ءبىلىم • 01 ماۋسىم، 2022

ءبىلىم وشاعىنا ەرىكتىلەر جوباسى سەرپىن بەرەدى

47 رەت كورسەتىلدى

جەرگىلىكتى جاستار قاۋىمداستىقتارىنا، ءبىلىم بەرۋ سالاسىنا قولداۋ كورسەتۋ ماقساتىندا الماتى وبلىسى ۇزىناعاش اۋىلىنداعى سەيداحمەت بەردىقۇلوۆ اتىنداعى مەكتەپ ۇجىمى مەن «كومۋنيتيپليۋس» مادەني-الەۋمەتتىك، ءبىلىم بەرۋدى دامىتۋ قورىنىڭ بىرلەسىپ اتقارعان جوباسى ناتيجەلى اياقتالدى.

«كومۋنيتيپليۋس» توبى سوڭعى 6 جىلدا قوسىمشا ءبىلىم بەرۋدى دامىتۋ سالاسىندا جۇمىس ىستەي وتىرىپ، بالالار مەن ەرەسەكتەرگە ارنالعان داعدىلاردى دامىتۋعا، بوس ۋاقىتتى ءتيىمدى وتكىزۋگە ارنالعان وقۋ باعدارلامالارىنا اتسالىسىپ كەلەدى. قوعامدىق قور بىلتىر قازاق ورتا مەكتەپتەرى مۇعالىمدەرىنىڭ قاۋىم­داس­تىعىن قولداۋدى ماقسات ەتە وتىرىپ، Ustazdan Ustazga جوباسىن باستاعان بولاتىن.

قاڭتار وقيعاسىنان كەيىن ەلىمىزدىڭ ازاماتتىق سەكتورىنىڭ بەلسەندى بولىگى اۋىل مەن قالا اراسىنداعى الەۋمەتتىك ماسەلەلەرگە ەرەكشە كوڭىل بولە باستادى. اسىرەسە اۋىل جاستارىنىڭ بىلىمگە تولىق قولجەتىمدىلىگى مەن الەۋمەتتىك مۇم­كىندىكتەرىنىڭ تومەندىگىنە الاڭداۋ­شى­لىق ءبىلدىرىپ، ەرىكتىلەر مەن ءتۇرلى سالا ما­ماندارى pro bono جوباسىنا، وڭىرلىك جوبالارعا قولداۋ بىلدىرە باستادى. وسى ورايدا پەداگوگتەر قوعامداستىعى مەن مەك­تەپ وقۋشىلارىن قولداۋدىڭ زاماناۋي تاجىريبەسى رەتىندە ناتيجەسىن بەرگەن «كومۋنيتيپليۋس» كەيسىن ساراپشىلار ۇلت­تىق باعدارلامانىڭ ءبىر بولىگى رەتىندە ەلى­مىز­دىڭ باسقا دا وڭىرلەرىندە جۇزەگە اسىرۋ مۇم­كىندىگى زور دەگەن توقتامعا كەلدى.

