وتكىزىلىپ جاتقان وقۋ-جاتتىعۋدىڭ ماقساتى – شەكارالاس اۋماققا قاۋىپ توندىرەتىن ءىرى تابيعي ورتتەردى جويۋ كەزىندەگى ءوزارا ءىس-قيمىلدى جەتىلدىرۋ.
«ەكى ەلدىڭ شەكارالاس وڭىرلەرىندەگى ءورت سوندىرۋشىلەر الدىندا استراحان وبلىسى احتۋبين اۋدانىنداعى شارتتى ءورتتى ءسوندىرۋ مىندەتى تۇر. ويتكەنى تابيعي دالا ءورتى سول اۋدانداعى تومەنگى باسقۇنشاق ەلدى مەكەنىنىڭ, سونداي-اق «بوگدينسكو-باسقۇنشاق» مەملەكەتتىك قورىعى مەن قازاقستان رەسپۋبليكاسىنىڭ اۋماعىن قوسا شارپىعان. ورتتە دە كەز كەلگەن تابيعي اپاتتار سەكىلدى شەكارا جوق. سوندىقتان تابيعي اپاتتارعا قارسى تۇرۋ, ۋاقىتىلى ەڭسەرۋ ءۇشىن وسىنداي بىرلەسكەن ءىس-قيمىلداردى پىسىقتاۋدىڭ ماڭىزى زور», دەدى اتىراۋ وبلىستىق توتەنشە جاعدايلار دەپارتامەنتىنىڭ باستىعى, ازاماتتىق قورعاۋ پولكوۆنيگى ءسابيت بيتاەۆ.
بىرلەسكەن وقۋ-جاتتىعۋلارعا رەسەي فەدەراتسياسى توتەنشە جاعدايلار مينيسترلىگىنىڭ استراحان وبلىسى بويىنشا باس باسقارماسى مەن اتىراۋ وبلىستىق توتەنشە جاعدايلار دەپارتامەنتىنىڭ جەكە قۇرامىنان 154 ادام مەن 41 ارنايى تەحنيكا تارتىلعان.
