قازاقستان • 08 ماۋسىم، 2022

ەلدەن شىعارىلعان قارجىنى قايتارۋ جونىندەگى كوميسسيانىڭ قۇرامى بەكىتىلدى

50 رەت كورسەتىلدى

قازاقستان پرەزيدەنتىنىڭ ەكونوميكالىق رەسۋرستاردى زاڭسىز شوعىرلاندىرۋعا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيا قۇرۋ تۋرالى جارلىعىنىڭ تولىق ءماتىنى جاريالاندى، دەپ حابارلايدى Egemen.kz.

پرەزيدەنت ەلدەن زاڭسىز شىعارىلعان قاراجاتتى قازاقستانعا قايتارۋ، سونداي-اق زاڭسىز جولمەن الىنعان ەكونوميكالىق رەسۋرستاردىڭ مونوپوليالىق شوعىرلانۋىن انىقتاۋ، ولاردى مەملەكەتكە قايتارۋ ماقساتىندا ۆەدومستۆوارالىق كوميسسيا قۇرۋعا قاۋلى ەتتى.

كوميسسيا قۇرامى كەلەسىدەي بەكىتىلدى:

  • باس پروكۋرور، توراعا;
  • باس پروكۋروردىڭ ورىنباسارى، توراعانىڭ ورىنباسارى;
  • ۇلتتىق بانك توراعاسى;
  • پرەمەر-ءمينيستردىڭ ورىنباسارى - سىرتقى ىستەر ءمينيسترى;
  • پرەمەر-ءمينيستردىڭ ورىنباسارى - قارجى ءمينيسترى;
  • «سامۇرىق-قازىنا» ۇاق» اق باسقارما توراعاسى;
  • ۇلتتىق قاۋىپسىزدىك كوميتەتىنىڭ توراعاسى;
  • باسەكەلەستىكتى قورعاۋ جانە دامىتۋ اگەنتتىگىنىڭ توراعاسى;
  • قارجى نارىعىن رەتتەۋ جانە دامىتۋ اگەنتتىگىنىڭ توراعاسى;
  • قارجى مونيتورينگى اگەنتتىگىنىڭ توراعاسى;
  • سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى;
  • ىشكى ىستەر ءمينيسترى;
  • ادىلەت ءمينيسترى.

ۆەدومستۆوارالىق كوميسسياعا ءبىر اپتا مەرزىمدە ۆەدومستۆوارالىق كوميسسيا تۋرالى ەرەجەنىڭ جوباسىن پرەزيدەنتتىڭ قاراۋىنا ەنگىزۋ تاپسىرىلدى.

بۇدان باسقا، كوميسسيا ەكى اپتادا ءبىر رەت ءوز جۇمىسى تۋرالى ەسەپ بەرەدى. جارلىقتىڭ ورىندالۋىن باقىلاۋ پرەزيدەنت اكىمشىلىگىنە جۇكتەلگەن. جارلىق قول قويىلعان كۇنىنەن باستاپ قولدانىسقا ەنگىزىلدى.

ايتا كەتسەك، 5 ماۋسىمدا مەملەكەت باسشىسى قاسىم-جومارت توقاەۆ قازاقستان ازاماتتارىنىڭ شەتەلگە زاڭسىز اكەتىلگەن قاراجاتتى قايتارۋ جونىندە كوميسسيا قۇرعانى حابارلاندى. پرەزيدەنت كوميسسيا قىزمەتىنە جەكە باقىلاۋدى جۇزەگە اسىرۋعا نيەتتى.

سوڭعى جاڭالىقتار

ۇقساس جاڭالىقتار