كەزدەسۋدى اشقان سەنات دەپۋتاتى, «اۋىل» حدپپ توراعاسى ءالي بەكتاەۆ الداعى اۋقىمدى رەفورمالاردىڭ مەملەكەتتىڭ جاڭارۋى, رەسپۋبليكا جۇرتشىلىعىنىڭ ءومىر ساپاسىنىڭ جاقسارۋىمەن بايلانىستى ەكەندىگىن اتاپ ءوتتى. ءىس-شاراعا اگروينجەنەريا عىلىمي-وندىرىستىك ورتالىعى, قازاق مال شارۋاشىلىعى جانە جەمشوپ ءوندىرىسى, قازاق قايتا وڭدەۋ جانە تاماق ونەركاسىبى, اوك جانە ااد ەكونوميكاسى, قازاق ەگىنشىلىك جانە وسىمدىك شارۋاشىلىعى, ءو.وسپانوۆ اتىنداعى توپىراقتانۋ جانە اگروحيميا قازاق عىلىمي-زەرتتەۋ ينستيتۋتتارى جانە باسقا دا اگرارلىق عىلىم وكىلدەرى قاتىستى. عىلىمي مەكەمەلەردىڭ وكىلدەرى سالاارالىق ماڭىزدى ماسەلەلەردى تالقىلاپ, ەلىمىزدىڭ اگرارلىق ساياساتىن جەتىلدىرۋدىڭ ۋاقىت كۇتتىرمەيتىن ماسەلەلەرىن ورتاعا سالدى. اگرارلىق عىلىمنىڭ بۇگىنگى احۋالى, عىلىمدى دامىتۋعا بولىنەتىن قاراجاتتىڭ جەتىسپەۋشىلىگىنەن تۋىنداپ وتىرعان كوكەيكەستى ماسەلەلەر توڭىرەگىندە وي ءتۇيدى.
سەناتور ءالي بەكتاەۆ اۋىل شارۋاشىلىعى مەملەكەتتىڭ ازىق-ت ۇلىك قاۋىپسىزدىگىنە جاۋاپ بەرەتىن ەكونوميكانىڭ ومىرلىك ماڭىزدى سالالارىنىڭ ءبىرى بولىپ تابىلاتىندىعىنا توقتالدى. «ەلىمىزدىڭ اگرارلىق سەكتورى بۇگىندە 5 مىڭنان استام ادام ەڭبەك ەتەتىن 38 عىلىمي, عىلىمي-وندىرىستىك, سەرۆيستىك جانە ءبىلىم بەرۋ ۇيىمىن قۇرايدى. بۇل – اۋىل شارۋاشىلىعى تاۋار وندىرۋشىلەرىمەن تىعىز بايلانىستا جۇمىس ىستەيتىن ۇلكەن كلاستەر. عىلىمي ينتەلليگەنتسيا ارقاشان يننوۆاتسيالىق يدەيالاردىڭ قوزعاۋشى كۇشى بولىپ كەلەدى. عالىمدار ەلدە بولىپ جاتقان وقيعالارعا بەيجاي قارامايدى, سوندىقتان دا ەل ءۇشىن وسىنداي ەلەۋلى وقيعانى وتكىزۋدە جەتەكشى عالىم-اگرارشىلاردىڭ قولداۋى اسا ماڭىزدى», دەدى ول.
سونىمەن بىرگە سەناتور قاتىسۋشىلارعا اتا زاڭعا ەنگىزىلەتىن تۇزەتۋلەر مەن تولىقتىرۋلاردى ەگجەي-تەگجەي ءتۇسىندىرىپ, فەرمەرلەر ءۇشىن رەفەرەندۋمعا دا, مەملەكەت ومىرىنە دە بەلسەندى قاتىسۋدىڭ ماڭىزدىلىعىن ءتۇسىندىردى. عىلىمي قاۋىم وكىلدەرى رەفەرەندۋم وتكىزۋدى, سونداي-اق كونستيتۋتسياعا وزگەرىستەر ەنگىزۋ قاجەتتىگىن ءبىراۋىزدان قولداي وتىرىپ, اگرارلى ەلدىڭ بولاشاعىنا ۇلكەن سەنىم ءبىلدىردى.
«اۋىل» پارتياسى مۇشەلەرىن ساپالى مەديتسينالىق قىزمەت كورسەتۋ, تۇرعىن ۇيمەن قامتاماسىز ەتۋ, ازاماتتاردىڭ قۇقىقتارى مەن بوستاندىقتارىن قورعاۋ جانە جەكە قاۋىپسىزدىكتى, تۇراقتى تابىسىن قامتاماسىز ەتۋ جايى الاڭداتادى, – دەپ اتاپ ءوتتى ءوز سوزىندە ۇعا اكادەميگى, پروفەسسور, «اۋىل» پارتياسىنىڭ مۇشەسى سەيىتقازى كەشۋوۆ. – سوندىقتان پارتيا قاتارىندا ەل بولاشاعى ءۇشىن شىنايى ەڭبەك ەتە بىلەتىن, ەل الدىنداعى جاۋاپكەرشىلىكتى جان-دۇنيەسىمەن سەزىنە وتىرىپ, مەملەكەت باسشىسىنىڭ ساياسي باعىتى مەن رەفەرەندۋم وتكىزۋ باستاماسىن تولىق قولدايتىن مۇددەلەس ازاماتتاردىڭ بولعاندىعى ماڭىزدى».
دوڭگەلەك ۇستەلگە قاتىسۋشىلار كونستيتۋتسياعا ەنگىزىلەتىن تولىقتىرۋلار مەن تۇزەتۋلەرگە قاتىستى وي-پىكىرلەرىن ورتاعا سالىپ, جاڭا, ادىلەتتى قازاقستان قۇرۋ مۇمكىندىكتەرىنىڭ مول ەكەندىگىنە سەنىم ءبىلدىردى.
الماتى
