فرانتسۋز كومپوزيتورى پەر تيللۋا جازعان قوبىز بەن سكريپكاعا ارنالعان «باقسى سيقىرى» اتتى جاڭا مۋزىكالىق شىعارما بارشا ونەر سۇيەر قاۋىمدى ءتانتى ەتتى.
ەكى ىشەكتى اسپاپ – قىلقوبىز بەن سكريپكانىڭ قايتالانباس دۋەتىن تىڭدارماندار جوعارى باعالادى. الەمدىك پرەمەرانى فرانتسيادان كەلگەن قوبىزشى ايگەريم ەرساينوۆا-شۋستەر مەن سكريپكاشى كۆەنتين فوگەل ورىندادى.
سونداي-اق بۇل كەشتە بەلگىلى قازاقستاندىق جانە شەتەلدىك ونەر جۇلدىزدارى فرانتسۋز كومپوزيتورىنىڭ فورتەپيانولىق جانە انسامبلدىك تۋىندىلارىن شىرقادى. بەلگىلى پيانيست, قازاقستاننىڭ ەڭبەك سىڭىرگەن قايراتكەرى تيمۋر ۋرمانچەەۆ, الت اسپابىندا ويناعان اننا سەروۆا (يتاليا), سكريپكاشى شولپان مانكەەۆا, ۆيولونچەليست مۇرات ناربەكوۆ پەن پيانيست دينا ميرمانوۆانىڭ شەبەرلىگى زور ىقىلاسقا بولەندى. مۋزىكانتتار پەر تيللۋا شىعارمالارىنىڭ اۋەنى مەن كوركەمدىك الۋان تۇرلىلىگى ەرەكشە ەكەندىگىن اتاپ ءوتتى.
پەر تيللۋا – 8 ۇلكەن سيمفونيانىڭ, 20 سيمفونيالىق پوەمانىڭ, 3 وركەستر, 3 حور جانە 7 سوليست ءۇشىن جازىلعان وراتوريانىڭ اۆتورى. كوپتەگەن ۇلتتىق جانە حالىقارالىق سىيلىقتاردىڭ يەگەرى. كومپوزيتور الەمدى ارالاپ, ورتالىق ازيا مەن ورتالىق شىعىس ەلدەرىنە ءجيى ساياحاتتاعان. بىرنەشە جىل ازەربايجان مەن وزبەكستاندا ءومىر ءسۇرىپ, وسى ەلدەردىڭ مادەنيەتىن تەرەڭ زەرتتەگەنى كومپوزيتوردىڭ مۋزىكاسىندا دا ايقىن كورىنىس تاپقان. قازىرگى كەزدە تيللۋانى الەم مۋزىكانتى دەپ اتايدى. فرانتسۋز اۆتورى قازاق مۋزىكاسى نەگىزىندە ۇلتتىق اسپاپتاردا ورىندالاتىن كوپتەگەن كومپوزيتسيالاردى جازدى. اۆتوردىڭ ايتۋىنشا, قوبىزدىڭ ءۇنى وعان ەرەكشە اسەر ەتكەن.
«قوبىزدىڭ ءۇنى مەنى بىردەن باۋراپ الدى. ونىڭ قايتالانباس اۋەندەرى «باقسى سيقىرى» اتتى قوبىز بەن سكريپكاعا ارنالعان شىعارمانىڭ جازىلۋىنا شابىت بەردى. بۇل – مەنىڭ قازاقستان ەلىنە دەگەن قۇرمەتىمدى بىلدىرەتىن ارنايى تارتۋىم. قازاقستانعا العاش رەت كەلىپ, وسى كەرەمەت ەلدىڭ استاناسىندا شىعارماشىلىق كەشىمدى وتكىزۋ – مەن ءۇشىن ۇلكەن مارتەبە», دەپ جەتكىزدى پەر تيللۋا.
ول فەستيۆالدىڭ ۇيىمداستىرۋشىسى – «دەگدار» گۋمانيتارلىق قورىنا العىسىن ءبىلدىردى.
فرانتسۋز كومپوزيتورىنىڭ مۋزىكاسى ونەردە شەكارا بولمايتىنىن تاعى ءبىر دالەلدەي ءتۇستى. بۇل تۋرالى ءوز پىكىرىن «دەگدار» قورىنىڭ ديرەكتورى لاۋرا احمەتوۆا جەتكىزدى.
«پەر تيللۋانىڭ شىعارماشىلىعى كوپ قىرلى. ونىڭ فرانتسيا تورىندە تۋعان اۋەندەرىندە ازيا ءۇنى ەستىلەدى. كومپوزيتور قازاق مۋزىكاسىن وتە جاقىن قابىلدادى. جالپى, جىل سايىن فەستيۆال اياسىندا سان ءتۇرلى مەملەكەتتىڭ مۋزىكالىق ونەرىن ءوزارا جاقىنداستىراتىن ەرەكشە كونتسەرتتەر وتەدى. دەمەك, مۋزىكا ونەرى اينالامىزدى جارقىن ەتىپ, بىرلىگىمىزدى ارتتىرا تۇسەتىن الىپ كۇشكە يە», دەدى لاۋرا احمەتوۆا.
ەسكە سالساق, الداعى ۋاقىتتا «استانا كەشتەرى» ونەر فەستيۆالىنىڭ تاعى 3 كونتسەرتى «استانا بالەت» تەاترىندا وتەدى جانە كورەرمەندەر ولاردى تەگىن تاماشالاي الادى.
