دەنساۋلىق ساقتاۋ مينيسترلىگىنىڭ قوعامدىق دەنساۋلىق ساقتاۋ ۇلتتىق ورتالىعى, «تەمەكى تۇتىنىنەن ازات قازاقستان ءۇشىن» ۇلتتىق كواليتسياسى مەن قىزىلوردا وبلىستىق دەنساۋلىق ساقتاۋ باسقارماسىنىڭ «وبلىستىق جاستار دەنساۋلىعى ورتالىعى» مەملەكەتتىك كوممۋنالدىق ورتالىعى وتكىزىپ وتىرعان ءىس-شارانىڭ ماقساتى – شىلىمقورلاردىڭ زياندى ادەتتەن باس تارتۋىنا سەپ بولىپ, تەمەكىنىڭ ادام اعزاسىنا زيانى جايلى, ونى ءوسىرۋ, ءوندىرۋ جانە تاراتۋ كەزىندە قورشاعان ورتاعا كەلتىرەتىن كەرى اسەرى تۋرالى حالىقتى كەڭىنەن حاباردار ەتۋ.
قالاداعى مادەنيەت جانە دەمالىس پاركىندە باستالعان جىلجىمالى كورمەنى تاماشالاۋعا جينالعاندار از بولمادى. شىلىمنىڭ اعزاعا زيانىن كورسەتەتىن قۋىرشاق ءسيۋدىڭ تاجىريبەسىنەن كەيىن جاستاردىڭ ءبىرازى بۇل ادەتتىڭ جامان ەكەنىن تۇسىنگەندەي. جالپى, ورتالىقتاعى سيمۋلياتسيالىق كابينەتتەگى مانەكەندەر ارقىلى مۇنداي تاجىريبە جاستار اراسىندا ۇنەمى كورسەتىلىپ كەلەدى.
قازىرگى جاسوسپىرىمدەر اراسىندا «ەلەكتروندى تەمەكىنىڭ زاردابى جوق» دەگەن تەرىس تۇسىنىك قالىپتاسقان. كورمەنى ۇيىمداستىرۋشىلار كەرىسىنشە اعزاعا ۆەيپ, IQOS, Glo دەگەندەردىڭ زيانى وراسان ەكەندىگىن ايتادى.
– قازىر كاليانعا دا قىزىعاتىن جاستار كوپ. ولار وسى ارقىلى تۋبەركۋلەز, ۆيرۋستى گەپاتيت جۇقتىرىپ الىپ جاتقاندارىن بىلمەيدى. ويتكەنى ول انتيسانيتارلىق تالاپتارعا ساي تازارتىلمايدى. كاليان تارتاتىن ورىندارعا كىرۋگە جاسى كەلمەگەن بالالاردى زەرتتەي وتىرىپ ولاردىڭ كوبى قورقوردى پلەستەيشەن ويناتاتىن ورىنداردا تارتاتىنىن بىلدىك, – دەيدى ورتالىق مامانى گۇلدانا المىرزاەۆا.
قوعامدىق دەنساۋلىق ساقتاۋ ۇلتتىق ورتالىعىنان كەلگەن ماماندار دەرەگىنشە جىل سايىن تەمەكى زيانىنان 8 ميلليوننان استام ادامنىڭ ءومىرى قيىلادى. وڭىردە تەمەكى شەگۋدىڭ الدىن الۋ جانە سالاماتتى ءومىر سالتىن ناسيحاتتاۋ بويىنشا ترەنينگتەر تۇراقتى وتكىزىلەدى. سونىمەن قاتار زياندى ادەتتەن ارىلعىسى كەلگەندەرگە پسيحولوگتەر تەگىن كەڭەس بەرەدى.
– كوپتەگەن قاتەرلى اۋرۋعا ۇشىراتاتىن تەمەكىنىڭ قۇرامىندا 400-دەن استام ۋلى زات بار. ونىڭ قاۋىپتىسى – نيكوتين. جاستار اراسىندا ەلەكتروندى تەمەكى مەن قورقورعا قۇمارلىق تا ءورشىپ بارادى. ءبىزدىڭ مىندەت وسىنداي ادەتتىڭ الدىن الۋ, – دەيدى وبلىستىق جاستار دەنساۋلىعى ورتالىعى ديرەكتورىنىڭ ورىنباسارى گۇلناز مازقوجا.
كورمە 4 ماۋسىمعا دەيىن ب.شوكەنوۆ اتىنداعى ساياباق پەن تۇڭعىش پرەزيدەنت پاركىندە جۇمىسىن جالعاستىرادى.
قىزىلوردا
