پويىز اپاتى: سەبەبى بەلگىسىز, ساباعى قانداي بولادى؟

«اپات ايتىپ كەلمەيدى» دەي­دى دانا حالقىمىز. بۇعان وتكەن سەنبىدە, ياعني, 19 ساۋىردە «الما­تى-اتىراۋ» باعىتىندا قاتى­نايتىن جولاۋشىلار پويىزى اپاتقا ۇشىرادى دەگەن سۋىت حاباردى ەستىگەندە, الدىمەن ويىمىزعا حالقىمىزدىڭ وسىناۋ ەسكەرتپەسىنىڭ راستىعى ەرىكسىز ورالدى. وقيعا سول كۇنى كەشكىلىك 17 ساعات 55 مينۋتتا بولعان. پويىز اپاتى اتىراۋ وبلىسىنىڭ قىزىلقوعا اۋدانىنداعى جانتەرەك-كەنباي تەمىرجول بەكەتتەرىنىڭ ارالىعىندا ورىن العان. سول جولاۋشىلار پويىزىنىڭ قۇرامىندا 19 ۆاگون, ونىڭ ىشىندە 16 جولاۋشىلار ۆاگونى تىركەلىپتى. وسى ۆاگوندارمەن 586 جولاۋ­شى جانە 26 جولسەرىك اتىراۋعا باعىت العان ەكەن. الدىن وراپ ايتقىمىز كەلگەنى, 12 ۆاگوننىڭ رەلستەن شىعىپ كەتكەنىنە, سونىڭ ىشىندە 8 ۆاگوننىڭ ءبىر جانىنا قيسايىپ قالعانىنا قاراماستان جولاۋشىلار اراسىندا ادام شىعىنى بولماسا دا, ءار دەڭگەيدە جاراقات العاندار بار. وسىناۋ سۋىت حابار اتىراۋلىق قۇتقارۋشىلاردى اياعىنان تىك تۇرعىزدى. ويتكەنى, الدىمەن بارىنەن ادام ءومىرى قىمبات ەدى. جولاۋشىلاردى ءبىرىنشى كەزەكتە قۇتقارۋ قاجەت. پويىز اپاتى جونىندەگى سۋىت حاباردان سوڭ وقيعا ورنىنا قۇتقارۋ قىزمەتىنىڭ وكىلدەرىمەن بىرگە شۇعىل جەتكەن وبلىس اكىمىنىڭ ورىنباسارى ءسالىمجان ناقپاەۆ تومەندەگى جايتتاردى ءمالىم ەتتى. ونىڭ ايتۋىنشا, جولاۋشىلاردى قۇتقارۋعا توتەنشە جاعدايلار مينيسترلىگىنە قاراستى قۇرىلىمدارمەن بىرگە «قاينارمۇنايگاز», «دوس­سور­مۇ­نايگاز», «ەمبىمۇنايەنەرگو» جانە «ماقات» ءجوب سەكىلدى كاسىپ­ورىندار جولاۋشىلاردى ماقات اۋدانىنىڭ ورتالىعىنا شۇعىل جەتكىزۋدى ۇيىمداستىرۋعا اتسالىستى. وقيعا ورنىندا 45 مەديتسينا قىزمەتكەرى بار 6 جەدەل جاردەم بريگاداسى جۇمىس جاسادى. سول كۇنى كەشكىلىك 22 ساعات 30 مي­نۋتتا ەكى تىكۇشاقپەن اتىراۋ قا­لاسىنا جەدەل جەتكىزىلگەن 8 ادام­نىڭ ۇشەۋى اۋرۋحاناعا جاتقى­زىلدى. وقيعا ورنىنان 435 ادام اۆتوبۋستارمەن جانە ۆاحتالىق كولىكتەرمەن ماقات ستانساسىنا, ال 169 ادام وقيعا ورنىنان 6-7 شاقىرىمداي قاشىقتاعى كەنباي تەمىرجول بەكەتىنەن ماقاتقا دەيىن پويىزبەن جەتكىزىلگەن. ال ماقات ستانساسىندا اپاتقا ۇشىراعان جولاۋشىلارعا پسيحولوگيالىق تۇرعىدان قولداۋ كورسەتىلدى. ماقات