تاۋەلسىز قازاقستاننىڭ مەملەكەتتىك تۋى رەسمي تۇردە 1992 جىلى 4 ماۋسىمدا قابىلداندى. ءدال وسى كۇنى جوعارعى كەڭەس دەپۋتاتتارى 6 ساعاتقا سوزىلعان وتىرىس بارىسىندا ەگەمەن ەلىمىزدىڭ مەملەكەتتىك رامىزدەرىن قابىلدادى. بەلگىلى سۋرەتشى شاكەن نيازبەكوۆتىڭ جاساپ شىققان تۋى بەكىتىلدى. ەكى كۇننەن كەيىن اباي اتىنداعى وپەرا جانە بالەت تەاترىندا مەملەكەتتىك رامىزدەر جۇرتشىلىققا تانىستىرىلدى. ەڭ العاش كوك بايراق پرەزيدەنت رەزيدەنتسياسى مەن جوعارعى كەڭەس عيماراتىنىڭ توبەسىندە كوتەرىلدى.
وسى تۇستا ءسال شەگىنىس جاساپ, تاعى ءبىر وقيعاعا توقتالعىمىز كەلىپ وتىر. مەملەكەتتىك تۋ رەسمي تۇردە 1992 جىلعى 4 ماۋسىمدا بەكىتىلگەنىمەن, تاۋەلسىز قازاقستاننىڭ جالاۋى تۇڭعىش رەت شەتەلدە 1992 جىلعى 2 ناۋرىزدا كوتەرىلدى.
1992 جىلدىڭ 2 ناۋرىزىندا بۇۇ باس اسسامبلەياسىنىڭ پلەنارلىق ماجىلىسىندە قازاقستان بىرىككەن ۇلتتار ۇيىمىنا قابىلدانىپ, الەمدىك قوعامداستىقتىڭ تولىققاندى مۇشەسىنە اينالدى. سودان كەيىن بۇۇ شتاب-پاتەرىندە وتكەن سالتاناتتى راسىمدە بۇۇ باس حاتشىسىنىڭ «قازاقستان رەسپۋبليكاسىنىڭ مەملەكەتتىك تۋى كوتەرىلسىن», دەگەن سوزىنەن كەيىن بايراعىمىز كوكتە جەلبىرەدى.
«تاۋەلسىزدىگىمىزدى جاريالاعاننان كەيىن ەكى كۇن وتكەن سوڭ, 1991 جىلعى 18 جەلتوقساندا پرەزيدەنت نۇرسۇلتان نازارباەۆتىڭ تاپسىرماسىمەن نيۋ-يورككە ۇشىپ كەتتىم. ماقسات – قازاقستان رەسپۋبليكاسىنىڭ وكىلى رەتىندە ەلىمىز بەن بۇۇ اراسىندا بايلانىس ورناتۋ بولاتىن.
1992 جىلعى 2 ناۋرىزدا بۇۇ باس اسسامبلەياسىنىڭ 46-سەسسياسىنان كەيىن قازاقستان ءبىراۋىزدان بۇۇ قۇرامىنا قابىلداندى. قازاقستان حالقى اتىنان وتىرىستا ءسوز سويلەۋ باقىتى بۇيىردى. وسى وقيعادان كەيىن پرەزيدەنت جارلىعىمەن قازاقستاننىڭ بۇۇ-داعى تۇراقتى وكىلى قىزمەتىنە كىرىستىم», دەپ ەسكە الادى وسى ءساتتى قازاقستاننىڭ بۇۇ-داعى تۇڭعىش تۇراقتى وكىلى اقمارال ارىستانبەكوۆا.
