ء«بىرىنشى, تاربيەشىلەر مەن باسقا دا پەداگوگتەردىڭ بىلىكتىلىگىنە جانە بىلىمىنە قاتىستى تالاپتار ەنگىزىلدى. ەكىنشى, جۇمىس ىستەيتىن تاربيەشىلەر بويىنشا ۇلگىلىك شتات ءنورماتيۆىن ساقتاۋ تالابى ەنگىزىلدى. مىسالى, ءبىر مۇعالىم كۇنى بويى 50 بالامەن جۇمىس ىستەي الاتىن تاجىريبەدەن باس تارتۋ, سانى 25-تەن اسپاۋى ءتيىس», دەپ جازادى مينيستر.
سونداي-اق بەينەكامەرالار ورناتىلۋى مىندەتتى جانە بالاباقشا عيماراتتارى مەن ءۇي-جايلارى سانيتارلىق نورمالارعا, ءورت قاۋىپسىزدىگى تالاپتارىنا تولىق سايكەس بولۋى قاجەت.
«سونىمەن قاتار ءبىلىم باسقارمالارىنا مەملەكەتتىك تاپسىرىس ورنالاستىرىلعانعا دەيىن بالاباقشالاردىڭ جۇمىسىمەن جانە وندا جاسالعان جاعدايلارمەن تانىسۋ قۇقىعى بەرىلەدى. سىبايلاس جەمقورلىققا جول بەرمەۋ ماقساتىندا مۇنداي مونيتورينگ بالاباقشالار قاۋىمداستىعى جانە قوعام وكىلدەرىنىڭ قاتىسۋىمەن عانا جۇرگىزىلەدى», دەيدى اسحات ايماعامبەتوۆ.
تاعى ءبىر جاڭالىق – ءبىلىم باسقارمالارى بالاباقشالارعا مەملەكەتتىك تاپسىرىستاردى ءبولۋ مۇمكىندىگىنەن ايىرىلادى. ەندى جالپى تالاپتارعا ساي كەلەتىن بالاباقشالاردىڭ ءتىزىمى ازىرلەنىپ, اتا-انالار ودان مەكەمەنى وزدەرى تاڭداي الادى.
«دەمەك, مەملەكەتتىك تاپسىرىس اتا-انالار تاڭداعان بالاباقشالارعا جىبەرىلەدى. بولجام بويىنشا, بۇل باسەكەلەستىكتى ارتتىرىپ, بالاباقشالاردىڭ ساپاسىن جاقسارتادى جانە سىبايلاس جەمقورلىق تاۋەكەلدەرىن ازايتادى», دەپ سەنىمدىلىك ءبىلدىردى مينيستر.
سونداي-اق ۆەدومستۆو باسشىسى جۇمىس 4 نەگىزگى باعىت بويىنشا جۇرەتىنىن جەتكىزدى.
«ليتسەنزيالاۋدى قايتارۋ. جۇمىس جاعدايى مەن ساپاسىن تەكسەرىپ, بارلىق بالاباقشانى اتتەستاتسيادان وتكىزۋ. مەكتەپكە دەيىنگى مەكەمە قىزمەتكەرلەرىنىڭ كادرلىق الەۋەتىن, كوللەدجدەر مەن جوو-لاردا مامانداردى دايارلاۋ ساپاسىن ارتتىرۋ. مەكتەپكە دەيىنگى ءبىلىم بەرۋدىڭ جاڭا مودەلى بويىنشا باعدارلامالاردىڭ مازمۇنىن جاڭارتۋ», دەپ تۇيىندەيدى اسحات ايماعامبەتوۆ.
