COVID-19 پاندەمياسى ەلەكتر قۋاتىنا, تازا وتىنعا جانە تاماق ءپىسىرۋ تەحنولوگيالارىنا جالپىعا بىردەي قولجەتىمدىلىكتى باياۋلاتتى. ۋكرايناداعى سوعىستىڭ سالدارى جاڭا قيىندىقتار تۋعىزۋى مۇمكىن.
جاعداي وزگەرمەسە, 2030 جىلعا قاراي 670 ميلليون ادام جارىقسىز قالادى دەپ بولجانىپ وتىر. بۇل تۋرالى بۇۇ بايانداماسىندا ايتىلعان. 2022 جىلعا ارنالعان «ەنەرگەتيكا سالاسىنداعى پروگرەسس تۋرالى» جاڭا ەسەپتى بۇۇ اگەنتتىكتەرى مەن ونىڭ تۇراقتى دامۋ ماقساتتارىنىڭ بىرىنە كىرەتىن تدو-7 كۋراتور-اگەنتتىكتەرى ازىرلەدى.
پاندەميانىڭ اسەرى, سونىڭ ىشىندە كوپتەگەن دۇكەندەردىڭ جابىلۋى, جاھاندىق جەتكىزۋ تىزبەگىنىڭ ءۇزىلۋى جانە ازىق-ت ۇلىك پەن جانارمايدىڭ قولجەتىمدى باعاسىن ۇستاپ تۇرۋ ءۇشىن فيسكالدىق رەسۋرستاردى قايتا ءبولۋ تدو-7-گە جەتۋ قارقىنىنا اسەر ەتتى. پروگرەسس ەڭ وسال جانە ەنەرگەتيكا بويىنشا ارتتا قالعان ەلدەردە باياۋ جۇرگەن. بۇرىن ەلەكتر قۋاتىنا قول جەتكىزگەن ازيا مەن افريكاداعى 90 ميلليونعا جۋىق ادام بۇدان بىلاي جارىق قۇنىن تولەي المايدى.
جالپى افريكا الەمدە ەلەكتر جابدىعىمەن از قامتىلعان ەل بولىپ قالىپ وتىر. قۇرلىقتىڭ 568 ميلليون تۇرعىنى ەلەكتر قۋاتىنا قول جەتكىزە المايدى. ساحارانىڭ وڭتۇستىگىندەگى افريكانىڭ ەلەكتر قۋاتىنا قول جەتكىزە المايتىن حالقىنىڭ ۇلەسى 2020 جىلى 77%-عا دەيىن وسكەن.
