ەل پرەزيدەنتىنىڭ 2022 جىلعى 3 مامىرداعى №887 جارلىعىنا سايكەس الماتى وبلىسىنىڭ قۇرامىنان جەتىسۋ وبلىسى ءبولىنىپ شىقتى. وسىعان بايلانىستى الماتى وبلىستىق ءماسليحاتى دا الماتى جانە جەتىسۋ وبلىستارىنىڭ ءماسليحاتتارى بولىپ ەكىگە ءبولىندى. وبلىستىق ءماسليحات بۇعان دەيىن 45 دەپۋتاتتىق ماندات بويىنشا ءوز وكىلەتتىلىگىن جۇزەگە اسىرىپ كەلگەن بولسا, ەندى قۇزىرلى ورگان Amanat پارتياسى, قازاقستاننىڭ حالىق پارتياسى جانە «اۋىل» پارتياسىنان قۇرالعان دەپۋتتىق فراكتسيالاردىڭ كەلىسىمىمەن جانە سايلاۋشىلار سانىن ەسكەرە وتىرىپ, قايتا جاساقتالدى. ياعني ەندى الماتى وبلىسىنىڭ ءماسليحاتىندا 26 دەپۋتات, جەتىسۋ وبلىسىنىڭ ءماسليحاتىندا 19 دەپۋتات بولادى.
ءماسليحات سەسسياسىنىڭ جۇمىسىن تۇيىندەگەن وبلىس اكىمىنىڭ مىندەتىن اتقارۋشى ءلاززات تۇرلاشوۆ بۇل جيىندى تاريحي وقيعا دەپ اتاپ ءوتتى. ول قوس وبلىستىڭ دەپۋتاتتارىن قۇتتىقتاپ, ەل يگىلىگى جولىنداعى ەڭبەكتەرىنە ساتتىلىك تىلەدى.
ال ءسال ۇزىلىستەن كەيىن جەتىسۋ وبلىستىق ءماسليحاتىنىڭ العاشقى سەسسياسى دا ءوتتى. جيىندا ارىپتەستەرنىڭ قولداۋىنا يە بولعان دەپۋتات گۇلنار تويلىباەۆا جاڭا وبلىس ءماسليحاتىنىڭ حاتشىسى بولىپ سايلاندى. ول بۇعان دەيىن Amanat پارتياسىنىڭ الماتى وبلىستىق فيليالىنىڭ اتقارۋشى حاتشىسى قىزمەتىن اتقارعان بولاتىن. دەپۋتاتتار كورپۋسى گ.تويلىباەۆانىڭ كانديداتۋراسىنا ءبىراۋىزدان داۋىس بەردى. سونداي-اق, العاشقى سەسسيا بارىسىندا دەپۋتاتتار جەتىسۋ وبلىسى ءماسليحاتىنىڭ تۇراقتى كوميسسيالارىن قۇرۋ, ولاردىڭ قۇرامىن بەكىتۋ, سول سياقتى ءماسليحات اپپاراتىنىڭ رەگلامەنتىن, قۇرىلىمىن جانە شتات كەستەسىن بەكىتۋگە قاتىستى بىرقاتار ماسەلەنى تالقىلادى.
الماتى وبلىسى
