بۇل تۋرالى جاڭاقالا اۋىلىنداعى ورمانشى سەرىك باكريدەنوۆ ءمالىم ەتتى.
- اۋىلىمىزدا جىبەك قۇرتى قاپتاپ كەتى. اعاشتاردى, جاپىراقتاردى جەپ جاتىر. كوپ جاپىراقتى جەپ قويدى. كوبىنە تەرەك پەن كوكتەرەكتەردىڭ جاپىراعىن جەۋدە. ءبىزدىڭ ورمانشىلار جەرىلىكتى اكىمدىككە, ءتيىستى باسقارماعا حابارلادى. قۇرتتاردى ءبىر اپتا بۇرىن انىقتاي باستادىق. ولار ۇيگە دە, شارباقتارعا دا شىعىپ كەتەدى, دەدى سەرىك باكريدەنوۆ.
گريگورەۆكا اۋىلدىق وكرۋگىنىڭ اكىمى ۆيتالي برۋتسكيدىڭ ايتۋىنشا, جىبەك قۇرتتارى اۋىلداعى جايىلمادا تۇرعان تەرەكتەر مەن جول شەتىندە ءوسىپ تۇرعان قايىڭداردى جەۋدە.
پاۆلودار ورمان قورعاۋ مەكەمەسىنىڭ باسشىسى اجدار ءجۇسىپوۆ قىس جىلى بولعاندىقتان جىبەك قۇرتىنىڭ كوپ شىققانىن ايتتى.
- جاڭبىردان كەيىن جاڭا جاپىراقتار ءوسىپ شىعادى. فيتوسانيتاريا قىزمەتى بۇل جىبەك قۇرتىنا قارسى وڭدەۋ جۇرگىزەدى. ولار بىزگە ساراپتاما جاساپ بەرەدى. قىس جىلى بولدى. سوندىقتان كوپ شىعىپ جاتىر. جىبەك قۇرتتارىنىڭ دەرناسىلدەرى قاتتى ايازدا عانا ولەدى, دەدى اجدار ءجۇسىپوۆ.
رەسپۋبليكالىق فيتوسانيتارلىق دياگنوستيكا جانە بولجامدار ادىستەمەلىك ورتالىعى بۇل قۇرتتاردىڭ ەش زيانى جوق ەكەنىن ايتۋدا.
- بۇل سىڭار جىبەك قۇرتىنىڭ ەكى ءتۇرى بار: كارانتيندىك سانالاتىن ازيالىق ءتۇرى جانە كارانتيندىك سانالمايتىن ەۋروپالىق ءتۇرى. پاۆلودار وبلىسىندا كارانتيندىك ەمەس ءتۇرى ءجۇر. ولار مامىردا پايدا بولادى. قۇرتتار ەسەيگەن سايىن اعاشتا جوعارى ورمەلەي الادى. اۋىل شارۋاشىلىعىنا, ەگىنگە ەشقانداي زيان كەلتىرمەيدى. قۇرتتار قاپتاپ كەتكەن كەزدە اعاشتىڭ ۇشار باسىن عانا جەيدى. ولار جىل سايىن بولادى, دەدى ورتالىقتاعىلار.
اتالعان ورتالىقتىڭ حابارلاۋىنشا, بۇل قۇرتتارعا قاتىستى رەسەيدە پتر ساراپتاما جاسالعان. ساراپتاما ناتيجەسى كارانتيندىك ەمەس ءتۇرى ەكەنىن انىقتادى.
ورتالىق وكىلى جاسۇلان كەنجەباەۆ كۇندە اۋداندى ارالاپ شىعاتىندارىن اتاپ ءوتتى. پاۆلودار اۋدانى ارقىلى تەرەڭكول اۋدانىنا شىعاتىن جولدىڭ بويىندا جاپىراقتاردىڭ 90 پايىزىن جەپ قويعان.
جاڭااۋىل ورمان شارۋاشىلىعىنىڭ ورمانشىسى ۆالەري زوريچەۆتىڭ ايتۋىنشا, جاڭاقالادان بولەك نابارەجنوە اۋىلىندا دا جىبەك قۇرتتارى قاپتاعان. سونداي-اق چەرنويارسك, ميچۋرين, چەرنورەتسك اۋىلدارىندا ازداعان جىبەك قۇرتتارى انىقتالعان.
