جاي عانا زاڭدى پارلامەنت قابىرعاسىندا قابىلداي سالۋ مەن ونى حالىقتىڭ تالقىسىنا سالۋدىڭ ايىرماشىلىعى وراسان زور. تۇسىنگەن ادامعا قوعام بولىپ كونستيتۋتسياعا وزگەرىس ەنگىزۋگە نيەتتەنۋ ۇلكەن جاڭالىق ەكەنى بەلگىلى. جاڭا قازاقستان دەگەندى ءجيى قولدانا باستادىق. وتكەندە پرەزيدەنت ءبىر سوزىندە بۇل يدەيانى سوزبۇيداعا سالا بەرۋدىڭ قاجەت ەمەستىگىن ايتتى. جاڭا قازاقستان دەپ ايتقانمەن بىزگە ەشكىم باسقا مەملەكەتتى وزگە پلانەتادان اكەپ بەرمەيدى.
جاڭا قازاقستان دەگەنىمىز نە؟ ول ارقايسىمىزدىڭ سانامىزدىڭ جاڭعىرۋى. ءبىز كوزقاراسىمىزدى جاڭاشا باعىتتا وزگەرتكەن كەزدە عانا جاڭارامىز, جاڭعىرامىز. ول وتباسىنان, ءبىلىم بەرۋ مەكەمەلەرىنەن باستاۋ الۋى كەرەك. ادىلەتتى قازاقستاندى قالىپتاستىرۋ ءۇشىن پرەزيدەنت قانا ەمەس, كەز كەلگەنىمىز ءادىل بولۋعا ءتيىسپىز. كونستيتۋتسيالىق رەفورمانى قامتىپ وتىرعان بۇل رەفەرەندۋمدا سول ادىلەتتى قوعام قۇرۋعا بارلىق قادام جاسالىپ وتىر. سونى بارلىعىمىز جان جۇرەگىمىزبەن تۇسىنگەنىمىز ابزال.
ەڭ باستىسى, ەلىمىزدە جاڭارۋعا, جاڭعىرۋعا نيەت زور ەكەنى بەلگىلى بولدى. سول سەبەپتى جاڭا قازاقستاندى بارشامىز بىرلەسە قۇرۋىمىز كەرەك. ساۋساق بىرىكپەي ينە ىلىكپەيتىنىن تۇسىنەتىن كەز كەلىپ جەتتى.
ءالي بەكتاەۆ,
سەنات دەپۋتاتى
