنيكا, ازىق-ت ۇلىك قاۋىپسىزدىگى, ورمان شارۋاشىلىعى اگرونومياسى مەن مەديتسينا ماماندىقتارى بويىنشا ستۋدەنتتەر بىلىمدەرىن جەتىلدىرەدى», دەيدى وبلىستىق قارجى باسقارماسىنىڭ باسشىسى ناتاليا دىشكانت.
بىلتىر وڭىردەگى ءۇش اۋىسىمدا وقۋ ماسەلەسىن شەشۋ ءۇشىن پەتروپاۆلدا 900 ورىندىق مەكتەپ پايدالانۋعا بەرىلدى. تايىنشا قالاسىندا 600 ورىندىق جانە تايىنشا اۋدانى ۆيشنەۆكا ەلدى مەكەنىندە 120 ورىندىق ەكى مەكتەپتىڭ قۇرىلىسى باستالدى. ءبىلىم وردالارىنىڭ قۇرىلىسىنا 324,9 ملن تەڭگە جۇمسالدى. ال پەتروپاۆلدا ستۋدەنتتەرگە ارنالعان 244 ورىندىق جاتاقحانا سالىنىپ جاتىر.
سقو ءبىلىم باسقارماسىنىڭ مالىمەتىنشە, بيىل ءبىلىم سالاسىنا 114 ملرد تەڭگە بولىنگەن. بۇل وبلىس بيۋدجەتىنىڭ 35 %-ى. سونىڭ ىشىندە 2 ملرد تەڭگەگە 21 ءبىلىم بەرۋ نىسانى كۇردەلى جوندەلەدى. ال 83 مەكتەپ جاڭعىرتىلماقشى, ياعني, پاندىك كابينەتتەر, جيھاز ساتىپ الىنادى, اسحانالار مەن كىتاپحانالار جوندەلەدى.
ايانا توعانبەك
