ساپا بيىگىنە كوتەرىلۋ ەل ۇستانىمىنا اينالۋى ءتيىس

كەشە “نۇر وتان” حدپ ورتالىق اپپاراتىندا 2011-2020 جىلدارعا ارنالعان قازاقستان رەسپۋبليكاسىندا ءبىلىمدى دامىتۋدىڭ مەملەكەتتىك باعدارلاماسى جوباسىنا ارنالعان دوڭگەلەك ۇستەل ءوتتى. وعان بيلىك پارتياسى توراعاسىنىڭ ءبىرىنشى ورىنباسارى نۇرلان نىعماتۋلين, ءبىلىم بەرۋ مەكەمەلەرى مەن مەملەكەتتىك ورگاندار وكىلدەرى, ساراپشىلار مەن عالىمدار قاتىستى. وتىرىس بارىسىندا اتالعان باعدارلاما جوباسى قىزۋ تالقىلاندى. دوڭگەلەك ۇستەلدە ءبىلىم سالا­سى­نىڭ “قازانىندا” جاتقان سان قىرلى ماسەلە كۇن تارتىبىنە قويىلدى. ولار: ورتا, كاسىبي جانە جوعارى ءبىلىم بەرۋ سالا­لا­رىنداعى باسقارۋ جانە قارجى­لان­دىرۋ جۇيەسىن جانداندىرۋ, مەكتەپكە دەيىنگى تاربيە مەن وقى­تۋ جۇيەسىن دامىتۋ, 12 جىل­دىق ءبىلىم بەرۋ, ءبىلىم بەرۋ ساپا­سىن وڭىرلىك تۇرعىدان تەڭەستىرۋ. نۇرلان نىعماتۋلين ء“بىلىم بەرۋ جۇيەسىن دامىتۋ – مەملەكەت باسشىسىنىڭ, پارتيا توراعاسىنىڭ ۇنەمى نازارىندا تۇرادى. سەبەبى, ءوز ىسىنە شەبەر نا­عىز كاسىبي مامانداردى دايار­لاۋ­دىڭ ۇلتتىق جۇيەسى بولماي, ادام كاپيتالىنىڭ ساپاسىن كوتەرمەي, ەكونوميكادا بەلگىلى ءبىر جەتىستىككە قول جەتكىزۋ ەكىتالاي”, دەي كەلە پارتيانىڭ قوعام مەن بيلىك اراسىندا وڭ بايلانىس ورناتۋ, سول ارقىلى ەلدە ادام كاپيتالىنىڭ تۇراقتى دامۋىنا جاعداي جاساۋ باعىتتارىن باسشى­لىققا العاندىعىن اتاپ ءوتتى. جيىنعا قاتىسۋشىلاردىڭ ءسوز اۋانىنا ۇڭىلسەك, اتالعان باع­دار­لا­ما جوباسى قازاقستاننىڭ 2020 جىلعا دەيىنگى ستراتەگيالىق دامۋ جوسپارىنىڭ, يندۋستريالىق-ين­نو­ۆاتسيالىق دامۋ باعدارلاماسىنىڭ باسىم باعىتتارىمەن وزەكتەس. بۇل رەتتە ەلىمىزدە ايتارلىقتاي ۇتىمدى ۇمتىلىستار بايقالىپ كەلەدى. ماسەلەن, قازىرگى تاڭدا ءبىلىم-عىلىم كوكجيەگىن كەڭەيتۋ توڭىرەگىندە يگى شارالار اتقارىلۋدا. جاڭا بالا- باقشالاردىڭ, كاسىبي ليتسەيلەر مەن كوللەدجدەردىڭ جانە تۇعىرى اس­تا­نادا ورنىعاتىن جاڭا ۋنيۆەر­سي­تەت­تىڭ بوي كوتەرۋى مەن جۇمىس جا­ساۋىنا مەملەكەتتىك دەڭگەيدە ءمان بەرىلگەن. ەلباسىنىڭ باستاماسى نەگىزىندە قول­عا الىنعان “100 مەكتەپ” باع­دار­لاماسى ءبىلىم مەكەمەلەرى قۇرى­لىسىنىڭ جاندانۋىنا جول اشۋدا. بۇگىندە اتالعان باعدارلاما شەڭ­بە­رىندە 84 مەكتەپتىڭ نەگىزى قالانىپ ۇلگەردى. 22 مەكتەپتىڭ قۇرىلىسى اياقتالۋعا شاق قالعان. ءبىلىم سالا­سىن­دا قاجىرلى ەڭبەك ۇلگىسىن كور­سەتىپ جۇرگەن ماماندارعا الەۋمەتتىك قولداۋ-كومەك كورسەتۋ ماسەلەسى دە نازاردان تىس قالماق ەمەس. دوڭگەلەك ۇستەل باسىندا باس قوسقان ازاماتتار ءبىلىم سالاسىندا اۋىز تولتىرىپ ايتارلىق ءىس-شارالارمەن قاتار نازارعا ايرىقشا الاتىن جايتتەردىڭ بار ەكەندىگىن دە جاسىرعان جوق. سولاردىڭ ءبىرى – ەلىمىزدەگى بالاباقشالار سانىنىڭ ءالى دە جەتىسپەۋشىلىگى. بۇل ورايدا, حالىقتىڭ مەملەكەت باسشىسىنىڭ تىكەلەي تاپسىرماسى نەگىزىندە جۇزەگە اسىرىلىپ جاتقان “بالاپان” ارنايى باعدارلاماسىنان ءۇمىتى مول. ءبىلىم جانە عىلىم ءمينيسترى جانسەيىت تۇيمەباەۆ ءبىلىم بەرۋدى دامىتۋدىڭ 2011-2020 جىلدارعا ارنالعان مەملەكەتتىك باعدار­لا­ما­سىنىڭ تۇساۋكەسەر جوباسىن ۇسىن­دى. بۇل باعدارلاما ءبىلىم بەرۋ جۇيەسىن جاڭاشا جانداندىرۋ, بۇل سالاعا قۇيىلاتىن ينۆەستيتسيا كو­لەمىن ۇلعايتۋ مەن تۇراقتاندىرۋ, ءبىلىم ساپاسىن جوعارىلاتۋ جانە ونىڭ ەۋروپالىق دەڭگەيگە كوتە­رى­لۋىنە جول اشۋ سىندى مىندەتتەردى كوزدەيدى. ءلايلا ەدىلقىزى.