ايماقتار • 27 مامىر، 2022

ەرلان قارين سولتۇستىك قازاقستان وبلىسىنىڭ جۇرتشىلىعىمەن كەزدەستى

29 رەت كورسەتىلدى

قر مەملەكەتتىك حاتشىسى ەرلان قارين ۇلتتىق قوعامدىق سەنىم كەڭەسىنىڭ مۇشەلەرىمەن بىرگە سولتۇستىك قازاقستان وبلىسىنىڭ جۇرتشىلىعىمەن بىرقاتار كەزدەسۋ وتكىزدى دەپ حابارلايدى Egemen.kz اقوردا سايتىنا سىلتەمە جاساپ.

ەرلان قارين الدىمەن وبلىس اكتيۆىمەن جولىقتى. وبلىس اكىمى قۇمار اقساقالوۆ ءوڭىردىڭ الەۋمەتتىك-ەكونوميكالىق دامۋى مەن ينفراقۇرىلىمدىق جوبالاردىڭ ورىندالۋى جايىندا باياندادى. ءوز كەزەگىندە مەملەكەتتىك حاتشى الداعى كونستيتۋتسيالىق رەفورمانىڭ نەگىزگى باعىتتارى تۋرالى ايتتى. سونداي-اق جۇزەگە اسىرىلاتىن رەفورما حالىقتىڭ ەلدى باسقارۋ ىسىنە ارالاسۋىن ارتتىرۋعا جانە ساياسي پروتسەستەردى دەموكراتيالاندىرۋ ءىسىن ودان ءارى جالعاستىرۋعا مۇمكىندىك بەرەتىنىنە نازار اۋداردى.

ەرلان قارين اتاپ وتكەندەي، وسى سەبەپتى كونستيتۋتسيالىق رەفورما جالپى قوعامنىڭ قولداۋىنا يە، ونى سوڭعى جۇرگىزىلگەن الەۋمەتتىك زەرتتەۋلەردىڭ ناتيجەلەرى كورسەتىپ وتىر.

مۇنان كەيىن وڭىردەگى قوعامدىق كەڭەستەردىڭ مۇشەلەرىمەن كەزدەسۋ ءوتتى. كەزدەسۋگە قاتىسۋشىلار قوعام مەن بيلىك ينستيتۋتتارى اراسىنداعى اشىق ءارى سىندارلى ديالوگتى دامىتۋ تۇرعىسىندا وي ءبولىستى. ەرلان قارين كونستيتۋتسياعا تۇزەتۋلەر ەنگىزۋدى ازىرلەۋ جۇمىسىنا ەلىمىزگە بەلگىلى ساراپشىلار مەن قوعام وكىلدەرى تارتىلعانىن اتاپ ءوتتى. سوندىقتان الداعى كونستيتۋتسيالىق رەفورمانى قوعامنىڭ ۇسىنىسىنا نەگىزدەلىپ جاسالدى دەۋگە بولادى.

جۇمىس ساپارىنىڭ بارىسىندا مەملەكەتتىك حاتشى وڭىردەگى جاستار ۇيىمدارىنىڭ بەلسەندىلەرىمەن دە كەزدەستى. وندا جاس ۇرپاقتىڭ قوعامدىق جۇمىستارعا بەلسەندى ارالاسۋىن ارتتىرۋ جانە جاستارعا قاتىستى جوبالاردى قولداۋ ماسەلەلەرى قوزعالدى. كەزدەسۋ قورىتىندىسى بويىنشا ەرلان قارين جاستاردىڭ رەفەرەندۋم مەن ساياسي رەفورمالارعا ۇلكەن قىزىعۋشىلىق تانىتىپ وتىرعانىن اتاپ ايتتى.

جالپى العاندا، وبلىس جۇرتشىلىعى ەلىمىزدە اتقارىلىپ جاتقان ساياسي جاڭعىرۋ ۇدەرىستەرىن ءجىتى باقىلاپ وتىرعانىن ايتىپ، قولعا الىنعان رەفورمالاردى جۇزەگە اسىرۋعا دايىن ەكەندەرىن جەتكىزدى.

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار