الماتىلىقتاردىڭ سايلاۋ ۋچاسكەسىنە كەلىپ, ازاماتتىق قۇقىقتارىن پايدالانۋعا بارلىق جاعداي جاسالعان. ەرەكشە قاجەتتىلىكتەرى بار تۇلعالارعا پاندۋس تا ورناتىلىپ, تيەسىلى ورىنعا كەلە المايتىن تۇرعىندار بيۋللەتەنگە ءوز ۇيلەرىندە قول قويا الادى. ارنايى كاسكادتىق كۋرستان وتكەن ماماندار تۇرعىندار تاراپىنان تۋىندايتىن كەز-كەلگەن سۇراققا جاۋاپ بەرۋگە دايىن.
الماتى قالالىق اۋماقتىق سايلاۋ كوميسسياسىنىڭ ءتورايىمى جاننا اسانوۆا قالادا 1 ميلليون 100 مىڭنان استام ادام رەفەرەندۋمدا داۋىس بەرۋگە قۇقىلى ەكەنىن ايتتى. بريفينگتە سپيكەر قالاداعى سايلاۋ ۋچاسكەلەرى تاڭعى 6-دان كەشكى 20.00-گە دەيىن جۇمىس ىستەيتىنىن حابارلادى.
«ەشقانداي ورەسكەل زاڭ بۇزۋشىلىقتار بولعان جوق. بارلىعى جۇمىس تارتىبىندە. ءبىزدىڭ تىزىمدە سايلاۋ قۇقىعى بار 1 126 854 ازامات بار. كەشە ساعات 18:00-گە دەيىن 1388 سىرتتاي داۋىس بەرۋ بيۋللەتەندەرى شىعارىلدى. قازىر بەلسەندىلىك بىرتىندەپ كۇشەيىپ كەلەدى. تاڭەرتەڭگى ساعات 7-دە بىزدە العاشقى سايلاۋشىلار بولدى», دەدى سپيكەر بريفينگتە.
№ 359 رەفەرەندۋم كوميسسياسىنىڭ توراعاسى ايىمگۇل يمانعاليەۆانىڭ ايتۋىنشا, سايلاۋشىلارعا بارلىق جاعداي جاسالعان. ءتورت باقىلاۋشى جۇمىس ىستەپ, بارلىق سايلاۋ نورمالارى قاتاڭ ساقتالۋدا. رەفەرەندۋمعا 10 كۇن قالعاندا ازاماتتاردىڭ ۇيالى تەلەفونىنا داۋىس بەرەتىن جەردىڭ مەكەنجايى ءموبيلدى قوسىمشالار ارقىلى اقپارات جىبەرىلدى. قالا تۇرعىندارىنا ىڭعايلى بولۋ ءۇشىن قوسىمشالار كارتالارىندا جەكە تۇلعانىڭ داۋىس بەرەتىن ۋچاسكەنىڭ ورنالاسقان جەرىن انىقتاۋ مۇمكىندىگى پايدا بولدى. داۋىس بەرۋ ۋچاسكەسىن ىزدەۋدىڭ نەگىزگى سوزدەرى: «سايلاۋ ۋچاسكەلەرى», «رەفەرەندۋم ۋچاسكەسى», «Referendum precinct».
رەفەرەندۋمدا داۋىس بەرۋ ءۇشىن قالا بويىنشا ازاماتتاردى 574 سايلاۋ ۋچاسكەسى قابىلدايدى. ونىڭ 67-ءسى اۋرۋحانا مەن اسكەري ورىندار سىندى ارنايى مەكەمەلەر بولسا, قالعان 507-ءسى اشىق فورماتتاعى مەكەنجايلار.