ەلىمىز جاھاندىق ۇيىمعا قابىلدانعاننان بەرى كوك تۋىمىز ءالى كۇنگە دەيىن نيۋ-يوركتە جەلبىرەپ تۇر. كوپ ۇزاماي-اق الدىمەن امەريكا قۇراما شتاتتارىندا, سودان كەيىن تۇركيادا, ماجارستاندا ەلشىلىكتەر اشىلدى. رەسەيدەگى وكىلدىك ەلشىلىككە اينالدىرىلدى. جالپى, 1992-1993 جىلدارى ەلىمىزدىڭ بۇۇ, رەسەي, قىتاي, اقش, تۇركيا, فرانتسيا, بەلگيا, ۆەنگريا, يران, ءۇندىستان, مىسىر, وزبەكستان, قىرعىزستان, ازەربايجان مەن ۋكرايناداعى ەلشىلىكتەرى مەن وكىلدىكتەرى جۇمىسقا كىرىستى.
بيىل قازاقستان رەسپۋبليكاسى ديپلوماتيالىق قىزمەتىنىڭ 30 جىلدىعى. وسى ۋاقىت ارالىعىندا 180-نەن اسا مەملەكەتپەن ديپلوماتيالىق قاتىناس ورناتىلعان, شەتەلدەردە كوپتەگەن ەلشىلىك اشىلدى. قازاقستاندا 95 شەتەلدىك وكىلدىك جۇمىسقا كىرىستى. ديپلوماتيانىڭ گەوگرافياسى ۇلعايدى. بۇرىن قازاقستاننىڭ قاتىناستارى, نەگىزىنەن ەۋروپاعا, ازياعا جانە سولتۇستىك امەريكاعا باعىتتالعان ەدى. كەيىنگى كەزدە لاتىن امەريكاسى مەن افريكاعا باسىمدىق بەرىلە باستادى. ورتا جانە تاياۋ شىعىسپەن بايلانىس تەرەڭدەپ كەلەدى. بۇگىندە ەلىمىزدىڭ شارتاراپتىڭ تۇكپىر-تۇكپىرىندەگى ەلشىلىكتەرى مەن وكىلدىكتەرى سانى 93-كە جەتتى.
«توعىزىنشى تەرريتوريانىڭ» مەملەكەتتىك تۋى تۇڭعىش رەت حالىقارالىق قوعامداستىق نازارىنا ۇسىنىلعان ءساتى – 1992 جىلعى بارسەلونادا وتكەن وليمپيا ويىندارى دەسەك قاتەلەسپەيمىز. وعان قازاقستان تمد وليمپيادا قۇرامىنىڭ اتىنان قاتىسقانىمەن, ءدۇبىرلى دودانىڭ اشىلۋ سالتاناتىندا بالۋان داۋلەت تۇرلىحانوۆ كوك تۋىمىزدى كوتەرىپ شىقتى. وسى بايراقتى باسەكەدە قازاقتىڭ ابىرويىن اسقاقتاتقان داۋلەت بالۋاننىڭ قولا مەدال يەلەنگەنىن دە ايتا كەتكەن ءجون بولار.
ەكى جىلدان كەيىن ليللەحاممەردە وتكەن قىسقى وليمپياداعا قازاقستان دەربەس مەملەكەت رەتىندە قاتىسىپ, سپورتشىلارىمىز كوك بايراقتىڭ استىندا ونەر كورسەتتى. شاڭعىشى ۆلاديمير سميرنوۆ وليمپيا ويىندارىندا ءۇش جۇلدە جەڭىپ الدى. سونىڭ ءبىرى – التىن مەدال. وسىلايشا, ءانۇرانىمىز تۇڭعىش رەت شىرقالىپ, مەملەكەتتىك تۋىمىز كوككە كوتەرىلدى. ليللەحاممەردەگى وليمپيادا قازاق سپورتشىلارىنىڭ جەڭىستى جىلناماسىنىڭ ىرگەتاسىن قالاپ بەردى. سودان بەرى ساڭلاقتارىمىز 15 مارتە ءانۇرانىمىزدى شىرقاتتى. 25 كۇمىس, 39 قولا جۇلدە جەڭىپ الىپ, وسىنشاما مارتە كوك تۋىمىز كوكتە جەلبىرەدى.