جوبا قاتىسۋشىلارىنىڭ دەرەگىنشە، سەي­داحمەت بەردىقۇلوۆ اتىنداعى مەكتەپتە 2 500 وقۋشى ءبىلىم الىپ، 200-دەي پەداگوگ ەڭبەك ەتەدى. اتالعان جوبا بىلتىر مامىر ايىندا مەكتەپتىڭ بەلسەندى ۇستازدارىنىڭ باستاماسىمەن قولعا الىنعان. ەرىكتىلەردىڭ كومەگىمەن مەكتەپ جانىنداعى قوسالقى عيمارات مەكتەپ مەرەكەلەرى، ترەنينگتەر، بالالاردىڭ بەيرەسمي كەزدەسۋلەرى وتەتىن مادەنيەت ۇيىنە اينالىپ، ءبىر جىل ىشىندە «كومۋنيتيپليۋس» قورىنىڭ قول­داۋىمەن قارجىلىق ساۋاتتىلىق، كاسىپ­كەر­لىك، جاساندى ينتەللەكت نەگىزدەرى، توپ­ت­ىق جۇمىس، جوبالىق بەلسەندىلىك، ءتىل تابىسۋ داعدىلارىن دامىتۋ بويىنشا 20-دان استام جوبا بويىنشا ونلاين جانە وفلاين ترەنينگتەر ءوتتى. مىسالى، وتكەن جىلدىڭ قاراشا ايىندا قازاق باس ساۋلەت-قۇرىلىس اكادەمياسىنىڭ دي­زاين كافەدراسىنىڭ وقىتۋشىلارى مەن ستۋدەنتتەرى جانە Optimus.kz كوم­پا­­نيا­سى­نىڭ قولداۋ كورسەتۋىمەن 49 سى­نىپ­تىڭ وقۋشىلارى «#49اعاش» مۋرالىن سالىپ، شىعارماشىلىق جۇمىس كوميۋنيتي-ورتالىق قابىرعاسىنىڭ سانىنە اينالدى. وسى ورايدا الەۋمەتتىك كىتاپحانا جۇ­مى­سى­نىڭ ۇتىمدى ۇيىمداستىرىلعانىن دا ايتا كەتكەن ءجون. ال جىل باسىندا كوممۋنيكاتسيا ساراپشىسى لاتينا ساتاروۆا مەكتەپ مۇعالىمدەرى مەن جوعارى سىنىپ وقۋشىلارى ءۇشىن كوممۋنيكاتيۆتى داعدىلاردى دامىتۋ بويىنشا بىرقاتار ترەنينگ وتكىزسە، ناۋرىزدا بەلگىلى PR-مامان، كاسىپتىك كەڭەسشى داريا بۋبليكتىڭ باستاماسىمەن اۋىل مەكتەپتەرىندەگى با­لا­لاردىڭ ءوزىن ءوزى تانۋدى زەرتتەۋ جو­باسى ىسكە قوسىلدى. ەلىمىزدە ءبىلىم بەرۋ­دى دا­مى­تۋعا ىنتالى توپ پەن مەكتەپ وقۋ­شى­لارى، قوعامدىق جۇمىستارعا بىرىككەن تاۋەلسىز قازاقستاندىق كاسىپتىك باعدار بەرۋ قىزمەتكەرلەرى جوبا اياسىندا ءوز بولاشاعىنا بەيقام، قوعامدىق ومىردەن الشاق بالالاردىڭ بار ەكەنىن انىقتادى. ساراپشىلار مۇنداي بالالارمەن جەڭىل ويىن فورماتىندا جۇمىستار جۇرگىزىپ، ءوز ورتاسىمەن ءتىل تابىسۋ، ۇجىمعا كىرىگۋ داعدىلارىنا باۋلىدى. سونىمەن بىرگە قوردىڭ الەۋمەتتىك جوباسىنا «بيلاين قازاقستان» كومپانياسى قولداۋ ءبىلدىرىپ، س.بەردىقۇلوۆ اتىنداعى مەكتەپتە جوعارى جىلدامدىقتى ينتەرنەتتى ءبىر جىلعا تەگىن پايدالانۋعا بەرىلدى.

