وتىرىستى اشقان ءماجىلىس توراعاسى ەرلان قوشانوۆ دەپۋتاتتاردى قازاقستاننىڭ جاڭارتىلعان كونستيتۋتسياسىمەن قۇتتىقتادى.
– 5 ماۋسىمدا وتكەن رەفەرەندۋمنىڭ قورىتىندىسى قازاقستاندىقتاردىڭ باسىم كوپشىلىگى پرەزيدەنتتىڭ ساياسي جاڭعىرۋ باعىتىنداعى باعدارلاماسىن قولدايتىنىن كورسەتتى. بىرلىك پەن سەنىم – جاڭا قازاقستاننىڭ نەگىزگى تىرەگى. حالقىمىزدا ەرتەڭگە دەگەن سەنىم, اۋىزبىرلىك, تاتۋلىق پەن تۇراقتىلىق بار. ەندىگى كەزەكتە پرەزيدەنتىمىزدىڭ ماڭايىنا توپتاسىپ, وسى سەنىم مەن ىنتىماقتى ەسەلەي تۇسۋگە ءتيىسپىز. مەملەكەت باسشىسىنىڭ سەنىمىن اقتاپ, ساياسي وزگەرىستەردى زاڭنامالىق تۇرعىدا ساپالى ءارى جەدەل ىسكە اسىرۋىمىز قاجەت, – دەدى پالاتا سپيكەرى.
جالپى وتىرىستا پالاتانىڭ ەكونوميكالىق رەفورما جانە وڭىرلىك دامۋ كوميتەتى مەملەكەت باسشىسىنىڭ جەكەلەگەن تاپسىرمالارىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن جۇمىسقا الدى. سونىمەن قاتار جيىندا دەپۋتاتتاردىڭ باستاماسىمەن ازىرلەنگەن قىلمىستىق جولمەن الىنعان كىرىستەردى زاڭداستىرۋ جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ جانە اكىمشىلىك قۇقىق بۇزۋشىلىق تۋرالى كودەكسكە جوعارىدا اتالعان تۇزەتۋلەردى ەنگىزۋ تۋرالى زاڭ جوبالارى ماقۇلداندى.
بۇل قۇجاتتار زاڭنامانى جانە قىلمىستىق جولمەن الىنعان كىرىستەردى زاڭداستىرۋعا جانە تەرروريزمدى قارجىلاندىرۋعا قارسى ءىس-قيمىلدىڭ ۇلتتىق جۇيەسىن جەتىلدىرۋ ماقساتىمەن ازىرلەنگەن.
– بيىل قازاقستان قىلمىستىق جولمەن الىنعان كىرىستەردى زاڭداستىرۋعا جانە تەرروريزمدى قارجىلاندىرۋعا قارسى كۇرەس جونىندەگى ەۋرازيالىق توپتىڭ ءوزارا باعالاۋىنىڭ ەكىنشى كەزەڭىنەن ءوتۋى كەرەك. 2021 جىلدىڭ كۇزىندە اقشانى جىلىستاتۋعا قارسى كۇرەستىڭ قارجىلىق شارالارىن ازىرلەۋ توبى حالىقارالىق ستاندارتتارعا سايكەس نەگىزگى ۇسىنىستاردى ۇلتتىق زاڭناماعا ەنگىزۋ ماقساتىندا زاڭ جوباسىن ازىرلەۋگە باستاماشىلىق جاسادى, – دەدى ءماجىلىس دەپۋتاتى س.سيمونوۆ.
جالپى وتىرىستا قارجى نارىعى مەن قارجى ۇيىمدارىن مەملەكەتتىك رەتتەۋدى, باقىلاۋ مەن قاداعالاۋدى كۇشەيتۋ جانە قارجىلىق پيراميدالاردىڭ قىزمەتىنە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى جانە اكىمشىلىك قۇقىق بۇزۋشىلىق تۋرالى كودەكسكە وسى اتالعان تۇزەتۋلەردى ەنگىزۋ تۋرالى دەپۋتاتتاردىڭ باستاماسىمەن ازىرلەنگەن زاڭ جوبالارىن ءبىرىنشى وقىلىمدا ماقۇلداندى.
وسى زاڭ جوباسى بويىنشا بايانداما جاساعان ءماجىلىستىڭ قارجى جانە بيۋدجەت كوميتەتىنىڭ مۇشەسى يۋري لي زاڭنىڭ 217-بابىندا ەندى تانىمال تۇلعالار, سونىڭ ىشىندە انشىلەر مەن بلوگەرلەر, ۆاينەرلەر قارجىلىق ونىمگە قاتىستى جارناما جاريالار الدىندا وتە مۇقيات بولۋى كەرەكتىگى انىق جازىلعانىن اتاپ ءوتتى.
