اباي مەن شاكارىم شىعارمالارىن حالىقتىڭ ساناسىنا سىڭىرە ءتۇسۋ, وقۋشىلاردىڭ شىعارماشىلىق قابىلەتتەرىن دامىتۋ ماقساتىندا وتكىزىلگەن سايىس 6 اتالىمنان تۇردى: «ولەڭ – ءسوزدىڭ پاتشاسى, ءسوز ساراسى», «ابايدىڭ قارا سوزدەرى» بولىمدەرىندە اقىننىڭ ولەڭدەرىن, قاراسوزدەرىن مانەرلەپ, جاتقا وقىدى. «ابايدىڭ اقىن شاكىرتتەرىنىڭ شىعارمالارى» اتالىمىندا شاكارىم قۇدايبەردى ۇلىنىڭ, اقىلباي, ماعاۋيا ابايۇلدارىنىڭ شىعارمالارىن وقىپ سايىستى. ال «كوڭىلىم ءاندى ۇعادى» ءبولىمى سايىستىڭ كورىگىن تىپتەن قىزدىردى. وقۋشىلار اباي مەن شاكارىمنىڭ اندەرىن, كۇيلەرىن ورىنداپ كوپشىلىكتى تاڭداي قاقتىردى. «جۇيرىكتەن جۇيرىك وزار, جارىسقاندا» دەي-تۇعىن بولىمدە ونەرلى وقۋشىلار ءوز شىعارماشىلىقتارىن ورتاعا سالدى. ال « ۇلىلار الەمى» بولىمىندە اباي مەن شاكارىمنىڭ شىعارماشىلىعى, رۋحاني بولمىسى تۋرالى ەسسە جازىستى.
وقۋشىلاردىڭ دايىندىعى جوعارى بولدى ما, الدە ابايدىڭ توپىراعى تەبىرەنتتى مە, ولەڭدى دە, قاراسوزدى دە سۇرىنبەي وقىدى. ءماتىننىڭ مازمۇنىنا قاراي داۋىستارىن بىردە كوتەرىپ, بىردە باسەڭدەتىپ, مىڭ قۇبىلتتى. كورەرمەن دە بەرىلە تىڭدادى. ال ابايدىڭ اندەرى قۇلاقتان كىرىپ, بويدى الدى. ەسسە جازۋدا دا وقۋشىلار ەرەكشە كوزگە ءتۇستى. جازۋ ءستيلى وزگەشە بالالاردىڭ بولاشاعىنان زور ءۇمىت كۇتۋگە بولاتىن سەكىلدى.
– ءوزىم العاش اباي وقۋلارى باستالعاندا كورەرمەنى بولدىم, ءوزىم قاتىستىم. ايتايىن دەگەنىم, ابايدى, شاكارىمدى جاتتاپ وسكەن بالالار قازىرگى تاڭدا ومىردە ءوز ورىندارىن تاپقان ۇلگىلى جاستار. ياعني قازىرگى وقۋشىلاردىڭ دا بولاشاعى زور. بۇرىن رەسپۋبليكالىق اباي وقۋلارى اقىننىڭ تۋعان جەرىندە ءوتىپ كەلگەن. ال وبلىستىق كەزەڭى تۇڭعىش رەت اباي اۋدانىندا ۇيىمداستىرىلدى. وقۋشىلاردىڭ دايىندىقتارى وتە جاقسى. ءبىز ءۇشىن جۇلدەگەرلەردى انىقتاۋ وڭاي بولعان جوق, – دەيدى ادىلقازىلار القاسىنىڭ توراعاسى نۇرجان ءبايتوس.
بۇل جولعى اباي وقۋلارىنىڭ ەرەكشەلىگى, ماراپاتتاۋ ءراسىمى اباي-شاكارىم كەسەنەسىندەگى امفيتەاتردا ۇيىمداستىرىلدى. التى سىننان سۇرىنبەي وتكەن جارما, اياگوز, تارباعاتاي, شەمونايحا اۋداندارىنىڭ جانە ريددەر قالاسىنىڭ وقۋشىلارى قازىلاردىڭ جوعارى باعاسىنا يە بولدى. ال گلۋبوكوە اۋدانى م.عابۋللين اتىنداعى ورتا مەكتەبىنىڭ وقۋشىسى گ ۇلىم دانيارعا اباي اۋدانى اكىمىنىڭ ارنايى سىيلىعى تابىستالدى.
اباي وقۋلارىنىڭ قورىتىندىسى بويىنشا 1-ورىنمەن – 6 وقۋشى, 2-ورىنمەن – 12 وقۋشى, 3-ورىنمەن 21 وقۋشى ماراپاتتالدى. ءبىر وقۋشىعا اباي اۋدانىنىڭ اكىمى العىس حات پەن سىيلىق تابىستادى. جالپى جۇلدەگەرلەرگە سىيلىقتار مەن ديپلومدار تابىس ەتىلدى. ال بارلىق قاتىسۋشىلارعا سەرتيفيكاتتار بەرىلدى.
سالتاناتتى ءىس-شارادان سوڭ وقۋشىلار جيدەبايداعى اباي مۋزەيىن ارالاپ, سول زامانىنىڭ رۋحىن سەزىنگەندەي بولدى. ادەبيەتتەن, تاريحتان وقىعان جەرگە اياق باسىپ, كوزبەن كورۋ – وقۋشىلار ءۇشىن باقىتتى ءسات. تاريحي مەكەنگە جولدارى تۇسكەن ولار ەۋرازيا كىندىگىندە ەستەلىك فوتوعا ءتۇستى.
شىعىس قازاقستان وبلىسى
