«قۇزىرلى ورگاندار تەرگەۋ جۇرگىزىپ جاتىر, وتە تىڭعىلىقتى, ەگجەي-تەگجەيلى تەرگەۋ ءجۇرىپ جاتىر. قازىر قولدا بار ماتەريالدىڭ ءبارىن باس پروكۋراتۋرا جاريالاپ وتىر. قوعامعا قاتىستى نەمەسە قوعامنان جاسىرىپ وتىرعان ەشبىر مالىمەت جوق. ءبارىن اشىق, ترانسپارەنتتى تۇرعىدا, جوعارى كاسىبي دەڭگەيدە ىستەپ وتىرمىز. سوندىقتان حالىقارالىق ساراپشىلاردى شاقىرۋدىڭ قاجەتى جوق, مەن سولاي ويلايمىن», دەدى وقۋشىلار سارايىنداعى رەفەرەندۋم ۋچاسكەسىندە باق وكىلدەرىنىڭ سۇراقتارىنا جاۋاپ بەرگەن قاسىم-جومارت توقاەۆ.
پرەزيدەنت قاڭتار وقيعاسىنىڭ سالدارى اۋىر بولعانىن ەسكە سالدى.
«شىنىمەن دە, بانديتتەر مەن تەرروريستەر كەلتىرگەن زياننىڭ اۋقىمى ۇرەي تۋعىزباي قويمايدى. ويتكەنى 1600 قىزمەتتىك, كوممەرتسيالىق عيمارات ورتەلىپ, 3000 قارۋ ۇرلاندى جانە ارينە, قازا بولعاندار بار. ولاردىڭ ىشىندە بانديتتەر مەن ترەرروريستەر دە بار. ءبىز مۇنى مەملەكەتتىڭ قۇرىلىمىن ىدىراتۋعا باعىتتالعان تەرروريستىك شابۋىل بولدى دەگەننەن تانبايمىز. سوندىقتان ءبىز وعان قاتىسى بار ادامداردى تىكەلەي قاتىسى بولسا دا, جاناما قاتىسى بولسا دا, ۇيىمداستىرۋعا قاتىسى بولسا, تىپتەن جاۋاپكەرشىلىككە تارتىلۋى كەرەك تارتۋ كەرەك دەپ وتىرمىز. مەملەكەتكە قارسى وپەراتسيانىڭ سيپاتى ونىڭ تىڭعىلىقتى دايىندالعانىن كورسەتتى. جاقسى دايىندىعى بار كاسىبي ادامدار باسقارىپ وتىرعان», دەدى مەملەكەت باسشىسى.
سونداي-اق پرەزيدەنت ەلىمىزدىڭ 13 قالاسىندا بيلىككە قارسى شابۋىل ءبىر مەزەتتە تۇتانعانىن, سول ارقىلى قوعامدىق ءتارتىپتى بۇزۋ كوزدەلگەنىن اتاپ ءوتتى.
«قازىر 5,5 مىڭ قىلمىستىق ءىس قوزعالدى, 500 قىلمىستىق ءىس سوتقا جولداندى. سونىڭ ىشىندە 23 ادامعا عانا ناقتى مەرزىم كەسىلگەنىنە نازار اۋدارتقىم كەلەدى. ياعني, بۇل قايعىلى وقيعانى زەرتتەۋگە تىڭعىلىقتى قاراپ وتىرعانىمىزدى كورسەتەدى. بۇعان دەيىن ايتقانىمداي, قاڭتار تراگەدياسىنىڭ رەتسيديۆى قايتالانۋىنا جول جوق. ونىڭ كەپىلى, بۇگىنگى رەفەرەندۋم بولماق. ءبىز ءتيىستى ساباق الدىق», دەپ تۇيىندەدى قاسىم-جومارت توقاەۆ.
سونداي-اق مەملەكەت باسشىسى قاڭتار وقيعاسى كەزىندە مەرت بولعانداردىڭ ءتىزىمى جاريالاناتىنىن ءمالىم ەتتى.
