باسقا قالا تۇرعىندارىمەن بىرگە كەزەككە تۇرعان ءوڭىر اكىمى وسكەمەن قالاسىنداعى №42 ورتا مەكتەپتە ورنالاسقان №9 سايلاۋ ۋچاسكەسىندە سايلاۋ بيۋللەتەنىن الىپ, تولتىردى. سايلاۋ كوميسسياسىنىڭ مۇشەلەرى تاڭەرتەڭنەن باستاپ ازاماتتىق ۇستانىمىن بىلدىرگىسى كەلەتىن حالىقتىڭ ۇلكەن اعىمى ءجۇرىپ جاتقانىن اتاپ ءوتتى. اسىرەسە داۋىس بەرۋشىلەر اراسىندا جاستار كوپ.
«كونستيتۋتسياعا ەنگىزىلەتىن ءاربىر وزگەرىس, سايىپ كەلگەندە, ءبىزدىڭ ومىرىمىزگە قاتىستى. سوندىقتان مەن ۇلكەن قاناعاتتانۋشىلىقپەن, بالالارىم مەن نەمەرەلەرىمنىڭ باقىتتى, گۇلدەنگەن قازاقستاندا ءومىر سۇرەتىنىنە كامىل سەنەمىن», دەدى ايماق باسشىسى.
ەستەرىڭىزگە سالا كەتەيىك, ۇسىنىلىپ وتىرعان رەفورمالاردىڭ نەگىزگى اسپەكتىسى پرەزيدەنتتىڭ, پارلامەنتتىڭ, ۇكىمەتتىڭ وكىلەتتىكتەرىن قايتا ءبولۋ تۇرىندە تەجەمەلىك پەن تەپە-تەڭدىكتىڭ وزىندىك جۇيەسىن قۇرۋ بولىپ سانالادى.
تۇزەتۋلەر بۇكىل كونستيتۋتسيانىڭ ۇشتەن ءبىر بولىگىن – 33 باپتى قامتيدى, بۇل ولاردىڭ اۋقىمىن كورسەتەدى. ولاردى رەفەرەندۋمعا شىعارۋ مەملەكەتتىك قۇرىلىس تۇرعىسىنان تۇسىنىكتى قادام ەكەنى ءسوزسىز. جالپى, جالپىحالىقتىق داۋىس بەرۋ – ازاماتتاردىڭ قانداي دا ءبىر ماسەلە بويىنشا ءوز پىكىرىن ءبىلدىرۋىنىڭ ءداستۇرلى تاسىلدەرىنىڭ ءبىرى. سونىمەن قاتار بۇل حالىقارالىق تاجىريبەگە سايكەس كەلەدى.
