كرەمني زاۋىتىنىڭ زاپىرانى جايلى زار قاقساپ جۇرگەن تۇرعىندار بۇل كاسىپورىننىڭ اشىلۋىن جىلى قابىلدادى. زاۋىتتىڭ ونىمىنەن قاۋىپ تونە قويماس دەپ الاڭسىز وتىر. اتاۋى دا سەنىم ۇيالاتاتىن سياقتى. قوجايىنى «قازپرومبەزوپاسنوست پۆ» دەگەن اتاۋ بەرىپتى.
اتالعان زاۋىتتىڭ قۇرىلىسىنا 246 ملن تەڭگە جۇمسالعان. كاسىپورىننىڭ باس ينجەنەرى گريگوري بەرەزۋتسكيدىڭ ايتۋىنشا, مۇندا جىلۋ الماسۋ جابدىقتارى, اۋانى سالقىنداتۋ اپپاراتتارى جانە ارتىق قىسىممەن جۇمىس ىستەيتىن قۇرىلعىلار, كوندەنساتورلار, كريوگەندىك جابدىقتار, قۇبىر بولشەكتەرى مەن قۇبىردىڭ كوپتەگەن ءتۇرى, ءتۇرلى مەتالل كونسترۋكتسيالارى شىعارىلماق. مۇناي-گاز وندىرىسىنە ارنالعان ونىمدەر قىتاي, رەسەي, شۆەتسيا جانە گەرمانيادان اكەلىنگەن بىلدەكتەرمەن دايىندالادى.
ءوندىرىس ورنى وندىرىلەتىن تاۋار جەلىسىن ودان ءارى كەڭەيتۋدى جوسپارلاپ وتىر. سايكەسىنشە, جاڭا جۇمىس ورىندارى دا اشىلماق. بۇگىندە 40 ادامعا ەكى قولعا ءبىر كۇرەك تابىلسا, الداعى ۋاقىتتا قىزمەتكەرلەر سانى 150-گە دەيىن جەتپەك.
بەلگىلى بولعانداي, ونىمدەر جەرگىلىكتى پاۆلودار مۇناي-حيميا زاۋىتىنا, ERG جانە رەسەي كاسىپورىندارىنىڭ جىرتىعىن جاماماق. سونداي-اق اۋىلدىق اكىمدىكتەردىڭ عيماراتى مەن مەكتەپتەرگە قازاندار جەتكىزۋ كوزدەلگەن.
Qazindustry قازاقستاندىق يندۋستريا جانە ەكسپورت ورتالىعى» اق تاۋەلسىز ديرەكتورى ەرسۇلتان بەكتۇرعانوۆ جاڭا كاسىپورىننىڭ اشىلۋى جاڭا جۇمىس ورىندارىنىڭ قۇرىلۋىنا, وبلىس پەن ەل ەكونوميكاسىنىڭ دامۋىنا ىقپالى زور ەكەنىن اتاپ ءوتتى. «قازاقستان – مۇناي دەرجاۆاسى, ەلىمىز ءۇشىن مۇنداي كاسىپورىن وتە قاجەت جانە ونىڭ ونىمدەرى ۇلكەن سۇرانىسقا يە», دەدى ول.
ەستەرىڭىزگە سالساق, سوڭعى 11 جىلدا ەلىمىز بويىنشا جالپى سوماسى 10 ترلن 400 ملرد تەڭگەگە 1 671 جاڭا كاسىپورىن سالىنعان. قاراجاتتىڭ 1 ترلن تەڭگەدەن استامى پاۆلودار وبلىسىنا تيەسىلى.
پاۆلودار وبلىسى
