باسقوسۋدا الدىمەن ءسوز العان رەفەرەندۋمدى قوعامدىق قولداۋ جونىندەگى رەسپۋبليكالىق شتابتىڭ توراعاسى تولەۋبەك مۇقاشەۆ رەفەرەندۋمدى قولداۋ شتابى ءماجىلىس دەپۋتاتتارىنىڭ باستاماسىمەن قۇرىلعانىن اتاپ ءوتتى. شتاب قۇرىلا سالا جەر-جەرلەردە حالىقپەن كەزدەسىپ, ناسيحات جۇمىستارىن جۇيەلى جۇرگىزە باستاعان.
– وسى ۋاقىتقا دەيىن وڭتۇستىك, سولتۇستىك جانە باتىس وڭىرلەردە حالىقپەن كەزدەسىپ, كونستيتۋتسيالىق رەفورمانى تالقىلادىق. كەزدەسۋ كەزىندە حالىقتىڭ ۇسىنىس-پىكىرلەرىن ءتۇرتىپ الىپ وتىردىق. ءبىز ءۇشىن ءار ازاماتتىڭ پىكىرى ماڭىزدى, – دەيدى رەسپۋبليكالىق شتابتىڭ توراعاسى تولەۋبەك مۇقاشەۆ.
ال رەسپۋبليكالىق كاسىپوداقتار فەدەراتسياسى توراعاسىنىڭ ورىنباسارى نۇرلان وتەشەۆ كونستيتۋتسيالىق رەفورمالاردىڭ حالىق ءۇشىن ماڭىزدىلىعىن تۇسىندىرۋدە كاسىپوداق ۇيىمدارى بەلسەندى ەكەنىن ايتتى.
– رەفەرەندۋم قوعامدى دەموكراتيالاندىرۋ ماقساتىندا جاسالىپ جاتقانىن ءتۇسىنۋىمىز كەرەك. ەستىگەن بولساڭىزدار, جيىرمادان استام زاڭعا تۇزەتۋلەر مەن وزگەرتۋلەر ەنگىزىلەدى. سونىڭ ىشىندە كونستيتۋتسيالىق سوت قۇرىلادى. بۇل ءبىز ءۇشىن وتە ءتيىمدى. ماسەلەن, زاڭعا قاراما-قايشى نورمالار بويىنشا ءماجىلىس ارقىلى كونستيتۋتسيالىق كەڭەسكە جۇگىنىپ جۇرگەنبىز. ەندى تىكەلەي سوت دارەجەسىندەگى قۇزىرلى ورگانعا جۇگىنە الاتىن بولامىز. دەمەك, ورىن العان پروبلەمالار جەدەل شەشىلەدى, – دەيدى ن.وتەشەۆ.
د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىندە وتكەن جيىندا رەفەرەندۋمدى قولداۋ جونىندەگى شىعىس قازاقستان وبلىستىق شتابىنىڭ توراعاسى ولەگ چەرنىشوۆ كونستيتۋتسيالىق رەفورمالاردى ۇشكە ءبولىپ تالقىلادى.
– بىرىنشىدەن, پرەزيدەنت اتا زاڭعا ەنگىزىلەتىن تۇزەتۋلەردى جالپىحالىقتىق رەفەرەندۋمعا شىعاردى. ەكىنشىدەن, وبلىستاردا رەفەرەندۋمدى قولداۋ شتابتارى قۇرىلدى. ۇشىنشىدەن, وزىمىزدە اتقارىلعان شارۋالارعا توقتالار بولسام, شتابتىڭ كەستەسىنە ساي
1 600 ءىس-شارا وتكىزىپ, 200 مىڭنان استام ادامعا ۇگىت-ناسيحات جۇرگىزىلگەن. ءۇشىنشى – زاڭ شىعارۋ كەزەڭى. قابىلداناتىن زاڭنامالار ءتيىمدى بولۋى ءۇشىن قازىرگى شتابتاردى ساقتاعان ءجون. سەبەبى زاڭ قابىلدانار ساتتە حالىقتىڭ تىلەگىن ءبىلىپ وتىرۋ قاجەت, – دەپ ۇسىنىس ايتتى ولەگ چەرنىشوۆ.
بۇل ۇسىنىستى تولەۋبەك مۇقاشەۆ بىردەن قولدادى. سونىمەن قاتار كەلەلى جيىندا بەسقاراعاي اۋداندىق رەفەرەندۋمدى قولداۋ جونىندەگى قوعامدىق شتابتىڭ توراعاسى ەربولات راحمەتۋللين, التاي اۋداندىق ءماسليحاتىنىڭ حاتشىسى لاريسا گرەچۋشنيكوۆا ءوز وڭىرلەرىندەگى رەفەرەندۋمعا دايىندىقتارىن ءسوز ەتتى.
شىعىس قازاقستان وبلىستىق ءماسليحاتىنىڭ حاتشىسى دەنيس رىپاكوۆ دەپۋتاتتاردىڭ حالىققا ءتۇسىندىرۋ جۇمىسىمەن جۇيەلى تۇردە اينالىسىپ جۇرگەنىن ايتتى.
– كونستيتۋتسيالىق رەفورما قابىلدانسا, ءماسليحات دەپۋتاتتارىنىڭ وكىلەتتىگى ارتادى. بىراق ۇلكەن جاۋاپكەرشىلىك جۇكتەلەدى دەپ ويلايمىن. ادىلەتتى قازاقستان ءۇشىن ءبارىمىز ءبىر كىسىدەي داۋىس بەرەيىك, – دەدى دەنيس رىپاكوۆ.
البەتتە, جيىن سوڭىندا تۇرعىنداردىڭ دا ۇسىنىس-پىكىرلەرى تىڭدالدى. بارلىعى دەرلىك وزگەرىستىڭ كەرەكتىگىن ايتتى.
شىعىس قازاقستان وبلىسى
