ەستەرىڭىزگە سالا كەتسەك, استانا ۋاقىتىمەن ساعات 20.00-دە ەلىمىزدىڭ 12 وڭىرىندەگى 8 089 جانە 10 شەت مەملەكەتتەگى قازاقستان ەلشىلىكتەرى جانىنان اشىلعان 12 رەفەرەندۋم ۋچاسكەسىندە داۋىس بەرۋ اياقتالدى.
ال ساعات 21.00-دە اقتوبە, اتىراۋ, باتىس قازاقستان, ماڭعىستاۋ جانە قىزىلوردا وبلىستارىنداعى 1 858 ۋچاسكەدە ءوڭىر تۇرعىندارى داۋىس بەرىپ بولدى.
سونىمەن قاتار شەت ەلدەردەگى 5 ۋچاسكە دە جۇمىسىن توقتاتتى. قازىرگى ۋاقىتتا شەت ەلدەردەگى 48 ۋچاسكەدە عانا داۋىس بەرۋ ءجۇرىپ جاتىر.
ەستەرىڭىزگە سالا كەتسەك, ساعات 20.00-دەگى جاعداي بويىنشا 7 936 655 ادام داۋىس بەردى. بۇل - داۋىس بەرۋ تىزىمىنە ەنگىزىلگەن ازاماتتاردىڭ 67,65 پايىزى. ال شەتەلدە جۇرگەن 5 100 وتانداسىمىز ءوز تاڭداۋىن جاسادى.
جالپى, ەلىمىز بويىنشا رەفەرەندۋمعا قاتىسۋ مۇمكىندىگى جانە قۇقىعى بار ازاماتتاردىڭ تىزىمىنە 11 732 699 ادام ەنگىزىلگەن بولاتىن. ولار 10 012 رەفەرەندۋم ۋچاسكەسىندە داۋىس بەردى.
سونداي-اق شەتەلدەگى وتانداستارىمىز ءۇشىن 52 مەملەكەتتەگى قازاقستان ەلشىلىكتەرىنىڭ جانىنان 65 رەفەرەندۋم ۋچاسكەسى ۇيىمداستىرىلدى.