«كومۋنيتيپليۋس» قورىنىڭ نەگىزىن قا­لاۋ­شى ەل كارمانوۆا جوبانىڭ قوعامعا قاجەت ەكەنىن العا تارتىپ، اۋىل مەن قالا اراسىنداعى كوممۋنيكاتسيا ىسپەتتى ەكەنىن اتاپ ءوتتى. ونىڭ ايتۋىنشا، قوعامدىق ورتالىقتاردا اۋىل جاستارى وزدەرىن دامىتۋعا، قانداي دا ءبىر يگى ىستە ءوز ۇلەسى بار ەكەنىن سەزىنۋگە مۇمكىندىك الادى. جاستار ءۇشىن جاسالعان قولايلى ورتا قاۋىپسىزدىكتىڭ كۇشەيۋىنە ىقپال ەتەدى. جوبا جىلدام جۇزەگە اسا قويماعانىمەن، 2-3 جىل ىشىندە ناتيجەسىن بەرەتىنى ءسوزسىز. «جو­بانى جالعاستىرۋعا بەل بۋا وتىرىپ، الماتى وبلىسىنىڭ مەكتەپتەرىنەن وتى­نىش­تەر جيناپ، ارنايى بازا قۇرۋدى جوس­پارلاپ وتىرمىز. سودان كەيىن بارىپ مەكتەپتەرگە كومەكتەسكىسى كەلەتىن ماماندار مەن ساراپشىلارمەن بولىسەمىز. تاجىريبە كورسەتكەندەي، قالا بەلسەندىلەرىنىڭ اۋىلعا كومەگىمىز قاجەت ەمەس دەپ جۇرگەن پىكىرى نەگىزسىز»، دەپ اتاپ ءوتتى ە.كارمانوۆا. وسى ورايدا داريا بۋبليكتىڭ ايتۋىنشا، الەۋمەتتىك ماسەلەلەردى شەشۋ ۇنەمى قارا­جاتقا تىرەلە بەرمەيدى. ەڭ باستىسى، ماقساتى ءبىر قامقورشى ازاماتتاردىڭ بەلسەندىلىگى قاجەت. كاسىپتىك باعدار بەرۋ جوباسىنىڭ ناتيجەسىندە 400-دەن استام مەكتەپ وقۋشىسى edunavigator.kz باعدار بەرۋ تەستىلەۋىنەن جانە مامانداردىڭ جەكە كەڭەسىنەن وتۋگە مۇمكىندىك العان. ال مەكتەپ ديرەكتورىنىڭ تاربيە ءىسى جونىندەگى ورىنباسارى اينۇر سادىقوۆا اتاپ وتكەندەي، بۇل جوبا مەكتەپ ۇجىمىنا ۇلكەن سەرپىن بەردى. ءبىر جىلدا مۇعالىمدەر دامۋعا كەدەرگى بولىپ كەلگەن جايتتاردى انىقتاپ، جاڭا داعدىلاردى يگەرۋگە مۇمكىندىك الدى. مەكتەپ وقۋشىلارىنىڭ قارجىلىق ساۋاتتىلىق پەن كاسىپكەرلىك نەگىزدەرىن دامىتۋ كۋرستارىنا قاتىسۋى ومىرلىك جولدا كادەگە جارايتىنى انىق.

«كومۋنيتيپليۋس» قق ديرەكتورى مەيىرجان قۇرمانوۆ جوبا تاريحىمەن تانىستىرا كەلىپ، اۋىل مەكتەبىمەن ىنتىماقتاستىق جوباسىنا امەريكا ال­ماسۋ باعدارلامالارى تۇلەكتەرىنىڭ ۇلت­تىق قاۋىمداستىعى مەن قازاقستانداعى اقش ديپلوماتيالىق ميسسياسى قولداۋ كورسەتكەنىن اتاپ ءوتتى. «بولىنگەن گرانت ءبىزدىڭ ۇجىمعا اي سايىن ۇزىناعاش اۋىلىنا بارىپ، بالالارعا ترەنينگتەر مەن باسقا دا تاربيەلىك شارالار وتكىزۋگە مۇمكىندىك بەردى. ەندى جوبا ءوزىنىڭ تۇراقتىلىعىن دالەلدەي وتىرىپ، ىنتىماقتاستىقتى كەڭەيتۋ الاڭىنا، ۇزىناعاش اۋىلىنداعى جاستار قاۋىمىنىڭ دامۋىندا ناتيجەسىن بەرگەن يگى جوباعا اينالدى»، دەپ اتاپ ءوتتى.

جوبا قاتىسۋشىلارى ۇسىنعان دەرەك بويىنشا، الداعى وقۋ جىلىندا ۇزىناعاش اۋىلىنداعى جوبانى جالعاستىرۋ ءۇشىن 13 ملن تەڭگە شاماسىندا قاراجات قا­جەت. ساراپشىلار وزدەرى بەتپە-بەت كەل­گەن كەدەرگىلەرگە توقتالىپ، اۋىل مەك­تەپ­­تەرىمەن ىنتىماقتاستىقتا تۋىنداي­تىن ماسەلەلەردىڭ ستاندارتتى ەمەس شەشىم­دە­رىن ۇسىنىپ، كەلەشەكتە اۋىلدىق ەلدى مەكەندەردى دامىتۋ ىسىنە قوعام ومىرىنە بەيجاي قارامايتىن ازاماتتاردى شاقىرادى.

 

الماتى

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار