اتالعان تەاتر بايقاۋدا كورەرمەن مەن قازىلار القاسىنىڭ نازارىنا ونەر قايراتكەرى كەڭەس جۇمابەكوۆتىڭ «اداسقاندار» دراماسىن ۇسىندى.
اتىعاي شانين تەاترىنىڭ رەجيسسەرى ارايلىم قۇسنيدتەنوۆا قويىلىم كورەرمەننىڭ جۇرەگىنە جول تابا العانىنا قۋانىشتى ەكەنىن جەتكىزدى.
– شىعارمانىڭ ءمان-ماعىناسى وتە تەرەڭ جانە وقيعاسىنىڭ جەلىسى باستى كەيىپكەرلەردىڭ شىنايى سەزىمدەرىن جان-جاقتى اشىپ كورسەتەدى. البەتتە, قازىلار القاسىنىڭ اكتەرلەرىمىزدىڭ ەڭبەگىن جوعارى باعالاعانىنا قۋانىشتىمىز. بۇل ءبىرىنشى جەڭىسىمىز ەمەس ءارى سوڭعىسى دا بولماۋى كەرەك دەگەن ۇمىتتەمىز, – دەيدى رەجيسسەر.
حالىق تەاترلارىنىڭ بايقاۋىندا ۇلىتاۋ اۋدانىنان كەلىپ قاتىسقان «كەڭگىر» ۇجىمىنا فلوريد بۋلياكوۆتىڭ «كۇيەۋگە شىققان كەمپىرلەر» پەساسىنىڭ جەلىسى بويىنشا قويعان تراگيكومەدياسى ءۇشىن ءبىرىنشى جۇلدە بەرىلسە, شەت اۋدانىنىڭ ورتالىعى اقسۋ-ايۋلى كەنتىنىڭ حالىق تەاترى ەكىنشى ورىنعا لايىقتى دەپ تانىلدى. ونەر ۇجىمى قازىلاردىڭ تالقىسىنا تىنىمباي نۇرماعانبەتوۆتىڭ «تابالدىرىعىڭا تابىن» دراماسىن ۇسىنعان بولاتىن.
ال جۇلدەلى ءۇشىنشى ورىندى ولجاس جانايداروۆتىڭ «جۇت» پەساسىن ساحنالاعان قارقارالى اۋدانىنداعى تاتتىمبەت اتىنداعى اۋىلدىڭ تەاترى يەلەندى.
حالىق تەاترلارى بايقاۋىنىڭ جەڭىمپازدارى مەن جۇلدەگەرلەرى ديپلومدارمەن, اقشالاي سەرتيفيكاتتارمەن جانە ارنايى سىيلىقتارمەن ماراپاتتالدى. سونىمەن قاتار ونەر ۇجىمدارىن شولپان جانداربەكوۆانىڭ ۇرپاقتارى دا قۇتتىقتادى.
قاراعاندى وبلىسى,
قارقارالى قالاسى
