بريۋسسەلدە بۇل قادامنىڭ پايدالانۋشىلار ىڭعايىنا جاسالىپ وتىرعانى حابارلانعان. سونىمەن قاتار شىعىندى ازايتىپ, ەكولوگيا ءۇشىن دە ءتيىمدى بولارىن مالىمدەدى.
«جاڭا ەرەجە جىلىنا ءبىر مىڭ توننادان استام ەلەكتروندى قالدىقتاردى ازايتادى. بۇل 10 ملن cمارتفون نەمەسە 2600 توننا شيكىزاتقا تەڭ. بۇگىندە شيكىزات بۇرىنعىدان دا قۇندى ەكەنىن بىلەسىزدەر», دەدى ەۋرووداقتىڭ ىشكى نارىق جونىندەگى كوميسسارى تەرري برەتون.
بۇل شەشىمنىڭ ەڭ ۇلكەن قارسىلاسى بولعان Apple كومپانياسى «ايفون» قۇرىلعىلارىنا مەنشىكتى Lightning قوسىمشاسىن پايدالانۋدا. ەۋروپا نارىعىنا ەندى ودان باس تارتۋعا تۋرا كەلىپ وتىر. Apple كومپانياسىنىڭ پىكىرىنشە, بريۋسسەلدىڭ بۇل شەشىمى سالانىڭ دامۋى مەن يننوۆاتسيالار ەنگىزىلۋىن تەجەيدى. جاڭا ەرەجە ۇيالى تەلەفوندار, پلانشەتتەر, قۇلاققاپتار, جىلجىمالى ويىن قۇرىلعىلارى, ءپورتاتيۆتى ديناميكتەرگە قاتىستى ەنگىزىلەدى.
«نوۋتبۋك وندىرۋشىلەرى ءۇشىن جاڭا ەرەجەلەر كۇشىنە ەنگەننەن سوڭ ءوندىرىستى بەيىمدەۋگە 40 اي ۋاقىت بەرىلەدى», دەپ حابارلايدى BBC News.
سونىمەن قاتار جاڭا قۇجات ساتىپ الۋشىلارعا گادجەتتى زاريادتاۋ قۇرىلعىسىمەن نەمەسە ونسىز ساتىپ الۋ قۇقىعىن بەرۋى كەرەك.
«بۇل زاڭ ەو-نىڭ ونىمدەردى تۇراقتى ەتۋ, ەلەكتروندى قالدىقتاردى ازايتۋ جانە تۇتىنۋشىلاردىڭ ءومىرىن جەڭىلدەتۋ جونىندەگى جالپى كۇش-جىگەرىنىڭ ءبىر بولىگى», دەلىنگەن ەۋروپارلامەنت مالىمدەمەسىندە.
پارلامەنتاريلەردىڭ باعالاۋىنشا, بۇل شەشىم تۇتىنۋشىلارعا جىلىنا 250 ميلليون ەۋروعا دەيىن ۇنەمدەۋ مۇمكىندىگىن بەرىپ, قالدىق كولەمىن جىلىنا 11 مىڭ تونناعا ازايتادى.
ارۋجان امانگەلدى
