كەزدەسۋدە ەقىۇ اياسىنداعى ىنتىماقتاستىقتىڭ كەڭ اۋقىمدى ماسەلەلەرى تالقىلاندى. اڭگىمەلەسۋ بارىسىندا ز.راۋ پولشانىڭ ۇيىمعا توراعالىعىن قولداعانى ءۇشىن قازاقستان تاراپىنا العىسىن ءبىلدىردى.
ا.راحمەتۋللين قازاقستاننىڭ الداعى ۋاقىتتا دا ۇيىمنىڭ جۇمىسىنا ۇلەس قوسۋعا دايىن ەكەنىن راستادى. سونداي-اق ەقىۇ-نىڭ اسكەري-ساياسي, ەكونوميكالىق-ەكولوگيالىق جانە گۋمانيتارلىق سالالارىن جۇزەگە اسىرۋدا تەڭگەرىمدى كوزقاراس ساقتاۋ قاجەتتىگىن اتاپ ءوتتى.
كۇن تارتىبىندەگى حالىقارالىق ماسەلەلەردى تالقىلاي وتىرىپ, تاراپتار ايماقتاعى گەوساياسي شيەلەنىستىڭ ارتۋىنا بايلانىستى ءىس باسىنداعى توراعالىق الدىندا تۇرعان قيىندىقتارعا نازار اۋداردى. وسى تۇرعىدا ديپلوماتتار ۇيىمعا قاتىسۋشى مەملەكەتتەر اراسىندا قاۋىپسىزدىك سالاسىنداعى سەنىمدى قالپىنا كەلتىرۋ جانە ىنتىماقتاستىقتى نىعايتۋ شارالارى تۋرالى پىكىر الماستى.
سونىمەن قاتار كەلىسسوزدەر كەزىندە قازاقستاننىڭ ساياسي ترانسفورماتسياسى جانە قازاقستان كونستيتۋتسياسىنا وزگەرىستەر مەن تولىقتىرۋلار ەنگىزۋ بويىنشا الداعى جالپىحالىقتىق رەفەرەندۋم دا ءسوز بولدى. سىرتقى ىستەر ءمينيسترىنىڭ ءبىرىنشى ورىنباسارى پولشالىق ارىپتەسىنە «جاڭا قازاقستاندى» قۇرۋعا جانە «ەكىنشى رەسپۋبليكانى» قالىپتاستىرۋعا باعىتتالعان رەفورمالاردى جۇزەگە اسىرۋ بارىسى تۋرالى اڭگىمەلەپ بەردى.
كەزدەسۋ سوڭىندا تاراپتار قازاقستان مەن پولشانىڭ كوپجاقتى فورماتتاعى ءتيىمدى ىنتىماقتاستىعىن اتاپ ءوتىپ, ديالوگتى جالعاستىرۋعا كەلىستى. كەلىسسوزدەردەن كەيىن ديپلوماتتار بۇقارالىق اقپارات قۇرالدارىنا ارناپ بريفينگ وتكىزدى.
«بيىل ءبىز قوس مەرەيتويدى اتاپ وتەمىز. قازاقستان رەسپۋبليكاسىنىڭ ەقىۇ-عا قوسىلعانىنا جانە ەلىمىز بەن پولشا اراسىندا ديپلوماتيالىق قاتىناس ورناعانىنا 30 جىل تولدى. مينيستر ز.راۋدىڭ ساپارى وسىنداي مەرەيتويلىق داتا اياسىندا ءوتۋىنىڭ سيمۆولدىق ءمانى بار», دەدى سىرتقى ىستەر ءمينيسترىنىڭ ءبىرىنشى ورىنباسارى.
«قازاقستان اسكەري-ساياسي, ەكونوميكالىق-ەكولوگيالىق جانە گۋمانيتارلىق سالالاردا ەقىۇ-مەن بەلسەندى ءوزارا ءىس-قيمىل جاسايدى. ەلىمىز 2010 جىلعى 1-2 جەلتوقساندا استانادا ەقىۇ-عا قاتىسۋشى ەلدەردىڭ مەملەكەت جانە ۇكىمەت باسشىلارىنىڭ ءسامميتىن وتكىزدى. بىرىڭعاي جانە بولىنبەيتىن ەۋرو-اتلانتيكالىق جانە ەۋرازيالىق قاۋىپسىزدىك قوعامداستىعىنىڭ پايىمى بەلگىلەنگەن «قاۋىپسىزدىك قوعامداستىعى جولىندا» استانا دەكلاراتسياسىن قابىلداۋ ارقىلى ۇيىمنىڭ دامۋىنا ەلەۋلى ۇلەس قوستى.
وسى جىلدار ىشىندە دوستىق پەن سەنىمگە نەگىزدەلگەن قازاقستاندىق-پولياك سەرىكتەستىگى نىعايىپ, وڭ باعىتتا دامۋىن جالعاستىرىپ وتىر. بۇعان ەكىجاقتى جانە كوپجاقتى فورماتتاعى ءوزارا كونسترۋكتيۆتى ارەكەتتەستىك جانە بەلسەندى ساۋدا-ەكونوميكالىق ءارى ينۆەستيتسيالىق ىنتىماقتاستىق دالەل بولا الادى. پولشا – قازاقستاننىڭ ورتالىق جانە شىعىس ەۋروپا وڭىرىندەگى ماڭىزدى جانە پەرسپەكتيۆالى ارىپتەسى. پولشانىڭ ورتالىق ازياداعى نەگىزگى سەرىكتەسى بولۋعا دەگەن ۇمتىلىسىمىزدى راستايمىز», دەپ اتاپ ءوتتى ا.راحمەتۋللين.
