وزدەرىڭىزگە ءمالىم, 5 ماۋسىمدا كونستيتۋتسياعا تۇزەتۋلەر ەنگىزۋ بويىنشا رەسپۋبليكالىق رەفەرەندۋم وتەدى. وسىعان بايلانىستى ساراپشىلار اتا زاڭعا ەنگىزىلەتىن وزگەرىستەردىڭ ماڭىزىن تالقىلادى. اتاپ ايتقاندا, قۇقىق ۇستەمدىگى, دەموكراتيالىق پروتسەستەردى كۇشەيتۋ, بيلىكتى ءبولۋ تۋرالى وزگەرىستەر مەن تولىقتىرۋلاردىڭ ءمانى مەن ماعىناسىن جان-جاقتى اڭگىمەلەدى.
ZER Club ساراپشىلار كلۋبىنىڭ وتىرىسىنا بەلگىلى قازاقستاندىق عالىمدار قاتىستى. وتىرىستىڭ مودەراتورى رەتىندە ەۋروپالىق قۇقىق جانە ادام قۇقىقتارى بويىنشا ساراپتامالىق ينستيتۋتتىڭ ديرەكتورى مارات باشيموۆ ءسوز سويلەپ, رەفەرەندۋمعا ەنگىزىلەتىن وزگەرىستەر توڭىرەگىندە پىكىرىمەن ءبولىستى.
سپيكەردىڭ ايتۋىنشا, قوعامدا, ونىڭ ىشىندە ەڭبەك ۇجىمدارىندا اشىق پىكىر الماسۋ, ءتۇسىندىرۋ جۇمىستارى قارقىندى جۇرگىزىلۋى قاجەت. «ازاماتتار مەملەكەتتىك بيلىكتى اتقارۋعا جانە دە وزدەرىنىڭ قۇقىقتارى مەن بوستاندىقتارىن قورعاۋ ماقساتىندا بەرىلىپ وتىرعان مۇمكىندىكتەردىڭ ءمانىن تەرەڭ تۇسىنە وتىرىپ, رەفەرەندۋمعا بەلسەنە قاتىسادى دەپ سەنەمىن», دەدى ول.
سونىمەن قاتار جيىنعا قازاقستان رەسپۋبليكاسىنىڭ ەڭبەك سىڭىرگەن قايراتكەرى, زاڭ عىلىمدارىنىڭ دوكتورى, استانا حالىقارالىق ۋنيۆەرسيتەتىنىڭ قۇقىق جوعارى مەكتەبىنىڭ پروفەسسورى يسيدور بورچاشۆيلي, «ينتەللەكت وردا» الەۋمەتتىك-گۋمانيتارلىق زەرتتەۋلەردى ينتەگراتسيالاۋ حالىقارالىق ينستيتۋتىنىڭ ديرەكتورى, تاريح عىلىمدارىنىڭ دوكتورى, پروفەسسور, اكادەميك ساتتار ماجيتوۆ قاتىستى.
بۇدان بولەك جيىن بارىسىندا ۆارشاۆا ۋنيۆەرسيتەتىنىڭ پروفەسسورى ياتسەك زالەسنى, پياتيگورسك مەملەكەتتىك ۋنيۆەرسيتەتى زاڭ ينستيتۋتىنىڭ ديرەكتورى ليۋدميلا تحابيسيموۆا سەكىلدى شەتەلدىك ساراپشىلار دا ءوز پىكىرىن ورتاعا سالدى.
ايتا كەتەيىك, ZER Club ساراپشىلار كلۋبى وتىرىسىنىڭ ماقساتى – ەلىمىزدىڭ ساياسي جۇيەسىن كەشەندى جاڭعىرتۋ بويىنشا پىكىر الماسۋ.
