رەفەرەندۋمنىڭ ەل ەرتەڭى ءۇشىن ماڭىزدى ەكەنىن تۇسىنگەن كىتاپحانا ۇجىمى دەپۋتاتتارمەن كەزدەسۋگە ءبىر كىسىدەي قاتىستى. ءوز كەزەكتەرىندە سۇراق قويىپ, پىكىر الماستى.
– ءوڭىر تۇرعىندارى رەفەرەندۋمنان وڭ وزگەرىستەر كۇتەدى. كوبى كەلىپ, ءوز داۋىستارىن بەرۋگە نيەتتى. بۇقارالىق اقپارات قۇرالدارى ارقىلى دا قاجەتتى اقپاراتتار ۇسىنىلىپ جاتىر. وسى رەتتە اۋدان, قالانى ارالاپ ءتۇسىندىرۋىمىز قانشالىقتى قاجەت دەپ ەكى ويلى بولدىق. الايدا جۇرتشىلىقپەن جۇزدەسىپ, ءار نورمانى تۇسىندىرگەنىمىزدە, ولاردىڭ كوكەيلەرىندە جۇرگەن ساۋالدارىن تىڭدادىق. قۇر سىناي بەرگەننەن گورى, وزگەرىس ءۇشىن ءوز داۋىستارىن بەرسە دۇرىس. سايىپ كەلگەندە, دەموكراتيالىق قوعامدى بىرلەسە قۇرۋىمىز كەرەك, – دەيدى جانات وماربەكوۆا.
دەپۋتاتتىڭ ايتۋىنشا, ەگەر كونستيتۋتسياعا ەنگىزىلەتىن وزگەرىستەر قابىلدانسا, ەلىمىز ءوزىنىڭ ساياسي دامۋىنىڭ جاڭا دەڭگەيىنە وتەدى. ويتكەنى رەفورما قۇقىقتىق, پارتيالىق جۇيەنى, مەملەكەتتىك بيلىك ءبولىنىسىنىڭ پرينتسيپتەرىن وزگەرتەدى.
– ەلىمىزدىڭ وزگەرگەنىن قالاساق, 5 ماۋسىمداعى جالپىحالىقتىق رەفەرەندۋمعا قاتىسۋىمىز كەرەك, – دەدى جانات وماربەكوۆا.
سونىمەن قاتار يرينا ۋنجاكوۆا ايتىپ وتكەندەي, كونستيتۋتسيانىڭ جاڭارعان نۇسقاسىندا قۇقىق قورعاۋ سالاسى بويىنشا ماڭىزدى وزگەرىستەر ەنگىزىلەدى. اتاپ ايتساق, كونستيتۋتسيالىق سوت قۇرىلادى. ادام قۇقىقتارى جونىندەگى ۋاكىلدىڭ, ياعني ومبۋدسمەننىڭ مارتەبەسى اتا زاڭمەن ايقىندالادى. ەلىمىزدە ءولىم جازاسى مۇلدە جويىلدى. مۇنىڭ ءبارى ازاماتتاردىڭ قۇقىقتارى مەن بوستاندىقتارىن قورعاۋ ءۇشىن جاسالىپ جاتىر.
– ءبىز ازاماتتارمەن كەزدەسىپ كونستيتۋتسياعا ەنگىزىلەتىن وزگەرىستەر مەن تولىقتىرۋلاردى جان-جاقتى ءتۇسىندىرىپ, تۋىنداعان سۇراقتارىنا جاۋاپ بەرگەن كەزدە ادامداردىڭ رەفەرەندۋمعا دەگەن كوزقاراسى وزگەرىپ, قولدايتىندىقتارىن ايتىپ جاتادى. كەز كەلگەن اقپاراتتى حالىققا تۇسىنىكتى تىلدە دۇرىستاپ جەتكىزۋ ماڭىزدى, – دەيدى ي.ۋنجاكوۆا.
كەزدەسۋگە قاتىسقان كىتاپحانا قىزمەتكەرلەرى رەسپۋبليكالىق شتابتىڭ مۇشەلەرىنە ءوز سۇراقتارىن قويىپ, ۇسىنىس پىكىرلەرىن دە ءبىلدىردى. ارينە, 5 ماۋسىم كۇنى ءوز تاڭداۋلارىن جاسايتىندارىن جەتكىزدى.
شىعىس قازاقستان وبلىسى
