وقيعا • 29 مامىر، 2022

ەلوردادا 2 بالا ەسىل وزەنىنە باتىپ كەتتى

26 رەت كورسەتىلدى

استانالىق سۇڭگۋىرلەر ەسىل وزەنىنىڭ تۇبىنەن كامەلەت جاسىنا تولماعان 2 ەر بالانىڭ دەنەسىن تاپتى، دەپ حابارلايدى Egemen.kz توتەنشە جاعدايلار دەپارتامەنتىنىڭ ءباسپاسوز قىزمەتىنە سىلتەمە جاساپ.

«29 مامىر كۇنى ساعات 12:50-دە «112» پۋلتىنە بەيسەكوۆا كوشەسى بويىنداعى كوپىر ماڭىندا ەسىل وزەنىنە 2 بالا سۋعا باتىپ كەتتى دەگەن حابار كەلىپ ءتۇستى. وقيعا ورنىنا جەدەل قۇتقارۋ جاساعى جەتىپ، الدىمەن جاعدايدى باقىلاپ، ىزدەۋ جۇمىسىنا كىرىستى. ناتيجەسىندە سۇڭگۋىرلەر وزەن تۇبىنەن كامەلەت جاسىنا تولماعان ەر بالانىڭ دەنەسىن تاپتى. بىرەر مينۋتتان سوڭ ەكىنشى بالانىڭ مۇردەسى سۋدان شىعارىلدى»، - دەگەن اقپارات تاراتتى قالالىق توتەنشە جاعدايلار دەپارتامەنتىنىڭ ءباسپاسوز قىزمەتى.

قازىرگى ۋاقىتتا پوليتسيا قىزمەتكەرلەرى سۋعا كەتكەن بالالاردىڭ جەكە باسىن انىقتاپ جاتىر.

«وقيعا بولعان سۋ جاعاسىندا توتەنشە جاعداي قىزمەتكەرلەرى بۇعان دەيىن اقپاراتتىق ستەند پەن شومىلۋعا تىيىم سالىنعان بەلگى ورناتقان ەدى. سەبەبى ول جەر شومىلۋعا قاۋىپتى»، - دەيدى ۆەدومستۆودان.

وسىعان وراي نۇر-سۇلتان قالاسى توتەنشە جاعدايلار دەپارتامەنتى ەلوردالىقتارعا ەسكەرتۋ جاسادى.

«قۇرمەتتى اتا-انالار، بالالاردى قاراۋسىز قالدىرماڭىزدار. بالالارعا جازعى كانيكۋل كەزىندە قاۋىپسىزدىك شاراسىن ساقتاۋ كەرەكتىگى تۋرالى ەسىنە سالىپ وتىرىڭىزدار. قازىرگى ۋاقىتتا ەلوردا اۋماعىندا شومىلۋعا رۇقسات ءۇش ۋچاسكە بار. ولار - ورتالىق ساياباق، «تري پەسكاريا» جانە «ستوليچنىي دۆور» دەمالىس بازاسى»، دەلىنگەن تجد رەسمي اقپاراتىندا.

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار