تالاپتار مۇلتىكسىز ساقتالدى
شانحاي ىنتىماقتاستىق ۇيىمىنىڭ باس حاتشىسى چجان ءميننىڭ ايتۋىنشا, رەفەرەندۋمدا حالىقارالىق بايقاۋشىلارعا جۇكتەلگەن ميسسيانى ورىنداۋعا بارلىق جاعداي قاراستىرىلدى. سونىمەن قوسا قازاقستاننىڭ سايلاۋ زاڭناماسى مەن حالىقارالىق مىندەتتەمەلەرىنىڭ تالاپتارى مۇلتىكسىز ساقتالعانىن جەتكىزدى.
«3-5 ماۋسىم ارالىعىندا شىۇ دەلەگاتسياسى قازاقستاننىڭ سىرتقى ىستەر مينيسترلىگىنىڭ شاقىرتۋىمەن رەفەرەندۋمدا بايقاۋ ميسسياسىن اتقاردى. حالىقارالىق ميسسيانىڭ قۇرامى 17 مۇشەدەن تۇردى. ونىڭ قاتارىندا ۇيىمعا مۇشە ەلدەردىڭ اتقارۋشى جانە زاڭنامالىق ورگانداردىڭ وكىلدەرى, سول سەكىلدى شىۇ لاۋازىمدى تۇلعالارى بولدى.
اتالعان ميسسيا وكىلدەرى ورتالىق رەفەرەندۋم كوميسسياسىمەن تىعىز جۇمىس ىستەدى. بۇدان باسقا نۇر-سۇلتانداعى حالىقتىڭ رەفەرەندۋمعا قاتىسۋ ۇدەرىسىنە بايقاۋ جۇرگىزىلدى», دەدى چ.مين.
شەتەلدىك دەلەگاتسيا رەفەرەندۋم بارىسىندا داۋىس بەرۋشىلەردىڭ قۇقىعىنىڭ بۇزىلۋى نەمەسە مۇمكىندىگىن شەكتەۋ سىندى جاعدايلار تىركەلمەگەنىن ايتتى.
ء«بىزدىڭ ميسسيا ورتالىق رەفەرەندۋم كوميسسياسى مەن قوعامدىق ۇيىمداردىڭ تاجىريبەلىك ماتەريالدارى نەگىزىندە ورتاق شەشىمگە كەلىپ وتىر. اتاپ ايتقاندا, ۇيىم قازاقستان تاراپى ءوزىنىڭ تالاپتارىن تولىق ورىندادى دەپ سانايدى. كونستيتۋتسياعا وزگەرىستەر ەنگىزۋ تۋرالى رەفەرەندۋم حالىقارالىق ستاندارتتار مەن قازاقستاننىڭ سايلاۋ زاڭناماسىنا ساي ءوتتى. داۋىس بەرۋ كەزىندە قانداي دا ءبىر زاڭ بۇزۋ فاكتىلەرى تىركەلگەن جوق. ءبىزدىڭ ميسسيا رەفەرەندۋم اشىق, ءادىل, دەموكراتيالىق تۇردە ءوتتى دەگەن قورىتىندىعا كەلدى. قازاقستاننىڭ سىرتقى ىستەر مينيسترلىگىنە شىۇ ميسسيا مۇشەلەرىنە بايقاۋشى رەتىندە مىندەتىن اتقارۋعا بارلىق جاعدايدى قاراستىرعانى ءۇشىن ريزاشىلىعىمىزدى بىلدىرەمىز», دەدى شانحاي ىنتىماقتاستىق ۇيىمىنىڭ باس حاتشىسى.
جوعارى دەڭگەيدە ۇيىمداستىرىلدى
تۇركى مەملەكەتتەر ۇيىمى باس حاتشىسىنىڭ ورىنباسارى گيزمات گوزالوۆتىڭ پىكىرىنە سۇيەنسەك, ورتالىق كوميسسيا رەفەرەندۋمدى ءادىل ءارى زاڭدا بەلگىلەنگەن مەرزىمدە وتكىزدى.
«رەفەرەندۋم جاقسى ۇيىمداستىرىلىپ, كاسىبي تۇردە وتكىزىلدى. ايتارلىقتاي بۇزۋشىلىقتار بولعان جوق. داۋىس بەرۋ جانە ونى ساناۋ دا اشىق ءوتتى. اكىمشىلىك جانە قۇقىق قورعاۋ ورگاندارى تاراپىنان رەفەرەندۋم كوميسسياسىنىڭ جۇمىسىنا زاڭسىز ارالاسۋ جاعدايلارى تىركەلمەدى. حالىقارالىق بايقاۋشىلار سايلاۋ ۋچاسكەلەرىنە بارىپ, وندا قىزمەت كورسەتكەن لاۋازىمدى تۇلعالار تۋرالى تولىق اقپاراتقا يە بولدى. ەركىن داۋىس بەرۋ پروتسەسى قامتاماسىز ەتىلدى. «قازاقستاننىڭ رەفەرەندۋم تۋرالى» زاڭىندا جەرگىلىكتى قوعامدىق بىرلەستىكتەر مەن حالىقارالىق بايقاۋشىلاردىڭ سايلاۋ پروتسەسىن باقىلاۋعا بارلىق قاجەتتى مۇمكىندىك قاراستىرىلعان. سونداي-اق ۇلتتىق بايقاۋشىلاردىڭ بەلسەندى قاتىسۋىنا كۋا بولىپ, بۇل رەفەرەندۋمنىڭ اشىقتىعى مەن قوعامدىق ەسەپتىلىگىن كۇشەيتەتىنىن ايتقىمىز كەلەدى. ميسسيا رەفەرەندۋم ناتيجەلەرىنە اسەر ەتۋى مۇمكىن ايتارلىقتاي تەحنيكالىق پروبلەمالاردىڭ جوق بولعانىن ەسكەرىپ وتىر», دەدى گ.گوزالوۆ.
قوعامدىق باقىلاۋ قىراعى بولدى
رەسەي فەدەراتسياسى ورتالىق سايلاۋ كوميسسياسىنىڭ مۇشەسى پاۆەل اندرەەۆ ايتقانداي, قازاقستان اتا زاڭعا تۇزەتۋلەر ەنگىزۋ پروتسەدۋراسىن ابىرويمەن وتكىزدى.
«كونستيتۋتسياعا پلەبيستسيت, رەفەرەندۋم وتكىزۋ ارقىلى تۇزەتۋلەر ەنگىزۋ ماڭىزدى شەشىم. ازاماتتار ۋچاسكەلەرگە كەلىپ, داۋىس بەردى. جاقسى كوڭىل كۇيدى بايقادىق. نۇر-سۇلتان قالاسى مەن اقمولا وبلىسىنداعى ۋچاسكەلەردى ارالادىم. بارلىق جەردە ادامدار وتباسىلارىمەن كەلىپ, داۋىس بەرىپ جاتتى. ورتالىق رەفەرەندۋم كوميسسياسى ۇلكەن جۇمىس ىستەپ, ءبىز بولعان ۋچاسكەلەردە داۋىس بەرۋ ناتيجەلەرىنە اسەر ەتۋى ىقتيمال وقيعالار نەمەسە بۇزۋشىلىقتار تىركەلگەن جوق. رەفەرەندۋمدا قوعامدىق باقىلاۋدىڭ دا جوعارى بولعانىن ايتا كەتكەن ورىندى», دەدى پ.اندرەەۆ.
ورتالىق رەفەرەندۋمنىڭ كوميسسياسىنان ەلىمىزدەگى اۋقىمدى ءىس-شارانى باقىلاۋعا 25 مەملەكەتتەن 300-گە جۋىق حالىقارالىق بايقاۋشى اككرەديتتەلدى.
