سۋرەتتى تۇسىرگەن تىلەۋبەك شاياحمەت
ءىس-شارانىڭ نەگىزگى ماقساتى – 2021-2022 وقۋ جىلىنىڭ قورىتىندىسىن شىعارۋ, جالپى ءبىلىم بەرەتىن پاندەر بويىنشا رەسپۋبليكالىق وليمپيادا جەڭىمپازدارى مەن جۇلدەگەرلەرىن, دارىندى وقۋشىلاردى ماراپاتتاۋ ەدى. جۇزدەن جۇيرىك شىققان ءبىلىمدى وقۋشىلارعا بۇل كۇنى وبلىس اكىمىنىڭ اتىنان ارنايى العىسحاتتار مەن باعالى سىيلىقتار تابىستالدى. فورۋمدا شىعىس قازاقستان وبلىسى ءبىلىم باسقارماسىنىڭ باسشىسى سايرانگۇل احمەتكارىمقىزى ۇلگىلى دە ۇزدىك وقۋشىلاردى مەرەكەسىمەن قۇتتىقتاپ, جىلى لەبىزىن ءبىلدىردى.
– دارىندى جاستار – كەز كەلگەن مەملەكەتتىڭ ماقتانىشى. ەلدىڭ جارقىن بولاشاعى ولاردىڭ ءبىلىمى مەن جاڭا يدەيالارىنا بايلانىستى. ال بالالاردىڭ جەتىستىكتەرى ءوڭىردىڭ ءيميدجى مەن بەدەلىن ارتتىرادى, – دەدى وبلىستىڭ باس ۇستازى سايرانگۇل ءجۇمادىلوۆا.
ايتا كەتسەك, وبلىسىمىزدىڭ زياتكەرلىك قۇراما كومانداسى بيىل جالپى ءبىلىم بەرەتىن پاندەر بويىنشا وقۋشىلاردىڭ رەسپۋبليكالىق وليمپياداسىندا 30 مەدال جەڭىپ العان. ونىڭ ىشىندە 8-ءى التىن مەدال. سونىمەن قاتار فورۋم اياسىندا رەسپۋبليكالىق وليمپيادانىڭ جەڭىمپازدارى مەن جۇلدەگەرلەرىنە قازاقستان رەسپۋبليكاسى ءبىلىم جانە عىلىم مينيسترلىگىنىڭ مەدالدارى مەن ديپلومدارى بەرىلدى.
– جەتىستىككە جەتۋ وڭاي ەمەس. حالىقارالىق, ەۋرازيالىق وليمپيادالاردا ورىن الدىم. جۋىقتا جەتكەن تاعى ءبىر جەتىستىگىم APhO ازيا وليمپياداسىندا ماراپاتقا يە بولدىم. قانداي دا دارەجەگە جەتۋ ءۇشىن ەڭ ءبىرىنشى تاباندى ەڭبەك ەتە ءبىلۋ كەرەك, – دەيدى سەمەي ءبىلىم-يننوۆاتسيا ليتسەيىنىڭ 11-سىنىپ وقۋشىسى مۇحامەدكارىم قانىش.
مەرەكەلىك فورۋمنان العان اسەرلەرىمەن بولىسكەن وقۋشىلار ۇيىمداستىرۋشىلارعا العىستارىن ءبىلدىردى, ارتىلعان ءۇمىتتى اقتاۋ ءۇشىن ءبىلىم جولىندا ەڭبەك ەتۋگە ۋادە ەتتى. جوعارىدا ايتىپ وتكەندەي, سالتاناتتى شارادا بەيبىت كۇندە جاساعان ەرلىكتەرىمەن كوزگە تۇسكەن وقۋشىلار دا بولدى. ونىڭ ءبىرى سىنىپتاسىنىڭ ءومىرىن قۇتقارىپ قالعان رۋسلان وماروۆ ەدى. ول مامىر ايىندا سۋعا باتىپ كەتكەن سىنىپتاسىن جاعاعا الىپ شىعىپ, العاشقى كومەك كورسەتكەن.
– سىنىپتاسىم سۋدىڭ تەرەڭ جەرىنە ءتۇسىپ كەتتى. سويتسەك, ول جۇزە المايدى ەكەن. باتىپ بارا جاتقانىن بايقاي سالا سۋعا سەكىردىم. ونىڭ ۇستىنە سۋ دا سۋىق ەكەن. ءجۇزىپ بارىپ, جاعاعا شىعاردىم. كەيىن دوسىم العىس ايتىپ, ءوزىنىڭ ۆەلوسيپەدىن سىيلادى, – دەيدى 7-سىنىپ وقۋشىسى رۋسلان وماروۆ.
ماراپاتتاۋ راسىمىنەن سوڭ كۇمىس كومەي, جەزتاڭداي انشىلەر وزات وقۋشىلاردىڭ قۇرمەتىنە اسەم ءان ارنادى. مەرەكەلىك شارا اياقتالا سالا قۇشاقتارى گۇلگە تولعان وقۋشىلارىن ۇستازدارى دا قۇتتىقتاپ, اق تىلەكتەرىن جاۋدىرىپ جاتتى. راس, ۇستازدان شاكىرت وزىپ جاتسا, ۇستاز ەڭبەگىنىڭ اقتالعاندىعى. ال بىلىمدە جۇلدەگەر اتانىپ جۇرگەن وقۋشىلار ەرتەڭگى كۇنى ۇلكەن ومىردە دە جۇلدەگە جەتەرى ءسوزسىز.
شىعىس قازاقستان وبلىسى
