«ەكونوميكانىڭ بارلىق نەگىزگى سالالارى ءوسىپ كەلەدى. ەكونوميكانىڭ وسۋىنە شيكىزاتتىڭ جوعارى باعاسى جانە كارانتين شەكتەۋلەرىن الىپ تاستاۋ ىقپال ەتتى. الەمدەگى گەوساياسي جاعداي مەن كاسپي قۇبىرى كونسورتسيۋمىنداعى اپات قازىرگى كەزدە ەل ەكونوميكاسىنا ايتارلىقتاي تەرىس اسەر ەتكەن جوق», دەدى ع. ءپىرماتوۆ ەلوردادا وتكەن ءباسپاسوز ءماسليحاتىندا.
ونىڭ ايتۋىنشا, تۇتىنۋشىلىق سۇرانىس تا وڭ قارقىندى كورسەتىپ وتىر. بولشەك تاۋار اينالىمىنىڭ, ياعني ازىق-ت ۇلىك پەن ازىق-ت ۇلىك ونىمىنە جاتپايتىن تاۋاراينالىمىنداعى ءوسىم توقتاعان جوق.
«بولجامدارىمىزعا سايكەس, 2022 جىلى ەكونوميكانىڭ ءوسۋى 2,8-3,8 پايىز بولادى. بۇل ءوز كەزەگىندە جىل سوڭىنا دەيىن ەكونوميكانىڭ بارلىق نەگىزگى سالاسىندا وڭ ديناميكانىڭ ساقتالۋىنا قاتىستى بولىپ وتىر. الايدا گەوساياسي داعدارىس, سىرتقى سۇرانىستىڭ ناشارلاۋى, سونداي-اق تاۋار جەتكىزۋ تىزبەكتەرىن قايتا قۇرۋ جۇمىستارى ەكونوميكانىڭ ءوسۋ قارقىنىن تەجەيدى», دەدى ۇب باسشىسى.
ونىڭ پايىمىنشا, 2023 جىلى جالپى ىشكى ءونىمنىڭ ءوسۋ قارقىنى 3,5-4,5 پايىزعا دەيىن قارقىن الادى. بۇعان سىرتقى سۇرانىستىڭ وسۋىمەن قاتار, ەكسپورتتىق جانە يمپورتتىق جەتكىزىلىم تىزبەكتەرىن قالپىنا كەلتىرۋ ىقپال ەتەدى. مۇنىمەن قوسا, ەنەرگيا رەسۋرستارىن ءوندىرۋ كولەمىن ۇلعايتۋ جانە ىشكى سۇرانىستىڭ ارتۋى وسىمگە وڭ اسەرىن تيگىزەدى.
«2024 جىلى نارىقتاعى تاۋەكەلدەردىڭ تومەندەۋى مەن ءىرى مۇناي-گاز جوبالارىن ىسكە اسىرۋ اياسىندا ءوندىرۋ كولەمىنىڭ ايتارلىقتاي ۇلعايۋىن ەسكەرە وتىرىپ, ەكونوميكا ءوسىمى جالعاسادى», دەدى عالىمجان ءپىرماتوۆ.
