ەلشىنىڭ ايتۋىنشا, ساياسي ءىس-شارا ويداعىداي ءوتىپ جاتىر.
«مەن قازاقستاندا جوعارى مارتەبەلى ەلشى رەتىندە 6 جىل بويى جۇمىس ىستەپ كەلە جاتىرمىن. وسى ايدىڭ سوڭىندا مەن ديپلوماتيالىق كورپۋستى ارىپتەسىمە تابىستايمىن. بۇگىن 2022 جىلدىڭ 5 ماۋسىمى – قازاقستان حالقى ءۇشىن ماڭىزدى كۇن. مەن مۇنداي ساياسي ءىس-شاراعا حالىقارالىق باقىلاۋشى رەتىندە ءبىرىنشى رەت قاتىسىپ وتىرعان جوقپىن. بۇعان دەيىن پرەزيدەنت جانە پارلامەنت سايلاۋىنا دا قاتىسقان ەدىم. سوندىقتان بىلىكتىلىگىم مەن تاجىريبەم بار دەپ سەنىممەن ايتا الامىن.
بۇگىن تاڭنان باستاپ كوپ ۋچاسكەلەرگە باردىق. ادامداردىڭ ءبارى دە ەش قىسىمسىز, ءوز ەركىمەن قاتىسىپ جاتىر. ەشقانداي قۇقىق بۇزۋشىلىق بايقاعان جوقپىز. پرەزيدەنت قاسىم-جومارت توقاەۆتىڭ باسشىلىعىمەن قازاق حالقىنا تابىس جانە جەتىستىك تىلەيمىن. ايتىپ وتكەنىمدەي اتموسفەرا وتە جاقسى. ەش قيىندىق كورمەدىم. كوميسسيا مۇشەلەرىمەن تىلدەستىم. كوميسسيا ءارتۇرلى ۇيىمنان قۇرالىپتى. ولار داۋىس بەرۋ پروتسەسى بويىنشا ەش كەدەرگى بولماعانىن ايتتى. تەك ۇساق-تۇيەك قيىندىقتار تۋىنداعان. ماسەلەن, الماتىدا جانە قاراعاندىدا تىركەلگەن ادامدار ەل استاناسىندا داۋىس بەرگىسى كەلسە, كوميسسيا تالون الىپ كەلگەن جاعدايدا عانا سول ۋچاسكەدە داۋىس بەرۋگە بولاتىنىن تۇسىندىرگەن», دەيدى ەلشى.
ەسكە سالايىق, مەملەكەت باسشىسى قاسىم-جومارت توقاەۆ رەسپۋبليكالىق رەفەرەندۋم وتكىزۋ تۋرالى بۇيرىققا 5 مامىردا قول قويعان ەدى. قازاقستاندىقتار رەفەرەندۋم بارىسىندا ء«يا» نەمەسە «جوق» دەپ داۋىس بەرەدى. ەل اۋماعىندا 10 مىڭنان استام ۋچاسكە جۇمىس ىستەپ, ول ۋچاسكەلەردە 11 ميلليوننان استام قازاقستاندىق داۋىس بەرەدى.