اۋداندىق اۋرۋحاناسىنا جەتكىزىلگەن 26 جولاۋشىنىڭ التاۋى ءارتۇرلى جاراقاتتارمەن جاتقىزىلدى. جەكسەنبىگە, ياعني, 20 ساۋىرگە قاراعان تۇنگى 01 ساعات 15 مينۋتتا ماقات ستانساسىنان 6 جولاۋشى ۆاگونى بار ارنايى پويىز جاساقتالدى. وسى جولاۋشى پويىزىمەن جولاۋشىلار 03 ساعات 10 مينۋتتا اتىراۋ قالاسىنا جەتكىزىلدى. جولاۋشىلاردى مەكەنجايلارىنا جەتكىزۋ ءۇشىن 10 اۆتوبۋس ۇيىمداستىرىلدى. مەديتسينالىق جانە پسيحولوگيالىق كومەك بەرۋ ءۇشىن 5 جەدەل جاردەم بريگاداسى, 4 پسيحولوگ كۇتىپ تۇردى. – «الماتى-اتىراۋ» پويىزىندا بولعان جولاۋشىلار اراسىنان اۋرۋحاناعا تۇسكەن 10 ادامنىڭ ەكەۋىنىڭ جاعدايى اۋىر, – دەگەن اتىراۋ وبلىستىق دەنساۋلىق ساقتاۋ باسقارماسىنىڭ باسشىسى مەڭدىحان وتەپقاليەۆتىڭ ايتۋىنا قاراعاندا, قازىرگى كەزدە وبلىستىق اۋرۋحانادا اپات سالدارىنان زارداپ شەككەن 6 ادام جاتىر. اۋىر جاراقات العانداردىڭ ءبىرىنىڭ جاعى سىنعان, بەتى تىلىنگەن. ال ەكىنشىسىنىڭ قابىرعالارى سىنعان. بۇلارعا قوسا ماقات اۋداندىق اۋرۋحاناسىندا ءتورت ادام ەمدەلۋدە. اتىراۋ تەمىرجول جەلىلىك ءبولىمىنىڭ باس ينجەنەرى جانىبەك جونتۇرباەۆتىڭ ايتۋىن­شا, اپاتتىڭ سالدارىن جويۋ جۇ­مىس­تارىنا «قازاقستان تەمىر جولى» اق-تان 218 ادام, 22 بىرلىك تەحنيكا, 8 ەلەكتر ستانساسى جانە 2 قالپىنا كەلتىرۋ پويىزى جۇمىلدىرىلعان. جەكسەنبىدە, ناقتىلاي ايتقاندا, 20 cاۋىردە 05 ساعات 57 مينۋتتا ب ۇلىنگەن 325 مەتر تەمىرجول بولىگى قالپىنا كەلتىرىلىپ, پويىزدار قوزعالىسى قالپىنا كەلدى. ايتقانداي, تەمىرجولداعى اپات سالدارى تولىق جويىلعانشا, 9 جولاۋشى, 34 جۇك پويىزىنىڭ قوزعالىسى شەكتەلدى. ماماندار جولاۋشىلار پويى­زىنىڭ اپاتقا ۇشىراۋىنا سەبەپ بولار بىرنەشە نۇسقا قاراس­تىرىلىپ جاتقانىن ايتادى. ارنايى قۇرىلعان كوميسسيا ناقتى نە سەبەپ بولعانىن ءبىر اپتادان سوڭ جاريا ەتپەك. ازىرگە اپاتتىڭ سەبەبى بەلگىسىز, الايدا, مۇنداي اپاتتان ساباق الۋ جاعى تەك ارنايى كوميسسيانى عانا ەمەس, بارشانى, ياعني, قاراپايىم جولاۋشىدان تەمىرجولشىعا دەيىن, سالالىق مينيسترلىكتەگىلەردى, ءتىپتى ۇكىمەتتى دە ويلانتۋى ءتيىس. شىندىعىندا, بىزگە وسىنداي وقىس وقيعالاردان, تەحنوگەندىك توتەنشە جاعدايدان ساباق الاتىن كەز جەتكەن جوق پا؟ جولداسبەك شوپەعۇل, «ەگەمەن قازاقستان». اتىراۋ وبلىسى.