رەفەرەندۋمدى زاڭ شىعارۋشى ورگاندا جينالعان حالىق وكىلدەرى ءبىرىنشى قابىلداپ, كونستيتۋتسيا نەمەسە جارعى تۇرىندەگى زاڭداردى راتيفيكاتسيالاۋ نەمەسە قابىلداماۋ ءۇشىن داۋىس بەرۋگە قۇقىعى بار ازاماتتارعا ۇسىنۋ دەپ انىقتاۋعا بولادى. رەفەرەندۋم – بۇل ساياسي باستامانى قولداۋعا شاقىراتىن ينستيتۋت. سونىمەن بىرگە, رەفەرەندۋمدى حالىقتىق ۆەتو دەپ اتاۋعا دا بولاتىن سەكىلدى. بۇل زاڭ جوبالارى تۇپكىلىكتى قابىلدانعانعا دەيىن قاجەت نەگىزگى باعىتتاردىڭ ءبىرى.
س.ءتيرنيدىڭ 2012 جىلى جارىق كورگەن ەڭبەگىندە كونستيتۋتسيالىق پروتسەستى انىقتاۋداعى رەفەرەندۋمنىڭ ءۇش نەگىزگى ماقساتى نازارىمىزدى اۋدارادى: جاڭا مەملەكەتتەردىڭ قۇرىلۋى; كونستيتۋتسيالاردى قابىلداۋ نەمەسە وزگەرتۋ; كوپۇلتتى مەملەكەتتەردە سۋبمەملەكەتتىك اۆتونوميانىڭ كۇردەلى جاڭا ۇلگىلەرىن قۇرۋ. ەلىمىزدە وتكەلى جاتقان رەفەرەندۋمنىڭ نەگىزگى قىزمەتتەرى مىنالار دەپ ويلايمىز: جاڭا قازاقستان قۇندىلىقتارىن دامىتۋ; ەل ازاماتتارىن ساياسي تاربيەلەۋ جانە وزگەرتۋ; حالىقتىڭ ءال-اۋقاتى ءۇشىن زاڭنامانى قامتاماسىز ەتۋ; حالىقتىڭ ءال-اۋقاتىنا قارسى زاڭداردىڭ الدىن الۋ جانە ت.ب. دەمەك, ءبىزدىڭ ەلگە از عانا ادامداردىڭ يگىلىگى ءۇشىن جۇمىس ىستەيتىن زاڭدار ەمەس, حالىقتىڭ ءال-اۋقاتىن جاقسارتۋعا باعىتتالعان, كوپتىڭ يگىلىگىن قامتاماسىز ەتەتىن زاڭدار قاجەت.
ەلىمىزدەگى كونستيتۋتسيالىق رەفورمالار ساياسي جۇيەنى تۇبەگەيلى وزگەرتۋ ءۇشىن ەمەس, ساياسي ينستيتۋتتاردى جاڭعىرتۋ ءۇشىن جۇرگىزىلىپ جاتىر. وسى كونستيتۋتسيالىق رەفورمانىڭ اسپەكتىلەرى تىكەلەي دەموكراتيانىڭ ءبىر ءتۇرى رەتىندەگى دەموكراتيانى جەتىلدىرۋمەن بايلانىستى. جۇرگىزىلىپ جاتقان رەفورمالاردىڭ وزىندىك ەرەكشەلىگىن كونستيتۋتسيالىق-قۇقىقتىق ولشەمدە باعامداساق, الەۋمەتتىك مەملەكەتتىڭ قاعيدالارىمەن ۇشتاسىپ جاتقانى بايقالادى. سونىمەن قاتار, بۇل رەفورما مەملەكەتىمىزدىڭ ەگەمەندىگى مەن تاۋەلسىزدىگىن قورعاۋ جانە نىعايتۋ ماقساتىندا دا قاجەت.
حالىقتىڭ بيلىك وكىلەتتىكتەرىن تابىستاۋى, پرەزيدەنتتىڭ كونستيتۋتسيالىق جانە قۇقىقتىق باستامالارىنا قولداۋ ءبىلدىرۋى مەملەكەت دامۋىنىڭ ستراتەگيالىق ماقساتتارىن جۇزەگە اسىرۋدىڭ شارتى رەتىندە تانىلادى. رەفەرەندۋم جاڭا قازاقستانداعى جاڭا كونستيتۋتسيالىق ءتارتىپتىڭ ىرگەتاسى بولماق. سوندىقتان ەلىمىزدەگى كونستيتۋتسيالىق رەفورما ساياسي ءومىردى جانداندىراتىندىعىنا سەنىمىمىز مول.
مۇرات ناسيموۆ,
«بولاشاق» عىلىمي-زەرتتەۋ ينستيتۋتىنىڭ ديرەكتورى
