ۇلىبريتانيا بارلاۋ قىزمەتىنىڭ مالىمەتىنە سۇيەنسەك, رەسەي سەۆەرودونەتسك قالاسىنىڭ كوپ بولىگىن باسىپ العان. ليسيچانسك قالاسىنا اپاراتىن جول ۋكراينانىڭ باقىلاۋىندا. رەسەي اسكەرى ارتيللەريامەن توقتاۋسىز اتقىلاۋدىڭ ارقاسىندا العا ءىلبىپ جىلجىپ كەلەدى. بىراق شىعىنى وراسان دەپ ەسەپتەيدى ۇلىبريتانيا بارلاۋ قىزمەتى.
لۋگانسك وبلىسىن تولىقتاي باقىلاۋعا الىپ, بار قۋاتىن دونەتسك وبلىسىنا سالۋ ءۇشىن رەسەي تاراپى سەۆەرسكي دونەتس وزەنىنىڭ باتىس جاق بەتىنە ءوتۋى قاجەت. قازىرگى تاڭدا وزەن باسقىنشى ارەكەتكە تابيعي تۇردە توسقاۋىل بولىپ وتىر. جالپى وتكەلدەردىڭ كوبى سەۆەرودونەتسك پەن ليسيچانسك قالالارى ماڭىندا ورنالاسقان. سوندىقتان اتالعان شاھارلاردى باسىپ الۋ رەسەي ءۇشىن اسا ماڭىزدى. بىراق ۇلىبريتانيا بارلاۋ قىزمەتى ۋكراينا تاراپى وزەندەردەگى وتكەلدەردىڭ ءبارىن باقىلاۋدا ۇستاپ وتىرعانىن العا تارتادى.
ۋكراينا پرەزيدەنتى ۆولوديمير زەلەنسكي ليۋكسەمبۋرگ پارلامەنتىنىڭ دەپۋتاتتارى الدىندا ءسوز سويلەپ, باتىس ەلدەرىنە كومەك كورسەتكەنى ءۇشىن العىس ءبىلدىردى. ونىڭ ايتۋىنشا, سوعىس باستالعالى رەسەي اسكەرى 3620 ەلدى مەكەندى باسىپ العان. سونىڭ 1017-ءسى ازات ەتىلدى. ەندى 2603 ەلدى مەكەندى بوساتۋ قاجەت.
«قازىرگە دەيىن ەلىمىزدىڭ شامامەن 20 پايىزى, 125 مىڭ شارشى شاقىرىم جەر باسقىنشىلاردىڭ باقىلاۋىندا. بۇل «بەنيليۋكس» ەلدەرىنىڭ ءبارىنىڭ اۋماعىنان الدەقايدا كوپ. شامامەن 300 مىڭ شارشى شاقىرىم جەردە جارىلماعان مينالار مەن سناريادتار بار», دەدى ول.
ۆولوديمير زەلەنسكي ايتقان «بەنيليۋكس» ەلدەرىنە بەلگيا, نيدەرلاند جانە ليۋكسەمبۋرگ كىرەدى. ونىڭ جالپى اۋماعى شامامەن 74 مىڭ شارشى شاقىرىمعا تەڭ. وسى ورايدا, زەلەنسكي ۋكرايناداعى مايدان شەبى مىڭداعان شاقىرىمعا جەتەتىنىن مالىمدەدى. ۋكراينا پرەزيدەنتى ءوز سوزىندە ليۋكسەمبۋرگكە قارۋ-جاراقپەن كومەكتەسكەنى جانە رەسەيگە قارسى سانكتسيالاردى قولداعانى ءۇشىن العىس ايتتى. سونداي-اق ۋكراينانىڭ ەۋروپالىق وداققا مۇشەلىككە ءوتۋىن قولداۋعا شاقىردى.
يرلانديا پارلامەنتىنىڭ جوعارعى پالاتاسى رەسەيدىڭ ۋكرايناداعى ارەكەتتەرىن گەنوتسيد دەپ تانىدى. بۇل تۋرالى سەنات سپيكەرى مارك دەيلي حابارلادى. «رەسەي فەدەراتسياسىنىڭ ۋكرايناعا زاڭسىز باسىپ كىرۋى – گەنوتسيد ارەكەتى. يرلانديا سەناتى رەسەيدىڭ ۋكرايناداعى گەنوتسيدىنە قاتىستى قارار قابىلدادى», دەپ جازدى دەيلي Twitter-دەگى پاراقشاسىندا.
«فۋتبول كورولى», اتى اڭىزعا اينالعان برازيليالىق فۋتبولشى پەلە ۆلاديمير پۋتيننەن ۋكرايناداعى قاقتىعىستى توقتاتۋدى تالاپ ەتتى. داڭقتى سپورتشى ۇندەۋىن ۋكراينانىڭ فۋتبولدان ۇلتتىق قۇراماسى الەم چەمپيوناتىنىڭ ىرىكتەۋ ماتچىندا شوتلانديانى جەڭگەننەن كەيىن جاريالادى.
«بۇگىن ۋكراينا ەلدى شارپىعان تراگەديانى كەم دەگەندە 90 مينۋتقا ۇمىتۋعا تىرىستى. الەم چەمپيوناتىنا قاتىسۋ جولداماسىن يەلەنۋ وڭاي شارۋا ەمەس. بىراق كوپ ادامنىڭ ءومىرى قىل ۇستىندە تۇرعاندا مۇنداي باسەكەگە قاتىسۋ مۇلدەم قيىن. باسقىنشىلىقتى توقتات! زورلىق-زومبىلىقتىڭ جالعاسۋىن اقتاۋعا مۇلدەم بولمايدى», دەپ جازدى «فۋتبول كورولى» ينستاگرامداعى پاراقشاسىندا.
پەلە سونداي-اق 2017 جىلى پۋتينمەن كەزدەسكەنىن, جىلى سويلەسىپ, ۇزاق قول الىسقانىن ەسكە ءتۇسىردى. «كەزدەسكەن كەزدە ەشقاشان ءدال بۇگىنگىدەي پىكىرىمىز ەكىگە جارىلاتىنىن ويلاماپپىن. قاقتىعىستى توقتاتۋ ءوز قولىڭدا», دەيدى پەلە.
گەرمانيانىڭ بۇرىنعى كانتسلەرى انگەلا مەركەل دە ۋكرايناداعى سوعىس تۋرالى پىكىر ءبىلدىردى. ول قاقتىعىستى «ايۋاندىق سوعىس» دەپ اتاپ, ونى تەز ارادا توقتاتۋ كەرەك دەپ مالىمدەدى.
«رەسەي ۋكرايناعا شابۋىل جاساپ, باسىپ الىپ جاتىر. مەن ۋكراينانىڭ ءوزىن-ءوزى قورعاۋ قۇقىعىن قولدايمىن», دەدى ا.مەركەل. ەكس-كانتسلەر ەۋروپالىق وداق مۇشەلەرىن بىرلىككە شاقىرىپ, گەرمانيا بيلىگىنىڭ قاقتىعىستى توقتاتۋعا باعىتتالعان ارەكەتتەرىن قولدايتىنىن جەتكىزدى.