– بۇدان بىلاي قارجىلىق ونىمگە بايلانىستى جارناما جاساعاندارعا زاڭ اياسىندا قىلمىستىق جاۋاپكەرشىلىك كوزدەلەدى. ونىڭ ىشىندە 2000 اەك جانە 600 ساعاتتىق قوعامدىق جۇمىسقا تارتىلۋ, ءتىپتى 2 جىلعا دەيىن باس بوستاندىعىنان ايىرۋ قاراستىرىلعان. بىرلەسكەن توپتار ءۇشىن قىلمىستىق جازا 3-7 جىل ارالىعىندا بولۋى مۇمكىن. سونىمەن قاتار باپ سانكتسياسىنا قاراي م ۇلىكتى تاركىلەۋ دە كوزدەلگەن. بۇل – وتە قاتاڭ شارا, – دەدى يۋ.لي.
ءوز كەزەگىنە ءماجىلىس توراعاسى بۇل ماڭىزدى زاڭ جوباسىنا ءماجىلىس دەپۋتاتتارى باستاماشى بولعانىنا كەڭىنەن توقتالىپ, زاڭ جوبالارىنىڭ قارجى پيراميدالارىن قۇرعانى جانە ونى جارنامالاعانى ءۇشىن جاۋاپكەرشىلىكتى كۇشەيتۋگە باعىتتالعانىن ايتتى.
سونداي-اق جالپى وتىرىس بارىسىندا دەپۋتاتتار بىرقاتار زاڭ جوباسىن ەكىنشى وقىلىمدا ماقۇلداپ, سەناتتىڭ قاراۋىنا جىبەردى. جوعارى پالاتاعا جىبەرىلگەن قۇجاتتاردىڭ قاتارىندا – سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى سالىق كودەكسى, قۇقىق قورعاۋ قىزمەتىن وتكەرۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى جانە ۆولونتەرلىك قىزمەت, قايىرىمدىلىق, مەملەكەتتىك الەۋمەتتىك تاپسىرىس جانە ۇكىمەتتىك ەمەس ۇيىمدارعا ارنالعان گرانتتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوبالارى بار.
جالپى وتىرىستا دەپۋتاتتار ۇكىمەتتىڭ جانە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ 2021 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن قارادى.
وندا پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ, ەسەپ كوميتەتىنىڭ توراعاسى ناتاليا گودۋنوۆا بايانداما جاسادى.
قارجى ءمينيسترى ەرۇلان جاماۋباەۆتىڭ مالىمدەۋىنشە, ترانسفەرتتەردى ەسەپكە الماعاندا كىرىستەر بويىنشا جوسپار 156 ملرد تەڭگەگە اسىرا ورىندالعان.
– بيۋدجەتكە 7,4 ترلن تەڭگە ءتۇستى. سالىق تۇسىمدەرى 7,1 ترلن تەڭگەنى نەمەسە جوسپارعا قاراعاندا 102,1 پايىزدى قۇرادى. سالىق بويىنشا اسىرا ورىنداۋدىڭ نەگىزگى سوماسى كورپوراتيۆتىك تابىس سالىعىنا (225 ملرد تەڭگە), شيكى مۇنايعا ەكسپورتتىق كەدەن باجىنا (89 ملرد تەڭگە) جانە يمپورتقا قوسىلعان قۇن سالىعىنا (41 ملرد تەڭگە) تيەسىلى بولدى, – دەدى ە. جاماۋباەۆ.
پرەمەر-ءمينيستردىڭ ورىنباسارى – قارجى ءمينيسترىنىڭ ايتۋىنشا, ەكونوميكاداعى ىسكەرلىك بەلسەندىلىكتىڭ بىرتىندەپ جاندانۋى, سالىق ءارى كەدەندىك اكىمشىلەندىرۋدى جەتىلدىرۋ مەن تسيفرلاندىرۋ بويىنشا جۇرگىزىلىپ جاتقان جۇمىس سالىق تۇسىمدەرىن ۇلعايتۋدىڭ ماڭىزدى فاكتورلارىنىڭ ءبىرى بولىپ سانالادى.
وتىرىس بارىسىندا دەپۋتاتتار مينيسترلەرگە بىرقاتار سۇراق قويىپ, پىكىر الماستى.
