ماڭىزدى ساياسي وقيعاعا ساناۋلى كۇن قالعاندا وبلىس اكىمدىگىندە رەفەرەندۋم وتكىزۋگە دايىندىق بارىسىن تالقىلاعان كەڭەيتىلگەن وتىرىس ءوتتى. وعان وبلىستىق رەفەرەندۋم كوميسسياسىنىڭ مۇشەلەرى, دەپارتامەنتتەر مەن باسقارمالاردىڭ باسشىلارى, بەينەسەلەكتور رەجىمىندە – قالالار مەن اۋدانداردىڭ اكىمدەرى جانە اۋماقتىق رەفەرەندۋم كوميسسيالارىنىڭ توراعالارى قاتىستى.
قاراعاندى وبلىستىق رەفەرەندۋم كوميسسياسىنىڭ توراعاسى ەرقارا ايماعامبەتوۆ رەفەرەندۋمعا دايىندىقتىڭ شەشۋشى كەزەڭگە جەتكەنىن اتاپ ءوتتى.
– جەرگىلىكتى اتقارۋشى ورگاندارمەن بىرلەسىپ قىرۋار جۇمىس اتقارىلدى. بۇگىندە بارلىق ۋچاسكە 100 پايىزعا دايىن دەپ ايتۋعا بولادى. ماتەريالدىق-تەحنيكالىق بازا تولىق قامتاماسىز ەتىلگەن. مۇمكىندىگى شەكتەۋلى جاندارعا ەرەكشە كوڭىل ءبولىندى. سايلاۋشىلار ءتىزىمىن ناقتىلاۋ جالعاسۋدا, – دەدى ە.ايماعامبەتوۆ.
وتىرىس بارىسىندا ءسوز العان قۇقىق قورعاۋ ورگاندارى مەن بىرقاتار باسقارمانىڭ باسشىلارى دا رەفەرەندۋمعا ازىرلىكتىڭ ويداعىداي ءجۇرىپ جاتقانىن باياندادى.
ەسكە سالا كەتسەك, وبلىس ورتالىعى قاراعاندىدا 179 ۋچاسكە بار. وندا داۋىس بەرەتىن سايلاۋشىلار سانى 330 872 ادام بولادى. قاراعاندى قالاسىنىڭ اكىمى ەرماعانبەت بولەكپاەۆ بۇل جاۋاپتى ساياسي ءىس-شاراعا دايىندىقتىڭ جوعارى دەڭگەيدە ەكەنىن ايتتى.
سونداي-اق رەفەرەندۋم قارساڭىندا تەمىرتاۋ قالاسىنداعى قاراعاندى يندۋستريالدىق ۋنيۆەرسيتەتىندە «جاڭا قازاقستان: جاڭا كوزقاراس» دەگەن اتاۋمەن قالالىق ءماسليحاتتىڭ دەپۋتاتتارىمەن كەزدەسۋ ءوتتى.
ءىس-شارا بارىسىندا تەمىرتاۋ قالالىق ءماسليحاتىنىڭ حاتشىسى الەكسەي لوماكين «كونستيتۋتسيالىق رەفورمالار تۋرالى» تاقىرىبىندا بايانداما جاساپ, اتا زاڭعا ەنگىزىلگەلى جاتقان وزگەرىستەردىڭ ومىرشەڭدىگىن, وزەكتىلىگىن ايتىپ, رەفەرەندۋمعا تۇرعىنداردىڭ وڭ كوزقاراسپەن قاراۋىنىڭ وتە ماڭىزدى فاكتور ەكەنىن ەرەكشە اتاپ ءوتتى.
سونداي-اق «رەفەرەندۋم – حالىقتىڭ ءوز ەركىن ءبىلدىرۋدىڭ ءبىر نىسانى» تاقىرىبىندا بايانداما جاساعان قازاقستان تاريحى, الەۋمەتتىك-گۋمانيتارلىق پاندەر كافەدراسىنىڭ مەڭگەرۋشىسى ماعيرا سولتان بۇل ساياسي ءىس-شارانىڭ جاڭا قازاقستان تاريحىندا وتە جاۋاپتى ءرول وينايتىنىنا باسا ءمان بەردى.
قالالىق ءماسليحاتتىڭ دەپۋتاتى ساۋلە دۇيسەباەۆا, قيۋ-ءدىڭ ستۋدەنتتەر پارلامەنتىنىڭ پرەزيدەنتى ارايلىم تىلەۋبەكتىڭ سوزدەرى دە وسى ارنادا توعىستى. بار ماقسات – الداعى بولاتىن ماڭىزدى وقيعا – كونستيتۋتسياعا وزگەرىستەر مەن تولىقتىرۋلار ەنگىزۋ بويىنشا وتەتىن رەفەرەندۋمنىڭ ويداعىداي وتۋىنە ءبىر كىسىدەي اتسالىسۋ.
قاراعاندى وبلىسى
