پرەزيدەنت جارلىقتارىنا قاتىستى ارحيۆتىك قۇجاتتار ءارحيۆتىڭ №5-ن قورىندا ساقتاۋلى تۇر. ماسەلەن, ارحيۆ قورىنداعى قۇجاتتار ىزىمەن رەسپۋبليكالىق رەفەرەندۋم وتكىزۋ تۋرالى جارلىقتاردىڭ تاريحىنا توقتالساق, العاشقى رەفەرەندۋمدى ۇيىمداستىرۋ جانە وتكىزۋ ءتارتىبىن بەلگىلەۋ ماقساتىنداعى پرەزيدەنتتىڭ 1995 جىلعى 25 ناۋرىزدا №2151 جارلىعى شىققان. ءدال وسى كۇنى مەملەكەتتىك بيلىكتىڭ بىردەن-ءبىر باستاۋى رەتىندە حالىقتىڭ ەركىن تاڭداۋىن ءبىلدىرۋىنىڭ ەڭ جوعارى كورىنىسى – بۇكىلحالىقتىق داۋىس بەرۋ ەكەنىنە سۇيەنىپ, قازاقستان حالقى اسسامبلەياسىنىڭ ۇندەۋىمەن «قر پرەزيدەنتى مەن جەرگىلىكتى اكىمدەرگە ۋاقىتشا قوسىمشا وكىلەتتىلىك بەرۋ تۋرالى» قر زاڭىنىڭ 3-بابىن باسشىلىققا العان قر پرەزيدەنتىنىڭ №2152 جارلىعى شىقتى. وسىنىڭ نەگىزىندە 1995 جىلعى 29 ساۋىردە العاشقى رەسپۋبليكالىق رەفەرەندۋم ءوتتى.
سول جىلى قوعامداعى تۇيتكىلدى ماسەلەلەر مەن ازاماتتىق قۇقىقتىڭ مۇمكىندىكتەرىن انىقتاۋ ءۇشىن كونستيتۋتسيانىڭ جاڭا جوباسى ازىرلەندى. ەلدىڭ مەملەكەتتىك ءومىرىنىڭ اسا ماڭىزدى ماسەلەلەرىن تىكەلەي شەشۋ جونىندەگى حالىقتىڭ قۇقىعىن جۇزەگە اسىرۋ ماقساتىندا 1995 جىلعى 30 تامىزدا رەسپۋبليكالىق رەفەرەندۋم ءوتتى. بۇل رەفەرەندۋمدا ازاماتتاردىڭ ىقتيار, ەركىمەن تالقىعا سالىنعان كونستيتۋتسيالىق زاڭدار مەن بىرقاتار مەملەكەتتىك ماڭىزدى ماسەلە قارالدى. بۇگىنگى تاڭدا قازاقستاندا رەسپۋبليكالىق رەفەرەندۋمدى تاعايىنداۋ, ازىرلەۋ جانە وتكىزۋ ءتارتىبىن بەلگىلەۋ 1995 جىلى 2 قاراشاداعى №2592 كونستيتۋتسيالىق زاڭىنا سايكەس جۇزەگە اسىرىلادى.
«جاڭا قازاقستان بولاشاعىنىڭ ىرگەتاسىن ءبۇتىن حالىق بولىپ بىرگە قۇرايىق دەگەن» پرەزيدەنت قاسىم-جومارت توقاەۆتىڭ ۇسىنىسىن قولداعان بۇل بۇكىلحالىقتىق رەفەرەندۋمنىڭ ءجونى دە, جولى دا ەرەكشە. بىرىنشىدەن, سۋپەرپرەزيدەنتتىك مودەلدەن پرەزيدەنتتىك باسقارۋداعى رەسپۋبليكاعا تۇپكىلىكتى كوشۋ بيلىك تارماقتارى اراسىنداعى تەپە-تەڭدىكتى ورناتىپ, پرەزيدەنتتىك ينستيتۋتتىڭ وزگە ساياسي ينستيتۋتتارمەن تەڭ دارەجەلى بيلىگىن قامتاماسىز ەتەدى. رەفەرەندۋمدا ۇسىنىلعان ءادىل ۇسىنىستىڭ ءبىرى دەپ – پرەزيدەنت ءوزىنىڭ بيلىك باسىندا وتىرعان كەزەڭىندە ساياسي پارتياعا توراعالىق ەتۋدەن باس تارتۋىن ايتۋعا بولادى. پرەزيدەنتتىڭ بۇل باستاماسى ءوز كەزەگىندە بارلىق ساياسي پارتيالاردىڭ تەڭ جاعدايدا دامۋىنا مۇمكىندىك بەرەدى ءارى ساياسي باسەكەلەستىكتى ارتتىرۋعا باعىتتالعان وڭ شەشىم.
بۇل كونستيتۋتسيالىق رەفورمادا بۇگىننەن باستاپ ەل تاعدىرىنىڭ تىزگىنىنە حالىقتىڭ قاتىسۋىن كەڭەيتۋ كوزدەلگەن. وسىنداي دەموكراتيالاندىرۋدى دامىتۋ ماقساتىنداعى ساياسي پروتسەستەر ادىلەتتى قوعام قۇرۋدىڭ نەگىزگى باستاماسى بولماق. سوندىقتان كونستيتۋتسيانىڭ قۇقىقتىق نەگىزىن قالاۋشى رەسپۋبليكالىق جالپىحالىقتىق رەفەرەندۋمعا حالىق بولىپ, ۇلت بولىپ تولىق قاتىسۋ زامان تالابى دەپ بىلەمىن.
ءاليا مۇستافينا,
پرەزيدەنت ءارحيۆىنىڭ ديرەكتورى
