وتىرىستا دەپۋتاتتار «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ مينيسترلەر كابينەتى اراسىنداعى ورتالىق ازيا ءوڭىرىنىڭ قاۋىپسىزدىگىن قامتاماسىز ەتۋدە اسكەري-تەحنيكالىق جاردەم كورسەتۋ تۋرالى كەلىسىمدى راتيفيكاتسيالاۋ تۋرالى» زاڭدى قاراپ, قابىلدادى.
«بۇگىن مەملەكەت باسشىسى قاسىم-جومارت كەمەل ۇلى توقاەۆتىڭ قىرعىزستانعا رەسمي ساپارى باستالادى. وسى ساپار اياسىندا بىرقاتار ماڭىزدى كەلىسىمدەرگە قول جەتكىزىلەدى دەپ كۇتىلۋدە. ءبىزدىڭ بۇگىن قاراعان زاڭىمىز دا باۋىرلاس ەكى ەلدىڭ ءوزارا قارىم-قاتىناسىن, سونىڭ ىشىندە اسكەري-تەحنيكالىق سالاداعى ىنتىماقتاستىقتى نىعايتۋعا ارنالعان. سونداي-اق بۇل كەلىسىم ورتالىق ازيادا تۇراقتىلىقتى جانە قاۋىپسىزدىكتى قامتاماسىز ەتۋدى كوزدەيدى», دەدى ماۋلەن اشىمباەۆ.
سونىمەن قاتار سەناتورلار «قازاقستان رەسپۋبليكاسىنىڭ ۇكىمەتى مەن ارمەنيا رەسپۋبليكاسىنىڭ ۇكىمەتى اراسىنداعى ارمەنيا رەسپۋبليكاسىنا مۇناي ونىمدەرىن بەرۋ سالاسىنداعى ساۋدا-ەكونوميكالىق ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭدى قابىلدادى.
بۇل قۇجات قازاقستاندىق كاسىپورىنداردىڭ ارمەنياعا مۇناي, ەلەكتر ەنەرگياسى, تابيعي گاز جانە كومىردەن باسقا تاۋارلار جەتكىزۋ ءۇشىن قاجەتتى جاعداي جاساۋدى, سونداي-اق مۇناي ونىمدەرىنىڭ ەاەو ەلدەرىنە كەلەتىن باقىلانبايتىن اعىندارىنان نارىقتى قورعاۋدى ماقسات تۇتادى.
ودان بولەك, پالاتا وتىرىسىندا دەپۋتاتتار «حالىقتىڭ تابىسىن ارتتىرۋدىڭ 2025 جىلعا دەيىنگى باعدارلاماسى» كەشەندى جوسپارىن ىسكە اسىرۋ شارالارى جونىندە پرەمەر-ءمينيستردىڭ ورىنباسارى ەرالى توعجانوۆتىڭ اقپاراتىن تىڭدادى.
ماۋلەن اشىمباەۆ مەملەكەت باسشىسى قولعا العان ەلدى جاڭعىرتۋ باعدارىنىڭ باستى ماقساتى ءار قازاقستاندىقتىڭ ءومىر ءسۇرۋ ساپاسىن جاقسارتۋ ەكەنىن ايتتى.
«حالىقتىڭ تابىسىن ارتتىرۋ – ستراتەگيالىق مىندەت. مەملەكەتكە دەگەن سەنىم مەن بارلىق جاڭعىرۋ رەفورمالارىنىڭ تابىستى بولۋى دا وسى مىندەتكە تىكەلەي بايلانىستى. ازاماتتار جاعدايىنىڭ جاقسارعانىن ناقتى سەزىنۋى كەرەك. ەندىگى جەردە «بولىنگەن قاراجاتتى يگەرسەك بولدى» دەگەن بۇرىنعى تاسىلدەرمەن جۇمىس بىتپەيدى. سوندىقتان جوبالىق ءتاسىل قاعيداتىن ەنگىزۋ قۇپتارلىق دۇنيە. ونىڭ ىشىندە جوسپارلانعان ناتيجەگە قول جەتكىزۋ ءۇشىن ناقتى باسشىلاردىڭ جەكە جاۋاپكەرشىلىگىن قاراستىرعان ءجون. باعدارلامالاردىڭ ىسكە اسىرىلۋىن باقىلاۋ تەتىكتەرىن دە جەتىلدىرۋ كەرەك», دەدى سەنات توراعاسى.
سونداي-اق پالاتا سپيكەرى اتالعان باعدارلامانى ىسكە اسىرۋعا كوپتەگەن مەملەكەتتىك ورگاننىڭ قاتىساتىنىنا نازار اۋدارىپ, ولاردىڭ جۇمىسىن ءتيىمدى ۇيلەستىرۋ ايرىقشا مانگە يە ەكەنىن تىلگە تيەك ەتتى.
«جالپى باعدارلاما اياسىندا قولعا الىناتىن شارالار 3,8 ميلليون ادامدى قامتيدى. بۇل ەلىمىزدەگى جۇمىس ىستەيتىن ازاماتتاردىڭ جارتىسىنا جۋىعى دەگەن ءسوز. وسى رەتتە باعانىڭ نەگىزسىز وسپەۋى اسا ماڭىزدى. سوندا عانا حالىق جاعدايىنىڭ جاقسارعانىن شىن سەزىنە الادى. سوندىقتان تابىستى ارتتىرۋ باعدارلاماسىنىڭ تاعى ءبىر مىندەتى ينفلياتسيانى اۋىزدىقتاۋ ەكەنىن ەستەن شىعارماۋ قاجەت», دەدى ماۋلەن اشىمباەۆ.
تالقىلاۋ سوڭىندا پارلامەنت سەناتى حالىقتىڭ تابىسىن ارتتىرۋ جولىندا ۇكىمەتپەن بىرلەسىپ جۇمىس ىستەۋگە جانە زاڭنامالىق تۇرعىدان قاجەتتى قولداۋ كورسەتۋگە دايىن ەكەنى ايتىلدى.
ايانا توعانبەك
