مەملەكەت باسشىسى قاسىم-جومارت توقاەۆتىڭ سويلەگەن سوزدەرى مەن ايتقان ويلارىنان ءوز باسىم مىنانى اڭعارامىن. ءومىر ءبىر ورنىندا تۇرماق ەمەس, ونىڭ وزگەرۋ قارقىنى جىلدام. وعان ەرە العان, وعان بەيىمدەلە العان قوعام عانا ءوزىن-ءوزى ساقتاپ, الەمدىك تايتالاسقا شىداس بەرە الادى.
وسىدان ءبىر عاسىر بۇرىن دانىشپان احمەت بايتۇرسىن ۇلى قازاققا باسقامەن تەڭ بولۋدىڭ ءبىر-اق جولى بار, ول مادەنيەتتى, ءبىلىم مەن عىلىمدى وركەندەتۋ, ياعني مادەنيەتتەر تەڭدىگى ارقىلى عانا تاۋەلسىزدىككە جەتۋگە بولادى دەگەن تۇجىرىمىن ايتقان ەدى. ەلىمىزدىڭ تاۋەلسىزدىگىن ساقتاپ, نىعايتۋعا بايلانىستى عىلىمعا جۇكتەلەتىن ەكى مىندەتتى ءبولىپ ايتۋ ابزال. ولار, بىرىنشىدەن, ەلىمىزدىڭ تابيعي بايلىقتارىن يگەرۋگە باعىتتالعان جاڭا تەحنولوگيانى ورىستەتۋ. ياعني جاڭا تەحنيكا جانە تەحنولوگيانى جەدەل جانە قارقىندى يگەرۋ ءارى ورىستەتۋ ارقىلى عانا ءبىز مۇمكىندىگى ۇلان- عايىر اتامەكەنىمىزگە يە بولا الامىز. باسقا جول جوق. ءوز رەتىندە ءبىزدى وسى ماقساتقا باستايتىن كەلەسى جاعداي – ۇلتتىق سانانىڭ كەمەلدىگى. كاسىبيلىك پەن ۇلتتىق سانا ءوزارا قابىسقان جەردە ءوسىپ-ءونۋدىڭ بولارى كۇمانسىز.
پرەزيدەنتتىڭ سوزىنەن تۋىندايتىن كەلەسى تۇجىرىم: ەلىمىزدەگى عىلىم سالالارىن جاڭا سۇرانىستارعا بەيىمدەي الاتىن جاڭا سالاداعى عىلىم اكادەمياسى جاڭا قازاقستاننىڭ, ەكىنشى رەسپۋبليكانىڭ ينتەللەكتۋالدىق تىرەگىنە اينالۋعا مىندەتتى. ال وعان قاجەتتى العىشارتتى قالىپتاستىرۋدى ۇكىمەت ءوز مىندەتىنە الىپ وتىر. ياعني جاڭا سۇرانىستاردى نەگىزگە الىپ جاڭادان قۇرىلعان عىلىم ورتالىعى عىلىمعا دەگەن ادالدىقتى ساقتاۋ ءۇشىن دە كۇرەسە الۋعا مىندەتتى. سوندا عانا وزىنە ارتىلعان ءۇمىتتى اقتاي الادى.
مامبەت قويگەلدى,
ۇعا اكادەميگى
